Артдагъы йылларда гёнгюллю гьаракат (волонтёрское движение) арта бара. Уллу шагьарлардан оьтюп, олар юртларда да къурулгъан. Гьар не ишни де гьакъсыз этеген яшёрюмлени бёлюклери кёп инсаплы ишлер кюте.

Артдагъы йылны ичинде олар хас асгер гьаракатда ортакъчылыкъ этегенлеге йиберме тарыкъ-герекни жыйывда кёп къошум этгенни гьакъында да айтма герек. Шолай бёлюклер Буйнакск районда да бар, оланы инсаплы ишлери гьакъда да яза тургъанбыз.
Районну башчысы Абидин Къарчыгъаев шо бёлюклени ёлбашчылары ва ортакъчылары булан ёлугъув оьтгерди, оланы рагьмулукъ ишине оьр багьа берди.

–Сизин ишигиз гьалиги вакътиде инг де тарыкълы деп ойлайман, неге тюгюл де сиз шо ишлени юрегигиз булан сююп этесиз, – дей А. Къарчыгъаев. – Барыгъызгъа да ишигизни юрютеген саялы баракалламны билдирме сюемен, ишлеригизни ярыгъы ва сизин юрек­леригизни иссилиги шо тарыкълагъа уллу кёмек экенни де айтма сюемен. Гёнгюллю гьаракат – инг де яхшы хасият.

Жыйынны ахырында яшлагъа баракалла кагъызлар ва гьюрметлев грамоталар берилди.