Милли опуракъ нени гьакъында айта

20 января 2021 в 19:34 52
Опуракъ ону гийген адамны гьакъында кёп затны билдирмеге бола. Бизде Дагъыстанда милли опуракъны этилишине гёре о къайсы миллетни вакили экенни, гьатта ол къайсы юртдан экенни де билмеге бола. Былтыр вакътилерде буса, адамны опурагъына къарап, ону оьмюр чагъын, жамиятдагъы гьалын ва моллугъун билмеге бола болгъан.

Дагъыстан – Россияны лап да кёп миллетли региону. Дагъыстанлыланы яшавуну ва маданиятыны, кёп тюрлю ва гёрюнюшлю опуракълары гьакъда айтаса да таманлыкъ этер.

Дагъыстан АССР-ни 100 йыллыгъына байлавлу байрам чараланы барышында Буйнакск районну школаларында бизин республикабызны халкъларыны милли опуракъларыны выставкасы оьтгерилди. Шо выставка район администрацияны яшёрюмлер сиясатына къарайгъан бёлюгюню ва билим берив управлениени къурувчулугъу булан оьтгерилди.

Бугюн милли опуракълар янгыз байрам чараларда яда буса спектакль салагъанда гийиле. Шону булан янаша оьтген выставкада ортакъчылыкъ этген охувчуланы кёплюгюн гьисапгъа алып, оьсюп гелеген яш наслу милли опуракъгъа тергев берегени сююндюрмей къоймайды.