Бабаюрт районда ташгъынгъа гьазирлик оьтгерилди

   

Пятница, 27.04.2018г. — «ЁЛДАШ».


Оьтген жумагюн Бабаюрт районда къыставуллу гьалланы алдын алывгъа байлавлу гьазирлик гёрювлер – уьйренивлер оьтгерилди. Уьйренивлерде республиканы экологиягъа ва табиат байлыкъларына къарайгъан министри Набиюлла Къарачаев, Дагъыстанны МЧС-ни ёлбашчысыны биринчи заместители Олег Халилов, Сугъарыв ишлени министерлигини ёлбашчысы Залкип Къурбанов, «Бабаюрт район» деген муниципал къурулувуну ёлбашчысы Элдар Къарагишиев, Бабаюрт районну юртларыны башчылары, Къызлар шагьарны, Акъуша, Ахвах, Ботлих, Новолак, Тлярата, Унцукул, Хасавюрт, Хунзах, Цумада ва Къызлар районланы къыставуллу гьаллагъа къарайгъан къуллукъларыны ёлбашчылары ортакъчылыкъ этдилер.


 


Республика оьлчевдеги уьйренивлер Бабаюрт районда оьтгерилгени де негьакъ тюгюл. Районлуланы къувунлу гелген 2002-нчи ва 2005-нчи йылланы яйы буссагьат да эсинде. Терик оьзенни ташгъыныны алдын алма тынч тюгюл экени белгили. Районну Янгы Коса ва Оразгъулавул юртларына гелтирилген заралны миллион манатлар булан оьлчене эди. Ташгъындан къачып, къоркъунчсуз ерге гёчюрюлген Оразгъулавулну халкъы палаткаларда биринчи сувукълар гелгенче яшамагъа борчлу да болдулар.



Гидрометцентр билдиреген кюйде, бу йылны яйы да къувунлу гелмеге бола. Май айны экинчи яртысында болма болагъан къатты янгурланы натижасында Терик оьзенни суву гётерилмеге ва эрневлери йырылып, оьзенни боюнда ерлешген Бабаюрт районну юртларыны ва гёчювюл гьайванчылыкъ булан машгъул тав районланы къотанларыны халкъларына къоркъунчлукъ гелтирмеклик бар.



Шо гьакъда айта туруп, Дагъыстанны МЧС-ни ёлбашчысыны биринчи заместители Олег Халилов уьйренивлени аслу борчу, оьзенлени эрневлери йырылып, халкъны яшавуна къоркъунчлукъ гелгенде къыставуллу гьаллагъа къарайгъан къуллукъну ерли бёлюклерини гьаракатын камиллешдирмек ва болма болагъан ташгъынгъа ерли гьакимлени гьазирлемек болуп токътагъанны эсгерди.





– Къыставуллу гьал болгъанда, шо гьаллагъа къарайгъан ерли къурумланы халкъны къоркъунчсуз ерге гёчюрювде этмеге герек ишлени тергемеге ва кемчиликлени алданокъдан арагъа чыгъармагъа герекбиз, – деди Олег Халилов. – Ёгъесе, тангала ишлер четим гелсе, гьаллар бузукъ болмакълыкъ бар.



Оьзюню сёйлевюнде «Бабаюрт район» деген муниципал къурулувуну ёлбашчысы Элдар Къарагишиев Бабаюрт район республиканы лап да уллу районларыны бириси экенни эсгерди.



– Бугюн Бабаюрт районда 50 мингге ювукъ адам яшай, – деди Э.Къарагишиев. – Районда ерлешген гёчювюл гьайванчылыкъ булан машгъул тав районланы къотанларында дагъы да 30 мингден артыкъ адам яшай. Районну ичинден 2 уллу оьзен – Солакъ ва Терик агъа, сонг да, Дзержинскийни атындагъы сугъарыв система, Яхсайсув сув батагъа ерлешген ва шолар тангала халкъгъа не йимик балагь алып гелмеге болагъанны бирев де билмей.



