Янгы йылда биринчи оьтгерилген жыйында Къарабудагъгент районну башчысы Магьмут Амиралиев къысгъача оьтген йылны гьасиллерини ва 2023-нчю йыл гёз алгъа тутулгъан борчланы гьакъында да айтды.

Бугюнлерде районда 2 школа къурулуп тура. Бу йыл дагъы да 7-8 школа къурулма башланажакъ. Шолай да, яшлар бавларын ва «Ерли сиптечилик» деген милли программагъа гёре ёллар, парклар къурув да давам этилинежек.

Яшавлукъ-коммунал хозяйствогъа да тергев артажакъ, районда этилме герек ишлени арасына газ пайлайгъан 7 станцияны янгыртыв, ичеген сувну ва электрик токну масъалалары да чечилежек. Ишни мекенлешдирмек учун, юрт башчылар ва администрацияны жаваплы къуллукъчулары биригип ишлеме гереклиги гьакъда да айтылды.

–Инг де аслусу, шу ишлер адамланы яшавун яхшылашдырмакъ учун этиле, шону учун да гьар адам тапшурулгъан ишге намуслу янашма герек, – дей Магьмут Амиралиев. – Шондан къайры да, шо ишлер башлангъанда райондагъылар иш булан таъмин де этиле, демек, районну оьсдюрюв программасына аслам къошум да бола.