Бек анасы йыламас деген кюйде, айлана ягъыбызда от тюшювлени алдын алывну низамына, салынгъан талаплагъа арт бермейли, жаваплы кюйде янашмасакъ бажарылмай. Болма имканлы хатабалагьланы алдын алма имканлыкъ береген агьамиятлы чаралар яшавда кёп бар. Шоланы барлыгъындан пайдаланып, борчларыбызгъа намуслу кюйде янашсакъ, бизге де тас этивлерден сакъланмагъа бажарыла.

Бугюнлерде оьтгерилген прес-конференция да ­шолай агьамиятлы масъалагъа багъышлангъан эди.
– Бетеринден Аллагь сакъласын, – деп башлады оьзюню баянын Россияны къыставуллу гьалланы алдын алыв булан машгъул болагъан министерлигини башчысыны заместители, от тюшювлени алдын алыв управлениесини начальниги полковник Элдар Хамавов. – Бу йылны арадан оьтген вакътисини ичинде бизин республикабызда 1500-ге ювукъ от тюшювлер болгъан. Шоланы тенг яртысы адамлар яшайгъан яшавлукъ уьйлерде болгъаны гьакъда да айрыча эсгермеге тюше. Неге десегиз, ялынны ичинде уьйлерде 14 уллуланы ва яшланы жаны ­къыйылгъан, малы-мюлкю яллап кюлге дёнгени де теренден ойлашмагъа борчлу эте.
Элдар Гьюсейновични къысгъаракъ баянындан сонг республикабызны маълумат къуралларыны къуллукъчулары огъар кёп къадарда соравлар берди.

 – Элдар Гьюсейнович, аслу гьалда, сиз ойлашагъан кюйде, от тюшювлер не йимик себеп­лерден тувулуна, сынав нени ­аянлашдырагъаны гьакъда айтмагъа бажарыламы?

 – Белгили болгъан кюйде, от тюшювлени ­себеплери де башгъа-башгъа. От тюшювлер адамланы ­гьайсызлыгъындан да болма имканлы, бизден гьасил тюгюл табии балагьлардан да тувулуна. Ялын биревню де къызгъанмай. Озокъда, шону алдын алмакъ учун ерлерде англатыв ишлени генг кюйде оьтгермесек бажарылмай. Тек не этерсен, шогъар да къарамайлы, от тюшювлеге ёл берилегени ичингбушдура. От тюшювлени алдын алмакъ учун ти- йишли гьазирлик гёрмеге герек бола. Артдагъы йылларда агъач байлыкъларыбыз да от тюшювлерден уллу заралгъа тарый. Уьлкебизни оьзге бойларында йимик, Дагъыстанда да агъачараларда от тюшювлеге ёл бериле. Тюзю, Дагъыс­танны чет тав шартларында яллайгъан ерлени сёндюрмек учун къолланагъан хас техника толу кюйде етишмей. Айтмагъа сюегеним, авиацияны кёмеги етишмейгени саялы да зарал кёп бола.
Шо гьакъда айта туруп, Э.Хамавов айлана якъдагъы авлакъланы, табии байлыкъ­ларыбызны къорувну, яшав­лукъ ва производство би­наларда табии газ ягъарлыкъ­ны, электрик токну ишлетивню низамына гьюрмет булан янашма тюшегени гьакъда да айрыча буварыв этди.
Сонг да, ахырында от тюшювлени алдын алывда къурулушларда низам болдурув да агьамиятлы масъала экени гьакъда айрыча айтды.

Къ. КЪАРАЕВ.