Китап тахчагъа къошум

Китап тахчагъа къошум

Янгы китап басмадан чыкъгъанлыкъны, башгъаланы чы билмеймен, мен бир гёрмекли яда тархлы агьвалатгъа санайман. Гьалиги заман, гёресиз, ана тиллер тарып барагъан гьалланы: оьсюп гелеген наслу оьз тилин кёп сайдан тюгюл билмей. Таза ана тилде терен маъна салынып язылгъан макъалаланы, хабар булан назмуланы тюп маънасын табар чакъы оланы авадан кёбюню гьюнери де ёкъ. Сонг да, «ярыкъ бетли» яратывчулугъу булангъылар да бизин яш наслубузда кёп сийрек ёлугъагъан болгъан. Бар! Кёп бар язывчуман, наз­мучуман деп масаягъанлар. Китаплар чыгъарып оьз-оьзлерден къувана­гъанлар да ёкъ тюгюл.


Яратывчулукъну авур арбасына гёнгюллю кюйде егилип узакъдан берли язса да, китаплар чыгъармагъа алгъасамайгъанлар да бар. Зарият Умаева да – олайланы бириси. Ол яратывчулукъ булан школа чагъындан берли машгъул. Тек шонча заманлардан берли орта къалипдеги назму китабы Дагъыстан китап издательствосунда бу йыл болмай туруп чыкъмады. Тыш жылты китапгъа къоюлгъан атгъа гёре яман исбарланмагъан. Тек ичиндеги шиърулар бир-бирине тагъылып берилген. Гьариси онгача бетге сыйышдырылып берилген болгъан эди буса, исбатлы гёрюнер эди. Китапгъа редакторлукъ этивню жаваплы иши таман даражада тюгюл экени де эс этиле.


Бу ерде китапны есиси гьакъда бираз сама баянлыкъ бермесек, къы­йышмас. Шолай, З.Умаева Хасав­юрт районну Темиравул юртунда 1980-нчи йыл тувгъан. Ата юртундагъы орта школада охугъан. 2004-нчю йыл Дагъыстан пачалыкъ университетини орус-дагъыстан бёлюгюн битдирген. Ону шиърулары башгъа-башгъа заманлар гьар тюрлю газетлерде ва яш язывчуланы асарларыны жыйым китабында чыкъгъан.


Мен гьисап этеген кюйде, авторну гиччирек китабында охувчуланы хошуна гелер йимик хыйлы шиърулар бар. Оху­гъанлар ва адабият касбучулар огъар тюз багьа берсе, шаир къызыбызгъа гележекде дагъы да онглу назмулар яратмагъа болушлукъ этер деп эсиме геле.


 

З.Абдулла.