Врачлар иш ёлдашын къутгъаргъанлар

Врачлар иш ёлдашын къутгъаргъанлар


Понедельник, 18.06.2018г. - "ЁЛДАШ".


Республика клиника больницадагъы медицина къуллукъчулар оьзлени иш ёлдашын, нефрология бёлюкде 30 йыллар чалышып турагъан докторну оьлеген ерден къутгъаргъанлар.

 


Нефрология бёлюкде ишлейген врач, ял алып, отпускадан чыкъгъан биринчи гюню болгъан. Эртенден берли ону юрегини къырыйлары сызлап авруп тургъан. Тюшге таба авруву гючленме башлай. Тек нечакъы оьзю де врач буса да, ахшамгъа таба гьалы осаллашып барагъанына къулакъасмай, авруву тайып къалар деген умут булан уьюне гете. Ожагъына етишгенде, огъар бирден-бир яман болуп, эсин тас этме башлай. Биразлардан ону гьалы бузукълашгъангъа гёре «скорый помощну» чакъырып, оьзю ишлейген больницагъа гелтирелер.


–Ёл бойда огъар «острый обширный инфаркт» деп диагноз салалар.


Тез-тез операция этеген ерге алып барып, шонда коронография этип, къантамурлары тромблар булан тыгъылгъанны токъташдырдыкъ. Юрегине къан барагъан ёлланы ачып, коронарный стент салдыкъ. Шо къанны ишлевюн ёрукъгъа салгъан сонг, ону авруйгъан ерлери токътады,–деп билдирди республика больницаны бёлюгюню заведующийи, медицина илмуланы кандидаты Шамил Магьамматов.  


Ол айтгъан кюйде, аз заманны ичинде чалтлыкъда операция этмеге тюшгенлиги олагъа къыйын тийген.


–Аврувлар къаркъарасы бираз билдиргенде, шоссагьат врачлагъа чапмай, гьалны бек четимлешдире. Бираз гечигип, иш ёлдашыбызгъа кёмекге етишмеген бусакъ, ондан къуру къала эдик. Врач да болуп, аврувуна чыдап тургъан. Юрегини гьалы къолай заманда бизге тыгъылгъан къантамурларыны ёлун ачма рагьат бола. Энниден сонг операция этилинген адам кардиолог-врачны тергевюню тюбюнде турмагъа тюше. Шолай операциялар аслу гьалда 40-45 минут юрюле, наркозсуз да этиле.


Булай операцияланы биз гюнде 5-6 керен этебиз. Бизин бёлюкде «острый инфаркт миокарда» булангъы аврувланы багъа. Болгъан чакъы олагъа кёмек этме, авруйгъанланы къутгъармагъа къарайбыз. Сонг да, бизин бёлюкде аврувланы къолу-бутуну, бойнуну, башмайыны зараллангъан къантамурларын багъабыз,–деп англатыв берди Шамил Магьамматов.