Айлыкъ башланды

– Оьтген йыл да районда тазалыкъ болдурмакъ учун кёп иш этилди, – деди, комиссияны гезикли жыйынын ача туруп, Хасавюрт район администрацияны башчысы Загьир Боташев. – Уллу ёлланы эки яны таза, гьали юртларда чёп тёгеген ерлеге тергев герек. Бир-бир юртларда хас ерлер гьали де белгиленмеген, шону учун да адамлар чёпню оьзлеге онгай­лы ерлеге тёгелер. Бу йыл тазалыкъны къыйматлайгъанда юртларда нече терек орнатылгъанны да гьисапгъа алма герек.
Загьир Гьажиевич олай да гьар къуллукъну ёлбашчысына этме герек ишлени тапшурду. Агъачлыкъ хозяйствогъа къарайгъан бёлюкню ёлбашчысы Багьавдин Мамаевге ортасындан ёл гетеген агъачлыкъланы тогъузар метр ичге ба­гъып тазаламакъ, ёллагъа къарайгъан иш къурумну башчысы Марат Мажитовгъа ярашдырыв ишлени кютмек тапшурулду.
29-нчу мартда районда уллу булкъа оьтгерилди. Шонда ерли администрацияланы къуллукъчулары, муаллимлер ва администрацияны бёлюклерини къуллукъчулары ортакъчылыкъ этдилер.
– Мени бёлюгюмден субботникге 20 адам чыкъгъан, – дей Багьавдин Мамаев. – Олардан алтысы бычгъылар булан ишлейлер ва ёл ягъадагъы бёлеклени, къуругъан тереклени гесе. Барагъан кюйде агъачланы къалынын да алабыз. Ариде ижарачылар да агъачлыкъны ёл боюн тазалай ва тереклеге киреч чаба туруп геле. Шолай да, ёл бойгъа биз тазалыкъны сакъласын деп язылгъан 20 четен де салып битдик. Субботникни гюнюнде ёл бойлар тазаланды, машинлер булан жыйылгъан нас хас ерге ташылды.
Тазалыкъны айлыгъыны гьасиллери апрель айны йигирмасындан сонг белгили болажакъ. Гьасиллерине гёре яхшы тазалыкъ болдурулгъан юртлагъа акъча савгъатлар берилежек.

Г. КЪОНАКЪБИЕВ,

оьз мухбирибиз.
Суратда: Хасавюрт агъачлыкъ хозяйствону къуллукъчулары ёл бойланы тазалай.
Авторизация
*
*
Регистрация
*
*
*
Согласны с условиями сайта?
Генерация пароля