Къайгъырыш

А.Ж. УМАЛАТОВ Июн айны 21-нде, 95 йыллыкъ чагъында, Дагъыстанны пачалыкъ ва жамият-политика чалышывчусу Алипаша Жалалович Умалатов дюньядан гетди. Алипаша Жа­лалович ДАССР-ни Темирхан-Шура округуну Къа­ра­будагъгент юртунда 1927-нчи йыл 1-нчи майда сабанчы агьлюде тувгъан. Оьзюне он йыл болагъанда ол атасыз къала ва ишлеме борчлу бола. Гьар тюрлю тармакъларда ишлей туруп ол оьзюню гьаракатчылыгъы, яшав масъалаланы чечивде активлиги, алдына салгъан борчланы кютювде мекенлилиги булан оьр даражалагъа етишме болгъан. Колхозда ишлей туруп, башлап Хасавюрт районну Яхсай юртунда колхозну председатели болуп чалышгъан. Къарабудагъгент районну прокурору, артда партияны райкомуну экинчи ва биринчи секретары болуп ишлеген. Оьзюн англавлу, билимли касбучу гьисапда, къурумчулукъ якъдан оьр даражада бажарывлугъу бар адам гьисапда танытгъан. Аслу гьалда ону англавлугъу, бажарывлугъу ДАССР-ни Министрлер Советини Председатели болуп ишлейгенде белгили болгъан. Ону ёлбашчылыгъы булан экономика ва яшавлукъ тармакъда уьстюнлюклер болдурулгъан. Юрт хозяйство, промышленность ва оьзге тармакъланы оьсювю артгъан. 1978-нчи йылда ол ДАССР-ни Оьр Советини Президиумуну Председатели болуп салынгъан. Алипаша Жалалович республиканы законларыны оьсювюне болушлукъ этген, бизин уьлкени халкъларыны дос аралыкъларын болдурмакъ ва оьсдюрмек учунгъу гьаракаты гёрмекли. Ону чалышывуна пачалыкъны янындан да яхшы багьа берилген. Ол Октябр Инкъылап, Загьмат Къызыл Байракъны 3 керен, Дослукъ ва «Дагъыстан Республиканы алдында этген къуллукълары учун» деген орденлер булан савгъатлангъан. Уллу гьаким къуллукъларда ишлей туруп, ол сабур, саламат, рагьмулу адам болуп яшагъан. Пенсиягъа чыкъгъан сонг да А.Ж.Умалатов республиканы пачалыкъ, жамият-политика яшавунда актив кюйде ортакъчылыкъ этип юрюген. 1998-нчи йылдан башлап, республиканы Пачалыкъ Советини, сонг да ДР-ни Президентини янындагъы Тамазаланы советини ёлбашчысы болуп чалышып тургъан. Ахырынчы гюнлерине ерли Алипаша Жалалович оьзюню бай яшав сынавун, билимин оьзгелеге берме къаст этген, кёп санавда китаплар язгъан. А.Ж.Умалатовну биографиясын республикабызны тарихи йимик охума бола. Ону къысматын Дагъыстанны къысматындан айырма бажарылмай. Оьр даражада пагьмулу ва билимли Алипаша Жалалович бизин республиканы оьсювю ва ярыкъ гележеги учун яшады. Ону ярыкъ эсделиги дагъыстанлыланы юрек­леринде даимге къалажакъ. С.А.Меликов, З.А.Аскендеров, А.М.Абдулмуслимов, М-С.Б.Магьамматов, А.П.Гьасанов, Ю.А.Левицкий, Р.А.Алиев, М.Л.Мажонц, Н.М.Омаров, С.С.Агьматов, К.М.Давдиев, Н.Ш.Абдулмуталибов, Р.К.Къазимагьамматов, Р.Д.Жапаров, М.Н.Къазиев, М.П.Телякъавов, С.Д.Мирошкин, С.К. Дадаев, М.Г.Амиралиев.

Хапарсыздан гелген къайгъылы хабар юрек тамурланы къысды, ачытдырды. Оьте саламатлыгъы булангъы пагьмулу шаирибиз, Костекли Муса Шихавов арабыздан гетди. Гьар кимге оьмюр оьлчевлю бериле деп айталар. Муса къумукъ поэзияда унутулмас оьз хатын къойду, драматургия ва проза асарлар язды. Яшавда болагъан кемчиликлеге юреги авруй эди, намусну-ягьны азып барагъанына къыйнала эди. 2012-нчи йыл "Ёлдаш"газетде чыкъгъан баянлыгъында ол: "Йырчы Къазакъда айтгъанлай, "заманлар алышынгъанны сюебиз". Алышынмаса кюй ёкъ деген эди. Пагьмулу адамыбыз гетгени къумукъ адабият учун уллу тас этив. Агьлюсюне, дос-къардашына теренден къайгъырышагьаныбызны билдиребиз. Женнет агьлю болсун. Аллагь рагьмат этсин. "Ёлдашны" коллективи.