Игитлени эсге ала туруп…

Эсгерилген школада шолай чаралар оьтгерилегени биринчи гезик тюгюл. Айтагъаным, школагъа аты къоюлгъан, яшайман деп айтагъан вакътисинде намарт­ны къолундан оьлюп гетген милицияны капитаны З.Хизриевни эсделигине багъышлангъан пашман жыйынлар школада гьар йыл дегенлей оьтгериле. Гезикли чара да хыйлыланы тергевюн тартды.

Ери гелгенде айтмагъа ярай, пашман жыйында «Бабаюрт район» район администрациясыны ёлбашчысы Ж.Шайыпов, Бабаюрт район администрацияны яшёрюмлени ишлерине къарайгъан бёлюгюню ёлбашчысы И.Абдуразакъов, полицияны Бабаюрт район бёлюгюню ёлбашчысыны орунбасары Ж.Алиев, Хамаматюртну башчысы Н.Хурунов ортакъчылыкъ этдилер.

Жыйылгъанланы алдында сёйлей туруп, Ж.Шайыпов йылдан-йылгъа жинаятчыланы къолундан оьлегенлени къара сиягьы толумлашагъанны эсгерди.

– Биз къыйын заманда яшамагъа борчлубуз, – деди, оьзюню сёйлевюн узата туруп, Ж.Шайыпов. – Дин экстремистлер ва жинаятчылар оьзлени намарт хыялларын яшавгъа чыгъармакъ учун не ёлланы да излейлер. Кёбюсю гезиклерде олар оьзлени вагьши ишлеринде яшёрюмлени гючюн къоллайлар. Шо саялы да биз инг башлап оьсюп гелеген яш наслуну шо зулмудан арекде сакъламагъа, оланы гележегин ярыкъ этмеге къаст къылмагъа герекбиз.

Ж.Шайыповну пикрусун узата туруп, Бабаюрт район администрацияны яшёрюмлени ишлерине къарайгъан бёлюгюню ёлбашчысы И.Абдуразакъов яшёрюмлер булан чакъда-чакъда оьтгерилеген чаралар оланы яман ёллардан къорумагъа кёмек этегенни билдирди.

– Бугюнгю чара да – бизин парахатлыгъыбызны болдура туруп, оьзлени жанларын къыйгъан аманлыкъ сакълав къурумланы къуллукъчуларына биз этеген гьюрмет, – деп тамамлады оьзюню сёйлевюн И.Абдуразакъов. – Оланы атларын унутмагъа амал да ёкъ.

– Терроризмни къоркъунч­лугъу янгыз бизге тюгюл, бизин авлетлерибизни ва оланы авлетлерини гележегине тогъаслар салмагъа бола, – деди гезиги етишгенде Бабаюрт РОВД-ни ёлбашчысыны орунбасары Ж.Алиев. – Шо саялы да биз бары да гючюбюзню салып ону булан ябушмагъа, ингдеси, ондан уьстюн гелмеге борчлубуз. Мен шогъар бир де шеклик де этмеймен. Халкъ бириксе, эл тувар дегенлей, халкъны утмагъа бир заманда да бажарылмас.

Эсге алывну барышында школаны охувчулары Россияны ва Дагъыстанны тарихине гюнагьсыз халкъны къаны булан язылгъан агьвалатланы: Буйнакскиде, Волгодонскда ва Москвада атылгъан уьйлени, Первомайскидеги ва Бесландагъы агьвалатланы, Москвада ва Волгоградда болгъан атылтывланы эсгердилер. Хамаматюртну Игити, оьзю охугъан 2 номерли школагъа аты къоюлгъан З.Хизриевге багъышлангъан кёп санавдагъы шиърулар да охулду.

Эсделикге жыйылгъанлар оьзлени гёзьяшларын яшырмай эдилер. Айлананы намартланы къолундан гюнагьсыз оьлгенлеге шыплыкъ билдирген йимик тамаша шыплыкъ къуршагъан эди.

Жыйынны ахырында Хамаматюртну юрт башчысы Н.Хурунов жыйынны оьтгергенлеге ва охувчу яшлагъа теренден разилигин билдирди. Жыйын буса охувчу яшланы чыгъывлары булан давамланды.



Герейхан Гьажиев,

хас мухбирибиз.

Суратда: ёлугъувдан гёрюнюш.


Авторизация
*
*
Регистрация
*
*
*
Согласны с условиями сайта?
Генерация пароля