Язывчу, тарих илмуланы доктору Пётр Алёшкин «Наша молодёжь» деген киностудияны къуллукъчулары булан «Работайте, братья» деген чебер фильм чыгъарма деп гёз алгъа тутгъан. Болажакъ кино Россияны Игити Магьаммат Нурбагьандовгъа багъышлана. О гьакъда февраль айны 6-сында Дагъыстанны журналистлерини союзунда прес-конференция оьтгерилди. Кино чыгъарма сюегенлер журналистлер булан ёлукъду.
Ёлугъувда кино-сценарийни язгъанлардан бириси Пётр Алёшкин билдирген кюйде, кино чыгъармакъ учун 60 миллион манат харж жыйылма тарыкъ. Ону 2 миллиону гьазирлик ишлеге гете. Актёрлар кёбюсю гьалда бизин республикадан болажакъ. Ерли театрланы артистлерини къыйышагъанлары чакъырылажакъ.
Жыйылажакъ харж оьзлер сююп къол узатагъанлардан къаравуллана. Оланы айрыча «спонсору» ёкъ. Гьар ким болагъан чакъы бергенни сюе. Болажакъ кинону сценарийин интернет байлавлукъдан таба тапма имканлыкъ бар.
«Наша молодёжь» деген киностудия 2013-нчю йыл къурулгъан. Аслу гьалда олар экрандагъы игитини хасиятларында жагьил адам оьзгелеге де уьлгю болар йимик келпетлер ярата.
Кино чыгъарма сюегенлер де ойлашагъан кюйде, дагъыстанлы полицейский Магьаммат Нюрбагьандов шолай адам болгъан. Ол оьлюмюню алдында айтгъан сёзлер де бек таъсирли ва яш наслуну патриот ругьда тарбияламакъ учун маъна янындан бай.
Гертиден де, болажакъ кино– террорчулукъгъа ва экстремизмге къаршы ябушгъан ихтиярлар якълав къурумланы къуллукъчуларыны эсделигине де умпагьатлы иш. Дагъыстан Республикада гьар тюрлю къоччакълыкълары учун Россияны Игити деген атгъа ес болгъанлар 35 адам бар. Оланы 8-вю сав.
