«Уллу тереклер авса, бала тереклер янчылар» — дейген айтыв йимик, къумукъ тюзню танг уланы, эревюллю эрени, оьздени, асхар тавгъа, анадолгъа тенг гелеген янгыюртлу, Москвада къумукъ «оьзден» — гьаракатны жагь-жигерли ортакъчысы, болатдай яш улан Болат Кочкарёв 50-йылындан оьтюп, ала-саладан, бир мюгьлетден, яшмын йимик яшынды, Къумукъ тюзню марипатын бошагъандай арабыздан яшмындай болуп гетип къалды. Олай гьакъыллы, тавакаллы, халкъы учун, Зайналабит Батырмурзаев йимик къоччакъ къайратлы уланлар он мингден бир бола. Болат да шолай улан эди.
Тухумуна, дос-къардашына ва бирге иш гёрген Москвадагъы ёлдашларына яхсайлы шаирни маслагьат шиърусу.
АСИЛ ОЬЛЮМ
Тазиятда Хазар элим, къумукътюз,
Талчыкъ тюшген, Янгыюртгъа, Яхсайгъа.
Яшмын йимик яшынгъангъа ярыкъ юз,
Таныгъандан тавуш чыгъа гьарангъа.
Чыкъмаймы да? Янгыюртлу оьзденни,
Къысмат ёлу бир мюгьлетден къыркъылса.
Къайгъыгъа тенг, шере суву оьзенни,
Къумукъ халкъны умутлары йырылса.
Сув ташыса авагъандай ярлары,
Асхар тавда болду бирден алаша.
Болат гетип, уьзюлгендей къыллары,
Гьасси халкъны юреклери талаша.
Талашмаймы? Зайналабит Батыргъа,
Тенг гелеген, танг уландан айырса.
Тюрк тамурну Хазар булан байлангъан,
Хыялларын, харап этип майырса.
Эллий йылдан оьтюп, узакъ гетмейли,
Юрек аврув, ягьлыланы яндырды.
Ял тапмагъан гьар гюн намус кютмейли,
Ойларында къара ерге басдырды.
Дюнья Конгресс, жыйынларда болгъан сонг,
Яш боюна эл намусну салгъан сонг.
Булай эрен Тангчолпангъа тенг геле,
«Данко» йимик Халкъы учун янгъан сонг.
Гёз болгъандай, къатты языв къысматы,
Бу жагьилни айландырды сынташгъа.
Токътап къалды къумукъ къургъан сагьаты,
Сююнчлени айландырып гёзъяшгъа.
Къайгъыланы Аллагь тавгъа бергенде,
Тав увалып, сонг адамгъа бергендей.
Бу яшавну агьлы-зарлы арбасы,
Яхшыланы алда алма гелгендей.
Саяв, ачыкъ, бек гелишли болса да,
Асил оьлюм салды къара ерлеге.
Бизге Болат Игит болуп къалса да,
Зая эди, басдырмагъа кёрлеге.
Огь, не къыйын артдан къарап къалгъангъа,
Тухумуна, агьлюсюне, яшлагъа.
Маслагьатды, яшлай эрте гетгенлер,
Яшай буса кёкде, ошап къушлагъа.
Яхшылагъа, яда чакъсыз гетгенге,
Инибизни гёмген йимик гюемен.
Къайгъыланы ёкъгъа ювукъ-йырагъы,
Сабур этме шиъру язма сюемен.
Болат йимик улан гетсе айрокъ да,
Къолдан тюшген савут йимик сынаман.
Анадолгъа, Асхар тавгъа тенглеге,
Отдан гёлек гийип, ичден янаман.
Огь, сен Болат, эпсиз эрте гетсенг де,
Яшажакъсан, Москвада баш кюйде.
Эсделигинг юлдузлардай лансыллап,
Къалдынг халкъгъа даимликге яш кюйде.
Адил Бийтемиров.
Сентябр 2022 й.
