Хасавюрт шагьар больницаны яшлагъа къарайгъан хирургия бёлюгюню заведующийи болуп ишлейген Батыр Гьажакъович Гьамзатов 1948-нчи йылда Чагъаротар юртда тувгъан. Дагъыстан Республиканы ат къазангъан врачы. Оьр категориялы врач да дюр.
Батыр Гьамзатов шо больницада ишлейгенли 45 йыл бола. Ол Дагъыстанда инг де сынавлу ва белгили хирургланы бириси деме де ярай.
Эки йыл алда огъар Гиппократны ордени, гетген йыл буса Н.Пироговну медалы тапшурулгъан. Медаль тапшурулгъан деген хабарны эшитип, ону янына барып къутладым.
–Гьар гюнде, аз этип айтгъанда, эки операция этемен. Бир-бирде уьч-дёртню этеген гезиклер де болгъан. Бизин бёлюкде янгы тувгъан ва 16 йыллыкъ чагъындан оьтмеген яшлар яталар. Мен ишлеген йылланы ичинде бек къыйынлы операцияланы да этме тюшген. Билемисиз, мен яшлар сав болуп аякъ уьстге тургъанны гёрюп сююнемен. Яшланы оьлюмден къутгъармакъ – мени учун уллу насип. Оланы юрюйгенин гёрюп, юрегим бек парахат бола. Арадан 10-20 йыллар гетип: «Батыр агъав, сиз магъа гиччи заманда операция этгенигизни бир де унутмайман»,– деген сёзлер магъа арив тие, — дей Батыр.
Измулла ГЬАЖИЕВ.
Автор чыгъаргъан сурат.
