Юртну къарты, давну нарты

7 февраля 2020 в 16:09 149
Юртну къарты, давну нарты

        Бу йыл дав битгенли 75 йыл тамамланагъанын белгилемек учун савлай уьлкебизде алданокъ гьазирлик ишлер юрюлюп тура. Шоланы барысыны да гьакъында айтмагъанда, янгыз оьтген йылны ноябр айыны 29-дан башлап Россияда юбилей акъчалар ва медаллар печат этилмеге башлангъан ва шо медаллар эсделик учун гьар ватандашгъа гьавайын уьлешинежек деп де билдирилгени тамаша арив чалына.


Бу ерде мен эсгерме сюеген аслу зат – Уллу Ватан дав битгенли арадан хыйлы заман оьтген. О агьвалат узакъларда къалгъан сайын, давну ортакъчыларыны сыдыралары да сийреклешегенин къызгъанасан.


Бизин халкъны арасында Уллу Ватан давну йылларында тувра ябушувланы ортакъчылары болмаса да, загьмат фронтда дазусуз кюйде къайратлыкъ гёрсетип, элини атын сав дюньягъа малим этген уланлар ва тиштайпалар аз болмагъан. Шо гёзден къарап, бугюн де, башгъа тюгюл, ол адам гечинген буса да, сав буса да, олайланы абурун-гьюрметин этип, унутмай эсгермек адамлыкъ да дюр, борч да дюр. Эр намусу сыналагъан заманда «ат ерлеп» дегенлей душмангъа къаршы ябушма гетгенлени арасында къаранайавуллу Алимирза Исаевич Исаев де бар. Ол районда – Уллу Ватан давну ветеранларыны сав къалгъанларыны биргине бири.


Алда ону гьакъында кёп керенлер язылгъан буса да, бу гезик де атын тутуп сыйламай къойма болмайман. Неге тюгюл, А. Исаевни дав ёллары оьжетли Сталинград ябушувларда башлангъан. 2-нчи февраль – Сталинград ябушувларда совет асгерлер немис-фашистлени дагъытгъан гюню (1943 й.) экени себеп болуп ону асгер ёлларын аз-аз сама суратламакъны маънасы бар деп гьисап этемен.


Сталинград шагьарны немис-фашистлерден тазалавда ва ону айланасында душманны белгили уллу группировкасын къолгъа алывда Алимирза агъав да актив кюйде ортакъчылыкъ этген. Шо вакъти ол 3-нчю Украина фронтну 57-нчи армиясыны 110-нчу атышывчу гвардия дивизиясында дав этип башласа да, сонггъа таба буйрукълагъа гёре къуллукъ этеген ерлерин бир нече керен алышдыргъан.   Не ерлерде болса да, ол игит ишлер гёрсетип, Ватанны алдындагъы сыйлы эргиши борчун намусуна амин болуп кютген. Дав ёллары булан Молдавияны, Болгарияны, Румынияны, Венгрияны, Чехословакияны, Югославияны азат этивде ортакъчылыкъ этген ва давну Австрияны топурагъында тамамлагъан. 1945-нчи йылны октябр айында асгер къуллугъундан эркин этилген ва ата юртуна къайтгъан.


Уллу Ватан давунда гёрсетген батыр ишлери учун А. Исаев Ватан давну ордени, оьзге тюрлю орденлер, медаллар ва белгилер булан савгъатлангъан. Оланы санаву 20-гъа етише. Бирисини макътавлугъу бирисинден эсе осал тюгюл. «Къоччакълыгъы учун» деген медаль неге ва нечик берилген болгъаны гьакъда да кёп зат айтмагъа бажарыла.


– Атабызгъа, машалла, апрель ай гелсе, 97 йыл болажакъ. Гёзелдириклерин де тагъып, ол «Ёлдашны» ва бизин районну «Тюзлюкню шавласы» деген район газетни гьар номерин уллудан чыдамсыз ва кёп сююп охуй. Уьстевюне, ораза да тута ва бир намазын да къоймай. Анабыз Нанух (Аллагь рагьмат этсин!) булан бирге ол етти яшны оьсдюрген. Биз беш къыз ва эки улан барбыз. Атабыз бизин арабызда яшап турагъанына, озокъда, инг башлап наслулары болуп биз сююнегенден къайры, юртлуларыбыз да оьктем болалар. Яшырып да нетейим, пачалыкъны янындан да огъар къарав яман тюгюл. Бир болмайлы, минг Аллагьны разиликлери болсун бизин районну халкъыны яшавлукъ масъалаларына къарайгъан бёлюгюню (УСЗН-ни) ёлбашчысы Атикат Абакаровагъа ва райондагъы адамланы социальный якъдан къуллукъларын кютеген комплексный центрны (КСЦОН-ну) директору Эльбрус Мусаевге, – дей Алимирза агъавну гиччи уланы Насрутдин Исаев бизин булангъы лакъырында.


Гёрмекли ветераныбыз ва сыйлы тамазабыз Алимирза агъавгъа дагъы да узакъ йыллар яшамагъа насип болсун! Ол буссагьат да абатын къатдырып басып ала, ою дурус экени огъар дагъы да уллу оьмюр сюрмеге болушлукъ этер деген яхшы умутлар булан къаламан. Бар болгъур, Алимирза агъав – юртну къарты, давну нарты.


 

М-З. ТЕМИРБЕКОВ,

мухбир.