Ачыкъ лакъыр болду


      Артдагъы йылларда респуб­ликада ва ону шагьарларында, районларында къурулгъан жамият палаталар жамият къурумланы арасында гёрмекли ер тута. Оланы гьаракаты шагьар округланы, муниципал къурулувланы гьакимбашлары, халкъ булан юрютеген ишлер, сонг да халкъны ва ерли гьакимликни аралыкъларын кюйлешдирив булан тыгъыс байлавлу.



Январны 29-нда Къаягент муниципал къурулувуну администрациясыны жыйынлар оьтгерилеген залында жамият палатаны гезикли жыйыны болду. Шонда 3 масъалагъа къаралды. Биринчи масъалагъа гёре район жамият палатаны председатели И.Арсланов жамият палата 2019-нчу йылда оьтгерген ишлерини гьакъында доклад этди. Ол бир башлап Россиядагъы, респуб­ликадагъы жамият-политика гьалны къыйматлады. Россияны Президенти В.Путинни Федерал Жыйынгъа Чакъырывуну агьамиятын айтды, шоланы яшавгъа чыгъармакъ муратда не йимик ишлер этилежегин билдирди.


Уллу Уьстюнлюкню 75 йыллыгъына байлавлу ишлер тезден юрюлегени ва олар гюн сайын жанланагъаны гьакъында эсгерди.


Докладгъа гёре сёйлевлерде жамият палатаны членлери Ж.Жамалутдинов, М.Ибрагьимов, Н.Къазанатов, З.Агьмадиев ва оьзгелери ортакъчылыкъ этдилер. Жыйында болгъан докладда, сёйлевлерде аслу гьалда топуракъ масъалалар, районну юртларында халкъны сув булан таъмин этив, юртланы ичинде жыйылагъан насланы белгиленген ерлеге етишдирив ишлер нечик этилегени гьакъда ачыкъ сёйлевлер болду.


Жыйында ортакъчылыкъ этген Къаягент район жыйынны председатели М.Багьамаев, муниципал къурулувуну башчысыны борчларын кютеген Д.Алациев жыйынны ортакъчылары гётерген бары да соравлагъа къулакъасып тынгладылар. М.Ибрагьимовну касбучуланы гьазирлевге, Ж.Жамалутдиновну ёлланы ­онгарывгъа, З.Залкеповну газлар тартыв масъалаланы чечиливюне багъышлангъан соравларына районну ёлбашчылары толу жавап бердилер.


Республиканы оьзге шагьарларында, районларында йимик, Къаягент райондагъы жамият палатагъа да гьаракатчы адамлар сайлангъан. Бугюн оланы сёзю, таклифлери районну гьакимбашларына, халкъ булангъы аралыкъланы ёрукълашдырывда юрюлеген ишлени сан янын болдурувда бек тарыкълы. 2020-нчы йылда районда оьтгерилежек сайлавлар, Уллу Уьстюнлюкню 75 йыллыгъын къаршылав гьакъда да район гьакимбашларыны ва жамият палатаны яшавда бай сынав топлагъан касбучуларыны арасында пайдалы сёз болду. Масъалаланы уллу агьамиятын англагъан эки де якъ биригип, гележекде дагъы да бек сыкълашып ишлежегин билдирди.


Жыйында арагъа салынып ойлашылгъан бары да масъалалагъа гёре тийишли къарарлар къабул этилди.

 

Авторизация
*
*
Регистрация
*
*
*
Согласны с условиями сайта?
Генерация пароля