«Аврувну иржайыву да гёнгюмню ача»

– Мария Тимофеевна, сиз не ерде тувгъансыз?

 

– Мен Украинаны Днепропетровск областыны Александровск юртунда 1939-нчу йылда тувгъанман. Охуп битген сонг, направление булан Дагъыстан Республиканы тахшагьарына гелгенде,  мени тилевюме гёре, Савлукъ сакълав министерликден Къарабудагъгент районгъа йиберди.

 

– Дагъыстанда танышларыгъыз, ювукъларыгъыз бармы эди?

 

– Ёкъ эди. Шагьаргъа ювукъ районда ишлемеге сюе эдим. Дагъыстангъа гелмеклигиме де орус язывчулар Александр Сергеевич Пушкинни, Михаил Юрьевич Лермонтовну, Бестужев-Марлинскийни, Лев Николаевич Толстойну асарлары таъсир этди.

 

Гьажиева деген фамилияны сиз Дагъыстангъа гелгенде алдыгъызмы?

 

– Дагъыстангъа гелгенде алдым. Магьачкъала шагьарны автовокзалында автобусгъа минегенде, магъа Гьажи деген къарабудагъгентли улан къаршы болду. Автобусгъа мингенде таныш болдукъ.  Къарабудагъгентге етишгенде, магъа Гьажи больницагъа бармагъа, сонг ерлешмеге кёмек этди. Танышлыкъ сюювге айланды. Гьажи де, мен де уьйлендик. Гьажи оьзюню ишинде, мен больницада медсестра болуп ишлеп турагъанда, эримни Манасгент посёлокгъа юрт советни председатели этип йиберди. Шо посёлокда 1963-нчю йылдан 1971-нчи йылгъа ерли Гьажи юрт советни председатели болуп ишледи. Мен буса  Манасгент участка больницада ишледим. Сонг къайтып Къарабудагъгентге гёчдюк. Мен район больницада ишлемеге башладым.

 

– Ишигизни гьакъында не айтмагъа боласыз?

 

– Мен оьзюмню касбумну кёп сюемен. Авругъан адамгъа кёмек этмек, ону сан янын яхшылашдырмакъ, аврувну йылы сёз булан да гёнгюн алмакъ, къолайгъа къайтагъанын гьис этмек – мени учун уллу савгъат.

 

– Ишигизге район больницаны баш врачы, коллективни членлери нечик багьа бере?

 

– Мен ишлейген 53 йылны ичинде баш врачлар кёп болгъан. Мисал учун алгъанда, 1980-нчи йылдан 1993-нчю йыл болгъунча  Къызыл Хачны район бёлюгюню ёлбашчысы да болуп ишледим. Ишиме гёре багьа да берилди. Мени З.Ц.Соловьёвну медалы булан савгъатладылар. 1997-нчи йылдан 2001-нчи йылгъа ерли район больницада баш медсестра болуп ишледим. Кёп йыллар аврувлагъа къуллукъ этген саялы, загьматны ветераны деген ат да берилди. Озокъда, сынав пайдалы. Медицина илму оьсген чакъы, касбучугъа да ишин яхшылашдырмагъа тюше. Аврувгъа къуллукъ этеген медсестра да оьзюню борчларын тийишли даражада юрютмек учун, билимли, бажарывлу ва гьаракатчы болмаса ярамай. Гьаракатчы да, англавлу да болсанг, этген къуллугъунг аврувну гьалын яхшылашдыра. Къолайлашгъан аврувну иржайывун гёрмек мени де гёнгюмню ача. Айтагъаным, оьз ишинге юрегинг аврумагъа герек.

Аврувгъа язгъан дарманланы оьз заманында, гёрсетилген сагьатда бермек, шо дарманланы таъсирин билмек учун аврувну пикрусуна да тынгламакъ медсестраны борчу гьисаплана. Тюзюн айтсам, аврув больницадан чыкъгъанда да мени чакъырагъан гезиклер болгъан. Къолай болуп чыкъгъан ватандашны уьюне баргъан гезиклерим де болгъан. Кёмек тилеп чакъыргъан сонг, бармай да болмайсан. Оьз ишине жаны авруйгъан касбучуну аврувлар да кёп сюе.

 

– Мария Тимофеевна, пачалыкъны янындан да сизин ишигизге багьа берилгендир чи.

 

– Кёп йыллар аврувлагъа гьалал къуллукъ этгеним саялы, 2000-нчи йылда магъа савлукъ сакълавну отличниги деген ат берилген. Тюзю яхшы, этген ишинге багьа бергенни сюесен. Амма ишинге багьа береген  саялы тюгюл, юрекни буйругъу талап этеген саялы ишлесенг, геч яда тез ишинг де къыйматлана.

Авторизация
*
*
Регистрация
*
*
*
Согласны с условиями сайта?
Генерация пароля