Районгъа – 85 йыл


      Январны 23-нде Къаягент ра­йон къурулгъанлы 85 йыл битди. Бир нече гюн алда Къаягент муниципал къурулувуну администрациясыны залында шо агьвалатгъа байлавлу жыйын болду. Жыйынны ортакъчылары байрам чаралар оьтгермекни гюзге гёчюрдю.


Жыйында башлап Россияны Президенти В.Путин Россияны Федерал Жыйынына Чакъырывунда эсгерилеген масъалаланы яшавгъа чыгъарывну ёллары арагъа салынып ойлашылды ва белгиленди. Районну охутув ва билим берив управлениесини ёлбашчысы М. Рашитов, Къаягент район больницаны баш врачыны заместители М.Къамболатов Ча­къырывну агьамиятлыгъын айрыча эсгерип, коллективлерде нечик ишлер оьтгерилегени гьакъда къысгъача хабарладылар.



Жыйында къаралгъан экинчи масъалагъа гёре депутатланы Къаягент район жыйыныны председатели М. Багьамаев оьтген 85 йылны ичинде Къаягент районну тарихинде болгъан гьар тюрлю агьвалатлагъа къыймат берди.


Районда шо йылларда 8 къумукъ юрт болгъан. Давну алдындагъы 5–6 йылны ичинде районну халкъ хозяйствосуну кюрчюсю салынгъан. Юрт хозяйство тармакъгъа аслу тергев бакъдырылгъан. Къаягент райондан фронтгъа 2634 адам чакъырылгъан. Шолардан 1634 адам, яртысындан да кёбюсю дав майданларындан къайтмагъан.


Давдан сонггъу йылларда районну экономикасы чалт гётерилмеге башлагъан. Колхозланы орнуна совхозлар къурулгъан, касбучулар гьазирленген. Юзюмчюлюкге, авлакъчылыкъгъа аслу тергев бакъдырылгъан. 5 чагъыр завод къурулгъан. Юзюмчюлеге кёмекге бир нече тав юртлар Къаягент районгъа гёчюрюлген. 70-80-нчи йылларда Къаягент район республикада алдынлы районланы арасында юрюй болгъан.


Етишген уьстюнлюклер гьакъда да айта туруп, М.Багьамаев жыйылгъанланы гележекде дагъы да къайратлы загьмат тёкмеге чакъырды.

Авторизация
*
*
Регистрация
*
*
*
Согласны с условиями сайта?
Генерация пароля