Словенияны тахшагьары Люблянада биринчи межит ачылгъан. Мунда межит къурмагъа сюегени гьакъда 50 йыл алъякъда билдирилген болгъан. Тек ислам динге къаршы тайпалар этеген къысас маъналы макюрлер ва харж булангъы булгъавурлар саялы, межитни къурмагъа бажарылмай тургъан. Шогъар харжны Катар уьлкеси гёрсетгенге яман къастлылар бютюнлей къаршы болгъан. Олар кёп йыл бою не пуршавлукъ да этип тургъанлар.

 

Словениядагъы бусурманланы жамиятыны башын тутгъан муфти Нажад Грабус: «Межит ачылгъан мюгьлетден тутуп, бизин яшавубузну барышы башгъачалай айланды», – деп билдирген. Ол малим этген маълуматлагъа гёре, 2013-нчю йыл къурулмагъа башлагъан шо межитни ишлеп битмеге 34 миллион евро харжлангъан. Шону 28 миллионун Катар уьлкеси шабагьат гьисапда берген. Межитни ичинде 1400 адамгъа ер бар. О алты тюрлю бинадан къурашгъан ва ислам маданият центрны оьзеги де дюр. Минмарасыны бийиклиги 40 метр геле.

2002-нчи йыл болгъан гьисап алывланы натижалары гёрсетегени йимик, савлай Словенияны 2 миллионлукъ халкъыны 2,5 проценти – бусурманлар. Демек, олар Словения элиндеги дин тарапланы санав якъдан алгъанда, 2-нчиси болуп токътай. Н.Грабус токъташдырагъан кюйде, буссагьат ислам динни юрютегенлени санаву, азындан, 80 мингге тармаша.

 

Маълуматлар Интернетден алынгъан.