«Алевдин булакъ»



Сув чыгъартмакъ, сувдан оьтеген кёпюр къурмакъ Аллагь яндан да инг де савап ишлерден санала. Сув чыгъартмакъ  тынч этилеген иш тюгюл. Аз харж булан этилеген иш де тюгюл.

    Бир-эки гюнлер алда Кёстек юртну  Теркеме авулуну тамазаларындан  шулай тилев гелди: Теркеме авулгъа гелген яхшылыкъны, мунда гелген берекетни, чыгъарылгъан сувну гьакъында язсанг ярамаймы деп.

    Сав районгъа  танывлу район поликлиниканы (ХЦРП) баш доктору Азаматов Анвар Магьмутович юртда булакъ чыгъартгъан деген хабарны эшитгенмен, кёп арив де гёргенмен, тек булакъны оьзюн гёрмегенмен. Къой, магъа шулай тилев гелген сонг, барып булакъны гёрейим, сонг язма тынч болар деп, эртен агьлюме тилеп, булакъгъа ерли бардым. Межитни янында дегенге, Теркеме авулну межитине ювукъ болдукъ…

    Гьалиги заман, адам кёп аз затгъа тамаша болагъан заман. Неге тюгюл,  шагьарларда, юртларда  кёкге етеген биналаны бирден-эки тизилгенин гёрюп къаласан. Гьар затда да эпсиз чалтлыкъ, гёзеллик бар.

    Тек булай гёзелликни мен гёрмегеним хыйлы бола! Я, булакъ дегенде, булакъмы, бир уллу сигьру булан этилген имарат. О булакъны шулай къурмакъ учун Анварны иниси Руслан ойлашгъан.

    Булакъны арт яны бийик яр йимик. О Ростов якълардан гелтирилген ташдан тизилген. Ону лап уьстюне «Алевдин булакъ» деп язылгъан. Сув хыйлы тюпде, эки якъдан агъа. Ону агъымы саргъылт къалын плиткаланы уьстюнден тавдан гелеген шаршарны меселинде агъа. Гюмезленип ябулгъан булакъны уьстю гюнню шавлаларыны тюбюнде тюрлю тюслерде къувлуй. Огъар сув оьзю де къувлума гюч бере. Темирден  этилген булакъны ягъасындагъы челтирлер бырынгъы замандагъы  ажайып имаратланы эсге сала. Булакъны эки де ягъында къыячалап салынгъан акъ мармар тюплери булангъы скамейкалар, сюймейген адамны да оьзлерде олтурма чакъыра. Булакъны арт яны темир накъышлангъан челтирлер булан бегилген. Онда арив нарат ва башгъа тереклер, гюллер чачылгъан.

    Бу аривлюкге къарап, тамаша болуп тураман, суратларын аламан. Шо вакътиде мени уьстюме бир тамаза гелди. Ол Гьажакъов  Мажитхан эди. Мен булакъгъа оьзюм тамаша-гьайран болуп турагъанымны айтып, тамазаны кююн-гьалын сорадым.

    – Къызым, – деди тамаза, – сен кимлерден боласан?

    Мен чолакъ Шагьсолтанны гелини болагъанымны айтдым.

    – Гечип къой, къызым. Мен сени танымагъан эдим, – деди, агьлюмню, яшланы сорады.

    Иржайгъан бетин булакъгъа бакъдырып:

    – Гёресен, къызым, Анварны яхшылыгъындан бизге гелген ниъматны.

    Аривлюгюн айта бусанг, гьали де бары да иши этилип битмеген. Сув агъагъан ерлер дагъы да арив  онгарылажакъ. Уьст якъдан  фонтан болуп атажакъ. Айланасына  асфальт этилип, бу ерлер бары да дагъы да арив болажакъ, – деди.

    – Сувуну татывуна къарадынгмы, нечик татывлудур! – деди тамаза.

    Агъып турагъан баркамандан алып ичдим, нече де татывлу.

    Сув йимик сыйлы болсун муну чыгъартгъанлар.

    Ягъагъа гелип, тамазагъа:

    – Бу сувдан абзарларына тартгъанлар бармы? – деп сорадым.

    –Къызым, биз оьзюбюз де биринчилерден болуп тартдыкъ. Бу орамдагъыланы кёбюсю сувну тартып битген. Бу къуюну Мычыгъышдан гелген  ишчилер къаздылар. Быргъылар 205 метрге тюпге гете, – деди.

    Бурулгъан ердеги орамны гёрсетип:

    – О орамдагъылар да тартып тура, дагъы да кёплер тартажакъ, – деди.

    Тамазаны сююнчден янагъан бети, сувгъа къарап къуванагъан кюю, бу авулгъа гелген яхшылыкъны уллулугъун  гёрсетип тура эди.

    Бираз ариде бизин хабарыбызгъа тынглагъан бир нече къатынланы гёрюп, олагъа багъып юрюдюм. Булакъгъа ювукъдагъы Акавова Нюргьаният оьзюню татли тили булан Анваргъа уллу алгъышлар тилеме башлады. Этилип турагъан ишлени эсделик тептерине язып турагъанын да айтды.

    Къысгъача айтгъанда, сувдан тоюп болмайгъан бу авулну халкъы, гьали сувдан сююнюп не этегенин билмей! Бу берекетни оьзлеге гелтирген Анваргъа уллу алгъышлар тилейлер.

    Башында мен булакъны аты «Алевдин булакъ» деген эдим. Гьали огъар олай ат неден къоюлгъанны айтайым.  Алевдин – Анварны биргине-бир уланыны аты. Яппа-яш кююнде (32 йыл янгы битип турагъанда) ата элинден йыракъларда Эмиратларда Дубайда яшайгъан Алевдин ювукълары булан мотоциклет  гьайдап чыкъгъан ерде ярдан учуп оьлген. Ата-анасы ону Дубайда гёмген.

    Муна, ата уланына сынны орнуна халкъына пайда гелтиреген булакъ къургъан. Къургъан дегенде де олай къургъан, ону гьар ташында, темиринде, айланып чачылгъан терегинде, гюлюнде уланына бакъгъан сюювю билинип тура. Ким биле, къайгъысы солкъ болгъанда, мундагъы скамейкаларда олтурма болушлукъ этсе, ата-ана уланыны оьзлеге айтып болмай гетген сёзлери къулагъына чалынар…

    Булакъны суву буса халкъгъа гелтиреген пайдасы булан бирге оьзюню сувуну шаршарлы тилинде юртуну халкъларына насип тилей.

    Алевдинни гюнагьларындан Аллагь гечсин, Аллагь рагьмат этсин! Булакъны чачырагъан сув агъымы ону уьстюне нюр болуп  явсун!

Супуяханым Бийболатова.

Кёстек.

Суратда: Алевдин булакъны гёрюнюшю.

 

    Автордан: Тамаша тюгюлмю, 106 йыл алдын Кёс­текде Нюржагьан булакъ чыкъгъан. О булакъны сувун ичгенлер сувну салкъынлыгъына, ону  татывуна эпсиз уллу къыймат бергенлер. О булакъны тарихи де эпсиз тамаша.  Гьажимурат деген гиши  оьзюню яшлай оьлген къызыны тилевюне гёре чыгъаргъан. Муна бизин гюнлерде де шолай бирдагъы булакъ  чыгъарылгъан.

    О сувну  Кёстекни халкъы чы нечик де,  оьзге юртлардагъы халкъланы да кёплери биледир десем ялгъан болмас.

Авторизация
*
*
Регистрация
*
*
*
Согласны с условиями сайта?
Генерация пароля