Къазанышлыланы ортакъ къасты

 

Бу арив ишни шатлыкъ пайы эсгерилген бинаны ичи эркин ва байрамча безендирилген залында юрюлдю. Залгъа гиреген догъа да эшикни онг билек ягъына стол ва дагъыда такъта бокъча салынгъан эди. Сюйген адам гелип-гелип шону тар япсарындан ичине акъча салып конвертлени ташлама бола эдилер. Гьар ким оьзю болагъан чакъыны бере эдилер. Онда ким не къуллукъдадыр, «оьрдеми», «тюпдеми» деп къаралмай ва соралмай эди. Чинк де аслу ва арив зат – савлай жамиятгъа тиеген бу ортакъ ишге жаны тартып, гёнгюллю кюйде гелегенлик.

Залда олтургъан уллулар ва гиччилер булан саламлашгъан сонг, жыйынны юрютеген Ж. Бекеев юртну баш гьакими М. Къазакъовгъа сёз берди.

Ол, оьз гезигинде гьакимиятны атындан жыйылгъанланы къутлап, бугюнгю «къазаныш гьаракатны» маънасыны уллулугъун айрыча эсгерди, оьзлени тилев-чакъырывуна сесленгенлеге ва энниден сонг да сесленмеге ва къол ялгъамагъа белсенгенлени барысына да разилик билдирди.

Жыйынны барышында кёп ёлдашлар чыгъып сёйледилер. Оланы арасында бу ишни «отун якъгъан» сиптечи яшёрюмлени группасыны лап жагьлы вакиллеринден Набиюлла Гьажиев, Камил Умаханов, Шируфулла Акаев бар эди.

Бир арада залда олтургъанлагъа, сагьнадагъы экрангъа  бакъдырылып, видеоматериал гёрсетилди. Шонда спорткомплексге кюрчю салынагъан, чырлар ишлеген мюгьлетлер суратланды. Марафон гьаракат юрюлюп турагъан арада залгъа жыйылгъанланы ялкъма  чоласы ёкъ эди. Концерт программагъа гёре гезиги булан ва аралашдырылып оьзбашына иш гёрегенлер, къужурлу номерлер гёрсетилди. Халкъ «Темирхан-Шура» деген ансамблни  бийивлерин, «Байтерек» деген хорну ва оьзге хыйлы йыравланы йырларын, Къумукъ театрны артистлерини, 1, 3 номерли школаланы охувчуларыны сагьналы чыгъышларын бек ушатып къабул этдилер.

Бу ерде булай бир затны эсгерип оьтмекни мен арив гёрдюм. Оьзюню ичинде бир адамшавлу шартлары ёкъ ерде де къазанышлы хыйлы уланлар спортну бир нече жураларына гёре ким де сукъланардай даражалагъа етишген. Алайыкъ ушу-саньдадан дюньяны беш керен чемпиону болгъан Бозигит Атаевни, Олимпия оюнларда гюмюш медальгъа ес болгъан Бахтияр Агьматовну, кикбоксингден дюньяны 3 керен чемпиону Уллубий Закарьяевни, тхэквондодан Европада биринчиликни 2 тирет чемпиону Б. Закарьяевни, шо журадан дюньяны чемпионатында Россияда биринчи болгъан Д. Абдуллаевни ва кёп оьзгелени…

Сёзню барышында бизге мунда анг­латгъан кюйде, биревлер елеме, ес болма сюйген онгайлы ерде юртну яшёрюмлерини гележеги учун спорт къала къурма къарамакъны ою башлап Набиюлла Акаевге ва Къоркъмас Хамаевге гелген. Олар башлагъан ишни маънасы барны англап, сонг булагъа башында Камил Умаханов ва Ширифулла Акаев де булан оьзге къайратлы жагьил тайпа ва бир нече уллу адамлар да къошулгъан. Шону яхшылыгъындан ва башында Даниял Шихсайитов да булан район гьакимиятыны таъсир этивюню натижасында шо ерни алмагъа, шонда артын уьзмеген гьалда къурулуш ишлени юрютмеге амал болгъан.

Мунда биринчи ишлер апрель айда башлангъан. Къысгъа болжалны ичинде хыйлы ишлер этилген. Чырлар тургъузулгъан, къалкъысы   къурашдырылгъан.  Энниден сонг этме тюшеген ишлени оьлчевлери чи дагъы да уллу.