Къувунлу гьаллагъа гьазирлик гёрювлер эки бёлюкде оьтгерилди. Уьйренивлени биринчи яртысында къыставуллу гьаллагъа къарайгъан ерли къуллукъланы сув алывну вакътисинде этилежек ишлери гьакъда сёз юрюлдю. Экинчи бёлюкде буса шо ишлер гьакъыкъатда нечик оьтгерилежеги гёрсетилди.



Гьазирлик гёрювлер алданокъдан онгарылгъан плангъа гёре башланды: муниципал районну ёлбашчысына МЧС-ден республикада ва шону булан бирге районда сув алывну къоркъунчлугъу тувгъанны гьакъында алгъасавлу билдирив гелди. Шо билдиривге гёре, 17–21-нчи майда болгъан къатты янгурланы натижасында тавларда ятгъан къарны къалын къатлавлары тезлик булан иримеге башлагъан ва Терик оьзенни суву къоркъунчлу ерге ерли гётерилген. Терик оьзенни онг эрневю йырылып, районну Тамазатёбе, Янгы Коса ва оьзге юртларына сув алывну къоркъунчлугъу тувгъан.



Районну башы Элдар Къарагишиев буса оьзюню янындан къурумланы ва къуллукъланы ёлбашчыларына сув алывну къоркъунчлугъу барны, къурулгъан хас комиссиягъа буса тас этивлени кемитмек учун чаралар гёрмекни билдирди. Натижада буса шо чаралар оьтгерилди.



Сув алывдан гёчюрюлген халкъны заманлыкъгъа ерлешдирмек учун Бабаюртдагъы школа-интернатда ерлер гьазир этилген эди. Интернатда халкъ учун тарыкъ бары да онгайлыкълар ашханадан башлап, медпунктгъа ерли онгарылгъан эди. Уьйренивлерде ортакъчылыкъ этгенлер де мюкюр болгъан кюйде, халкъ шонда оьзлени уьюнде йимик гьис этмеге болардай шартлар бар эди.



Бабаюртну ювугъундан оьтеген татавулну ягъасында авлакъ лагер къурулгъан эди. Шонда уьйренивлерде ортакъчылыкъ этгенлер де бардылар ва еринде сув алывдан къоркъунчсуз ерге гёчюрюлген халкъ учун яратылгъан шартлар булан таныш болдулар. Шонда районда къыставуллу гьаллар тувуп гетсе, халкъны аманлыгъын болдурмакъ учун тарыкъ бары да техника, гёчюрюлген халкъны заманлыкъгъа ерлешдирмек учун палаткалар, ашханалар къурулгъан эди.



Уьйренивлени барышында МЧС-ни къуллукъчулары сувда батылма тура­гъан адамны къутгъардылар, огъар биринчи кёмек этдилер ва къоркъунчсуз ерге гёчюрдюлер. Бир вакътини ичинде адамланы къутгъарывда гьазирлик гёрювлеге къуршалгъан вертолётну къолладылар. Узун сёзню къысгъасы, уьйренивлени ортакъчылары оьзлени алдына салынгъан бары да масъалаланы уьстюнлю кюйде чечмеге болдулар.



Уьйренивлени барышында районну башчысы Элдар Къарагишиев ва респуб­ликаны МЧС-ни ва министерликлерини башын тутгъанлар вертолёт булан Терик оьзенни боюн тергеп де алдылар.



Гьазирлик гёрювлени жамын чыгъара туруп, Дагъыстанны МЧС-ни ёлбашчысыны биринчи заместители Олег Халилов гьазирлик гёрювлерде ортакъчылыкъ этген бары да къуллукъланы вакиллерини ишине яхшы къыймат берди ва оланы бирликде этилежек чараларындан халкъны яшавуну къоркъунчсузлугъу гьасил болажакъны бирдагъы да эсгерди.



Авторизация
*
*
Регистрация
*
*
*
Согласны с условиями сайта?
Генерация пароля