Ишин замангъа гёре кюйлей

4 апреля 2020 в 18:41 570


Дагъыстанда айлана якъдагъы талапланы гьисапгъа алып девюрню шартларында чалышагъан заводланы арасында ОАО ( ачыкъ кюйде иш гёреген акционер жамият) «Концерн КЭМЗ» (Къызлардагъы электромеханика завод) оборона промышлен-ностгъа ва шолай да къоллавчулар учун промышленный малланы гьар тюрлю жураларын артдырывгъа айрыча агьамият берип янаша десек гьакъыкъатгъа къыйышмай къалмас.


Белгили болгъан кююнде, эсгерилген завод 1962-нчи йылда къурулуш ишлер оьз болжаларында тамамланып пайдаландырывгъа берилген. Арадан оьтген вакътини ичинде заводну коллективи белгиленген планланы ва пачалыкъ тапшурувланы уьстюнлю кюйде яшавгъа чыгъармакъ учун юрюлеген гьаракатда борчларына бажарывлу кюйде янашгъан.


Тюзю, уьлкебиз бир жамиятдан оьзгесине гёчеген девюрде къызлар заводда ишлейгенлени санаву да белгили себеплеге гёре,уьч керен кемитилинген. Шогъар да къарамайлы мунда буссагьатгъы вакътиде ачыкъ кюйде иш гёреген акционер жамиятда 2 минге ювукъ оьр усталыгъы булангъы касбучулар ишлей.


Артдагъы йылларда заводда пачалыкъ тапшурувгъа гёре «Сухой» деген авиация холдинг компанияны ва шолай да самолётлар къурув булан машгъул болагъан «МИГ» россия авиация корпорацияны гьажатлары учун гьар тюрлю техника алатлар ва запас частлар гьазирленип чыгъарыла.


Заводну директору Ибрагьим Агьматов аянлашдырагъан кююнде, артдагъы йылларда янгы къураллар ясандырылып ишге салынгъан производсто бёлюклерде къоллавчуланы та­лапларын гьисапгъа алып халкъ учун ватандаш малланы чыгъарывгъа да тергев артып тербей.


Шолайлыкъда, заводда янгы иш ерлер болдурула ва гьар тюрлю бюджетлеге тёленеген налогланы оьлчевлери къолайлаша бара.


Бугюнлерде заводда айлана якъдагъы талапланы гьисапгъа алып гьар сменада 1 мингден къолай медицина маскалар чыгъарыла ва гьазиринде республикабызны районларына ва шагьарларына аптеклеге са­тывгъа бакъдырыла.


Заводда ишлейгенлер бугюнлерде медицина маскалар булан тегин таъмин этилине.


КЪ. КЪАРАЕВ.