– Эгер харж етишген эди буса, шо къурулушдагъы ишлер дагъы да чалт юрюлежек эди. Бинаны узуну 40 метрден оьте, генги 15 метр бар. Бийиклиги де бардыр 7 метр сама. Аслу бинадан къайры, дагъы да спортплощадка, чабагъан, атылагъан  ва оьзге оюнлар булан машгъул болма гётермелер ва уьйлер де проектлеге гёре ишленежек. Шоланы гёз алгъа тутуп, муна шулай зувап ишлени марафонун оьтгерме токъташдыкъ. Шону яхшылыгъындан къурулуш ишлени къалгъанларын да эпге гелтирме умут этебиз. Бизин чакъырывубузну къабул этгени, акъча берип къол ялгъагъаны саялы, юртлуларыбызгъа ва шолай да ерли ва район гьакимиятдагъылагъа баракаллабызны  билдиребиз, – дедилер бизин булангъы  лакъырында Ш. Акаев ва К. Умаханов.

Бу ерде районну гьакимиятыны харжына «Чоргъаларда» бирдагъы бир эркин спортзал къурулуп битме ювукъ болгъанны айтмагъа оравлудур деп эсиме геле. Шолар да азлыкъ эте деп ойлашагъанлар кёп бар. Неге тюгюл де, Къазанышда алты мингден де къолай хозяйство бар, адамланы санаву 18 мингге тармаша бара.

Халкъ бирлешип, булкъа этип, къуруп турагъан янгы спорт комплексге гьалиге ерли 8 миллион манатдан да къолай харж чыгъып тура. Марафондан алда да сиптечи группаны къасты булан гьар ерден ва гьар кимден жыйылгъан маялагъа ва кёплер гьавайын берген  къурулуш материаллагъа ишленген мунда кёп зат бар. Ким нечакъы бергенини, не зат къайда ва нечик къолланагъаны бек гьисабы юрютюле, халкъ берген гьар манат бек аявлу.

Оьзюню юртундагъылар, тышдагъы хыйлы къазанышлылар ва шолай да бир табун ятлар акъча берип этген кёмекни уллулугъун ва агьамиятын айрыча эсгере туруп, Къазанышдагъы жамият советни актив ортакъчысы муаллим Гьажимурза Гьажимурзаев булай деди:

– Бугюн бизин бу  берекет булкъабызгъа халкъ сиптечилигин арив гёрюп якълайгъанлар  гелип тербей. Бу къайдадагъы уллу жамият гьаракатчылыгъы, озокъда дагъы, адамланы ва савлай жамиятны бирлешдире, сыкъ ва къатты эте. Булкъачылыкъ бизин  халкъда – тезден бар зат. О битим бир арада къапуллукъгъа тарып къала тура эди.

Алдын, эсигизде буса, халкъ уьйлени де, оьзге башгъа биналаны да бирлешип, булкъа этип къура эди. Бу гезик  къазанышлылар гёрсетген уьлгю алда юрюлген адамлыкъ  мердешлени тирилтип къайтармагъа этилген асувлу абат болду бугъай деп гьисап этемен.  Бу дюр уянывну ва алгъа талпынывну бир жанлы аламаты.

Сентябрни 21-нде Къазанышда болгъан зувап марафон 8 сагьатны узагъында юрюлдю. Шо тамамлангъан сонг, гьисап юрютеген хас комиссия гьаракатны жамын чыгъарды. Шо заман белгили болгъаны йимик, 1 миллион 300 минг манат жыйылгъан. Акъча гелтирегенлер гьали де бар. Сонг да, «Бирюза» деген фирманы еси Ш. Акаев комплексни гьажатларына 2 миллион манатдан артыкъгъа мрамор материаллар гелтирип тапшурмагъа сёз берген. Бу тайпа харжлар буса спорткомплексни ювукъ заманланы ичинде ишлеп битдирмеге имканлыкъ бережек.

Тутгъан муратларыгъызгъа етмеге сизге Тенгирибиз кёмек этсин!

 

 

 

 

Абдулла  БУГЛЕНЛИ.

 

СУРАТЛАРДА: марафондан гёрюнюшлер.

Авторизация
*
*
Регистрация
*
*
*
Согласны с условиями сайта?
Генерация пароля