Топуракъ асувлу къолланмагъа герек

Топуракъ асувлу къолланмагъа герек

        Топуракъ къайсы элни де аслу байлыгъы деп гьисаплана. Гертиден де, бары махлукъгъа азыкъны береген о чу. Хадирин билегенлеге, асырап сакълайгъанлагъа ва къоллайгъанлагъа топуракъ мол кюйде берекет бере.

 

Элибизде бир вакъти болгъан алгъасавлу алмашынывлар, оьзге тармакълагъа йимик, юрт хозяйствону топуракъчылыгъына да бир къадар яман таъсир этди. Шо себепден сабанлыкълар, бавлар ва оьзге тарлавлар кёбюсю гьалда хужуланды, гьарам, гьилла къастлар булан тилим-тилим болду ва тоналды.


Шону «аччысы» гьали, арадан заманлар оьтюп, айрыча бек сезиле... Гьалны тюзлемеге чаралар гёрюв геч буса да башлангъан. О гьакъда оьр пачалыкъ идараларында да, ерлердеги жамиятланы арасында да гьали кёп сёз юрюле.


Шолай, Дагъыстанны Халкъ Жыйыныны гьали-гьалилерде болгъан хас генгешинде де республикабызда бар топуракъ байлыкъгъа янашывну ва ёлбашчылыкъ этивню асувлу даражагъа гётеривню масъалаларына къаралды. Бу гезик онгача Къаягент райондагъы ГУП деп айтылагъан къурумланы ишлейген кюю ва гьалы гёзден гечирилди.


Эсгерилген генгешни ишинде парламентни вице-спикери М. Магьмутов, комитетлерини председателлери А.Алиева ва С.Исакъов, комитетни председателини заместители М.Исмайылов, Дагъыстан Республиканы юрт хозяйство ва сурсат министри А.Гьюсейнов, Дагъыстанны топуракъ ва мал-мюлк министри А.Къагьиргьажиев ёлдашлар ортакъчылыкъ этдилер.


Халкъ Жыйынны Председатели Хизри Шихсайитов, генгешни гиришив сёз булан ачып, топуракъгъа тиеген гьар не масъала да халкъны рагьатсызландырагъанын айрыча эсгерди. Ол ГУП-ланы гьажатлыгъы ва тюгюлю гьакъында, олардан хайыр барны яда ёкъну гьакъында оьзлер нечик ойлашагъанын малим этмеге генгешни бары да ортакъчыларын чакъырды.


Шолагъа тиеген масъалагъа байлавлу болуп Агъарагьим Къагьиргьажиев умуми баянлыкъ берди.


– Савлай Россияны оьлчевюнде алып къарасакъ да, ГУП тайпалы къурумлар бирден-эки хайыр бермей. Шо себепден савлай уьлкеде ГУП-ланы ёкъламакъ гёз алгъа тутулгъан, – деди ол генгешде.


Сонг Халкъ Жыйынны комитетини председатели А.Алиева, оьзю ерине барып, Къаягент районда адамлар булан ёлугъуп, оланы сёзюне къулакъасгъанын, гьакъыкъатда шонда гьаллар нечик экенин исбат этди.


Гётерилген масъаланы маънасын ача туруп, Хизри Шихсайитов биринчилей адамлагъа топуракъны ишлетмеге имканлыкъ бермекни агьамияты бар экенни, экинчилей буса оланы барысы да топуракъ саялы налог гьакъланы да янгылмай тийишли оьлчевлерде тёлемеге тюшегенни англатды.


Оьзю билеген мисалланы ортагъа чыгъарып сёйлей туруп, Сейфуллагь Исакъов Къаягент районда ГУП-ланы барысыны да санаву 8-ге етишегенни, шоланы янгыз 2-синден къайрысыны гьеч бир хайыры ёкъну, гьасили, хозяйство ишлени къурувну ва юрютювню шу къалибини заманы битгенни билдирди.


Сонг къайтара сёз алып, Агъарагьим Къагьиргьажиев есликни шу къайдасын бугюн уруп тозуп къоймажакъны, тек топуракъ кюю булан, тюз къоллансын учун умпагьатлы чаралар гёрюлежекни айрыча буварып англатды.


Арагъа салынгъан темагъа гёре республиканы юрт хозяйство ва сурсат министри Абзагьир Гьюсейнов да оьзюню ойларын ва таклифлерин аян этди.


Хизри Шихсайитов таклифлени ва маъналы сиптелени оьзю арив гёрегенин, халкъны мурадын ва талапларын да гьисапгъа алып, Къаягент райондагъы яшавлукъ-экономика гьалланы ёрукълашдырмагъа тарыкъ экенни айтды.



 Юзюм тарлавда язбашгъы авлакъ ишлер.


Бизин мухбирибиз.