Сергей Меликов ва Юрий Трутнев социал-экономика масъалалагъа байлавлу генгеш оьтгерген

Сергей Меликов ва Юрий Трутнев социал-экономика  масъалалагъа байлавлу генгеш оьтгерген

Гетген жумагюн Россия Федерациясыны Председателини заместители, Президентни Йыракъ-Гюнтувуш федерал округдагъы толу ихтиярлы вакили Юрий Трутнев ва Дагъыстан Республиканы Башчысыны борчларын заманлыкъгъа кютеген Сергей Меликов Магьачкъалада республиканы социал-экономика ­оьсювюню масъалаларына багъышлангъан генгеш оьтгерген.

 

Бир башлап Юрий Трутнев Сергей Меликовну янгы иши булан къутлагъан ва: «Халкъны яшавун яхшылашдырывну ёлунда республиканы оьсювюн болдурувда онгайлы шартлар тувдурмакъ учун бу бек уллу инамлыкъ да дюр, имканлыкъ да дюр. Сергей Алимович шо ишде оьзюню бай сынавун къоллап масъалаланы асувлу кюйде чечмеге бажаражагъына инанаман», – деп билдирген.


РФ-ни Гьукуматыны Председателини заместители эсгерген кюйде, Дагъыс­тан – Россия Федерациясында стратегия маънасы булангъы субъект, Каспий денгизге къапулар. Темиркъазыкъ -Кавказ федерал округну халкъыны яртысына ювугъу Дагъыстанда яшай. Дагъыстанда тувагъан яшланы санаву Россиядагъы орта санавдан кёп, оьлегенлер аз. Экономика артдагъы йылларда оьсме башлагъан. Шону гертилигин гёрсетеген гьасиллер де бар.


Трутнев билдирген кюйде, респуб­ликада инвестиция программаланы яшавгъа чыгъарма онгайлы ер – Магьачкъала денгиз порту. Юрт хозяйство ва туризм тармакълар да республиканы оьсювюне мекенли къошумлар гелтирме бола. Ол ишчи сапар булан Каспийск, Магьачкъала шагьарларда «Уьйташ», «Дагполимер», «Каспийский завод стек­ловолокна» деген иш идараларында да болгъан.


Сергей Меликов оьзюню янындан РФ-ни Гьукуматыны Председателини заместителине ишчи сапар булан гелгени учун баракалла билдирген. Ол эсгерген кюйде, Дагъыстан федерал центрны кёмегине умут этип турма болмай, тек ону сынав ва имканлыкъларындан пайдаланажакъ.


Ол дагъы да эсгерген кюйде, регионну социал-экономика гьалын оьсдюрмек учун республикада бары да имканлыкълар бар. Россия Федерациясыны янындан гьай этив де – республика учун бек агьамиятлы ва пайдалы къуллукъ.

 

Набиюлла Магьамматов.