Маълуматлар

Январ айны 8-нде Хасавюртда кёп къабатлы уьйлени подвалында газ атылгъан. Атылывну натижасында уьйлени биринчи къабатындагъы уьч там чёкген. Бары да квартирлердеги терезелени шишалары увалгъан. Насипге, оьлгенлер ёкъ. Беш адам зараллангъан. 23 йыллыкъ яшгъа токътагъан къатынгишиге ва ону уьч йыллыкъ къызына азарханагъа ятмагъа тюшген. Врачлар айтагъан кюйде, гьали оланы яшавуна къоркъунчлукъ ёкъ. Бу уьйде турагъанлар подвалдан гелеген газ ийисге тезден берли кант эте болгъан. Тек тийишли тергевлени оьтгерме борчлу къурум тувра борчларына немкъорай янашгъан. Амма бу гезик жаваплыкъдан баш къачырма бажарылмас. Россияны Ахтарыв комитетини Дагъыстан ахтарыв управлениеси ОАО «Даггаз» районара къурумну башчысына къаршы уголовный иш ачгъан. Ол тутулгъан. Бузулгъан уьйлерде турагъан агьлюлер заманлыкъгъа къонакъюйде ерлешдирилген. Уьйню гьалын хас касбучулар тергеген сонг, ярашдырыв ишлер башланажакъ.

Январ айны 5-нде, ахшам вакъти, Магьачкъалада М.Гьажиевни атындагъы орамда болгъан ёл хатабалагьда Дагъыстанны алдагъы премьер-министри Магьаммат Абдуллаев оьлген. Бек чалт гелеген «Нива» къарангы орамда ёлдан чыкъма къарайгъан адамны эс этмеген ва уруп йыкъгъан. М. Абдуллаевни авур гьалында алгъасавлу кюйде азарханагъа етишдиргенлер, тек врачлар нечакъы къаст этсе де, оьлюмден къутгъарып болмагъан. Магьаммат Абдуллаев 1961-нчи йылда Гуниб районну Гамсутль юртунда тувгъан. Ерли орта школаны тамамлагъан сонг, Дагъыстан пачалыкъ университетни юридический факультетине охума тюшген. Оьр билим алгъандан берли, яшавун илму ва педагогика чалышывгъа багъышлагъан. Ол юрист илмуланы доктору, профессор. Бир вакъти Россияны Санкт-Петербургдагъы ч ишлер министерлигини университетинде кафедраны заведующийи болуп ишлеген. Шо йылларда уьлкени темиркъазыкъ тахшагьарында Дмитрий Медведев булан таныш болгъан ва къурдаш аралыкълар юрютген. 2010-нчу йылда Дагъыстанны Гьукуматыны Башчысы этилип белгиленген. Артдагъы вакътилерде Дагъыс­тан пачалыкъ педагогика университетни ректоруну борчларын кюте эди. РФ-ни Аманлыкъ советини председателини заместители Д.Медведев Магьаммат Абдуллаевни чакъсыз гечинивюне байлавлу ону агьлюсюне, дос-къардашына къайгъырышгъан.

Экономикада бираз къытлыкъ бар экенине де къарамай, Дагъыс­танны хыйлы школаларында яйда адатлангъаны йимик, уллу ва гиччи оьлчевлерде ярашдырыв ишлер башлангъан. Буйнакск шагьарны алгъанда кёбюсю школаларда уллу ремонт ишлер ёругъу булан юрюлюп тура. Алдындагъы гюн шагьарны баш гьакими оьзю шолай школалардан айланып чыкъды, ишлени гьалын тергеди. Ёлугъувланы бирисинде баянлыкъ бере туруп, ол школалардагъы ярашдырыв, онгарыв ишлер янгы охув йыл башлангъынча толу ва сан янлы кюйде кютюлежекни билдирди. Буйнакск «Шагьардагъы ба­гъый­лы туруш шартлар» деген программагъа къошулма амал этмеге бажаргъан. И. Нургъудаев эсгерилген федерал программаны яшавгъа чыгъармакъ муратда не йимик чаралар гёрюлюп турагъа­нын да оьз гёзлери булан гёрдю. Шоланы бирисинде, демек, яшавлукъ уьйлени алдын къуршап ерлешген абзарда башлапгъы гьазирлик ишлер юрюлюп турагъан­ кюйге къарады. Буссагьат бир вакътилер оьзбашына ишленген увакъ-тюек къурулушланы ва гаражланы бузуп тайдырывну ва тазалавну барышы яман тюгюл. Бу масъаланы чечивде оьз пайдасын ойлашып, ишлеме пуршав этеген ёлдашлар да къаршылаша. Шагьарны башчысы ва тийишли идараланы къуллукъчулары олар булан гьакълашыв лакъыр этип, бу ерде жамиятны онгайына арив исбарлыкълар болажагъын англатдылар. Гертиден де, мунда гиччи оьлчевлю ва эки яны бийик гётерилип бегилген футбол майданчалар, адамлагъа олтурмагъа, ял алмагъа ерлер ва гьалиги архитектура къалипдеги дагъы да башгъа арив затлар болса яманмы дагъы!? Тюзюн айтмагъа тюше, артдагъы йылланы ичинде шагьарны хыйлы орамлары, сокъмакълары, гезев бавларыны ичлери ким де рази болар йимик багъыйлы болгъан. И. Нургъудаев малим этгени йимик, шагьарны гьар-бир ерин гезик булан арив исбарламакъ учунгъу къаст гёрювлер токъталмажакъ. «Аманлыгъы булангъы сан ян­лы ёллар» деген программаны яхшылыгъындан узун мезгилде нечесе ёллар, орамлар кюю булан онгарылып битген. Шо ишлер гьали де юрюле. Шогъар асасланып, ювукъ заманны ичинде Барият Муратованы атындагъы орам да гьалиги замангъа гёре арив этилежек… Уллу гезев бав алдан берли де шагьарны безейген ер эди. Кёп заман тийишли къаравдан магьрюм къалып, о арт вакъти онгсузлаша бара эди. Гьали «Россияны гиччи шагьарлары» деген федерал программагъа къошулмагъа бажаргъаны саялы, нечик де шагьар бавну янгыртып, алдындан да гёзел этивге гиришгенлер. Эсгерилген шагьар бавну безевге, ярашдырывгъа, къурувгъа 88,5 миллион манат харжланажакъ. Абдулла ЗАЛИМХАНОВ. СУРАТДА: Буйнакск шагьарны башчысы И. Нургъудаев абзары гёзеллешдирилеген уьйлерде яшайгъанлар булан лакъыр этеген вакъти. Автор чыгъаргъан сурат