Муаллимни касбусу гьалиги девюрде лап къыйынларындан бириси санала. Неге тюгюл, дарс бермек учун алда алынгъан билимлер булан дазуланып къалмай, гьар гюн дегенлей сынавну артдырып турмагъа тюше. Компьютер технологияланы билмеге герексен, дагъы ёгъесе, билим беривде пачалыкъ гесимлерине гёре ишлемеге бажарылмай. Шогъар гёре де гьар муаллим билимлерин толумлашдырып, дарсларын къужурлу оьтгермеге къаст эте.
Бугюн мен гьар дарсында бир янгы къайданы къоллап иш гёреген, охувчулар сююне туруп дарсларына барагъан муаллим Юлдузат Юнусовна Сабанчиеваны гьакъында эсгермеге сюемен.
Ол 1954-нчю йылда Бабаюрт районну Адил Янгыюртунда тувгъан. Ата юртундагъы школаны сегиз класын битдирип, 1969-нчу йылда Хасавюртдагъы педагогика училищеге охумагъа тюше. 1973-нчю йылда эсгерилген охув ожакъны тамамлап, школада муаллим болуп загьмат ёлун башлай. 1977-нчи йыл ол Бабаюртдагъы бир номерли орта школада дёрт йыл ишлеген сонг, уьч номерли орта школагъа чыгъа ва бугюнлеге ерли де шонда загьмат ёлун узата.
Оьзюню ишинде Юлдузат Юнусовна бары да янгы технологияланы къоллай. Ол яш муаллимлени насигьатчысы да дюр. Ю. Сабанчиеваны дарсюрютеген гьюнерлигинден ва бажарывлугъундан пайдаланмагъа сююп, яш муаллимлер ону дарсларына кёп геле. Юлдузат 30 йылны узагъында башлапгъы класлагъа дарс береген муаллимлени методисти де дюр. Ол гьар заман район оьлчевде юрюлеген жыйынларда, муаллимлени генгешлеринде чыгъып сёйлей, дарс юрютюв сынавун оьзгелеге де малим этмек муратда ачыкъ дарслар ва оьзюню класы булан «Касбуланы дюньясында» деген темагъа гёре проект ишлер де юрюте. Яшланы тюз ёлларда тарбияламакъ муратда Юлдузат Юнусовна школадагъы психолог ва социолог булан да иш гёре.
Ону охувчулары да оьтесиз кёп сюе, оланы ата-анасы да огъар гьюрмет эте. Оьзлени яшларын шолай пагьмулу, оьз ишин кёп сюеген муаллим охутагъангъа огъар бек рази болагъандан къайры да, гьакъ юрекден баракалласын билдирелер.
Ю. Сабанчиеваны охувчуларыны арасында илмуну оьр канзилерине етишгенлери кёп бар. Арадан нечакъы заман гетсе де, олар оьзлени биринчи муаллимин унутмайлар, гёрмеге гелип, гёнгюн алалар. Юлдузат Юнусовнаны загьматы школаны, район администрацияны ва республиканы янындан да кёп керенлер белгиленген. Ол «Дагъыстан Республиканы билим беривюню отличниги» деген атгъа, гьюрметли грамоталагъа да ес болгъан. Бу бары да савгъатлар ону оьз ишин бажарагъанын, яшланы гёнгюндегин гёзюне къарап билеген герти муаллим экенин исбатлай.
Ю. Сабанчиева пагьмулу муаллимден къайры да, кёп сюеген ва сюювюн яшларына толу кюйде берип бажарагъан ана да дюр. Ону уьч авлети тюз ёлларда тарбияланып, оьр билимлер алгъан. Оланы бириси анасыны ёлун танглап, муаллим касбугъа ес болгъан Юлдузат Юнусовна бек асил уллана да дюр.
Гёзел ГЬАСАНОВА.
Бабаюрт.
СУРАТДА: Ю. САБАНЧИЕВА.
