Арбагюн Дагъыстанны Халкъ Жыйыныны депутатларыны бир гюбю республикада коронавирус аврув нагагь яйылса, медицина якъдан кёмеклер этивге гьазирлиги нечик экенни билмек муратда бир нече азарханалардан айланып чыкъгъан.
Парламентни спикери Хизри Шихсайитов оьзюн узатагъан жаваплы къуллукъчулар булан бирче Магьачкъаладагъы диагностика центргъа баргъан. Неге тюгюл, коронавирусну ахтарагъан хас диагностика лаборатория шонда ерлешген. Артда олар сапарын Дагъыстан медицина центрына, «Скорый помощну» диспетчер къуллугъуна, ветеранланы госпиталыны поликлиникасына узатгъанлар. Дагъыстанны савлукъ сакълавгъа къарайгъан министри Жамалутдин Гьажиибрагьимов республикада дагъы да хас уьч лаборатория барны англатгъан. Шолар югъагъан аврувланы республика центрында, чумагъа къаршы чаралар гёреген станцияда ва адамланы аманлыгъын болдурувгъа къарайгъан тармакъны республика къурумунда ачылгъан.
Министр берген баянлыкъгъа гёре, шагьардагъы поликлиникаланы медицина къуллукъчуларын коронавирусдан зараллангъанланы аврувун багъывгъа гёре хас уьйретив дарслар да юрюлген. Сонг да, шо аврув нечик башланагъанын исбатлайгъан аламатланы нечик эс этмеге болагъаны гьакъда халкъгъа англатывлар ва буварывлар бериле.
Хизри Шихсайитов аврув нечик билинегенин ва аврувну аламатлары эс этилгенде инг башлап не этме тарыкъ экенни адамлагъа токътавсуз гьалда баянлыкълар бере турмакъны кёп агьамияты бар экенни эсгерген.
Халкъ Жыйыныны аппаратыны маълумат бёлюгю.
