Волонтёрлагъа къумукъча гёнгюллю кюйде гьаракатгъа къуршалгъанлар десе, оланы ишин толу кюйде суратлама бола. Олар къайсы ишин де гьакъ гёзлемей яда алмай, гьакъ юрекден эте. Оьзлени бош заманында башгъалагъа яхшылыкъ болдура ва болагъан кёмегин эте. Шо ишинден ва иши учун алынгъан «баракалла» деген сёзден сююне. Бирлери учун шо иш заманлыкъ гьаваслыкъ буса, башгъалары учун яшавуну аслу маънасы болуп къала.
Гертисин айтса, яшавда шолайлар ёлукъмай да къалмай. Биз оьзюню гьакъында айтма сюеген Эндирейдеги 1 номерли школаны завучу Айшат Камилпашаевна Темирханова – шолайланы бириси. Ол школаны охувчулары булан уллу чагъындагъылагъа кёп кёмеклер этген. Артдагъы йылларда уллулардан къайры, етимлеге, сакъатлагъа ва аврувлулагъа да кёмек этиле.
2017-нчи йылны ноябр айында ол школада «Янгы наслу» деген гьаракат къургъан ва шогъар да оьзю ёлбашчылыкъ эте. Мен Айшат Камилпашаевна булан ёлугъуп, шо иши гьакъда лакъыр этемен.
– Сизин гьаракат не йимик муратланы кютмеге гёз алгъа тутгъан? Бир башлап шо гьакъда айтгъанынгны сюемен.
– Гертисин айтса, школадагъы яшлар булан мен уллу чагъындагъылагъа болагъан кёмегимни алдан берли де этгенмен. Уллу чагъындагъылар бавун къазып болмай, олагъа абзарын жыйышдырма къыйын бола. Шо ишлени биз эте эдик. Алда шолай кёмек этегенлеге «тимуровчулар» дей эди. Заманлар алышынды, яшёрюмлени тюрлю-тюрлю гьаракатлары къурулма башлады. Районда биринчилей дегенлей мен де Эндирейдеги 1 номерли школада «Янгы наслу» деген гёнгюллю кюйде гьаракатгъа къуршалгъанланы бёлюгюн къурдум.
Гьар адамда да башгъагъа, аслу гьалда уллулагъа, авруйгъанлагъа кёмек этеген хасият бар. Бирлери шону зувап учун эте, башгъалары буса оьзюн гёрсетмек учун, бирдагъылары шо ишинден кеп алагъангъа эте.
–Сизин бёлюк этген бир-эки ишни гьакъында айтма боламысыз?
–Этген ишлерибиз чи кёп бар, тек аслуларын эсгерме ярай. 2018-нчи йылда бизин школада «Дюньяны рагьмулукъ къутгъаражакъ» деген гьаракатны ичинде «Гьар даим де яшлар иржайып турсунлар» деп ат тагъып, уллу инсаплы концерт этдик. Шо шатлыкъгъа аслу гьалда етим ва сакъат яшланы чакъыргъан эдик. Оланы яшавуна аз мюгьлетге буса да ярыкълыкъ къошуп болсакъ, биз этеген иш пайдасыз тюгюл деп ойлашаман. Бираз ал заманларда сакъат яшлар уьюнден чыкъма уяла эди. Гьали пачалыкъны янындан олагъа бакъгъан янашыв да башгъа, шону учун да олар оьзлени савлар йимик тенг ихтиярлы гёрелер.
–Концертлерден къайры сизин гьаракат бёлюк оьрде эсгерилгенлер учун «татли столлар» къура, савгъатлар да бере бугъай чы…
–Озокъда, шо гюн оланы эсинде къалсын учун бир тюрлю гьаракат гёрме герек. Шолай уллу концертлер болсун, жыйынлар болсун, кёмексиз этме бажарылмай. Шону этегенни англагъанда, районну башчысы Жамболат Салавов оьзюню къошумун гьар заманда да етишдире. Юртну башчысы Ирази Абсаламов, юртну айланасындагъы далапчылыкъ этегенлер де гьар заманда кёмек къолун узата. Юртда татлиликлер этеген, шолай да Хасавюртдагъы «Прага» ва «Изюминка» деген татлиликлер гьазирлейген цехлер, татлиликлер сатагъан тюкенни есиси кампетлер, юртлу Умакъ Рагьматулаев экмек берди. Юртдагъы таксилер шо гюн яшланы ари-бери гьавайын алып юрюдю. Шагьардан буса театрны артистлери, белгили артист Мурат Садуев, Дагъыстанны ат къазангъан артисти Латип Шайыпов, Хасавюртдан гелген йырав Алим Абдуллаев, кёстекли Алберт Арсланалиев, юртлулар Мадина Сатеева, Гьюсейин Къочкъаров, Байрамали Алханов,кружокланы башчылары Соня Гьабибова ва Дина Сайитова концертни дагъы да къужурлу этдилер.
Концертге чакъырылгъан Дагъыстанны ат къазангъан насигьатчысы, белгили савунчу ва 5 орденни кавалери Нюрюв Темукъова бу агьвалатгъа оьр багьа берди. Концертге Къарланюртдан гелген Кавсарат Салаватованы айланып яшлар бийип турдулар. Ол коляскада буса да, концертде жагьлы айлана эди. Шону учун деп йырлама иш этип гелген Мурат Садуев бир йырын Кавсаратгъа багъышлады. Огъар къошулуп Кавсарат да йырлады, ол Муратны бары да йырларын биле экен…
Шу ишлени гьазирлевде, юрютювде бизин гёнгюллю кюйде гьаракатгъа къуршалгъан бёлюгюбюзню ортакъчылары бек къаст этди. Олар акъча жыягъанда да, яшлагъа савгъатлар алагъанда да, шоланы яшлагъа пайлайгъанда да гьакъ юрекден ишледи. Шо гюн биз чакъырылгъан 150 де яшны гьарисине тергев болдурдукъ, оланы юзлеринде шатлыкъны гёрюп, оьзюбюз де сююндюк…
–2018-нчи йылны декабр айыны 3–5-де Москвада гёнгюллю кюйде гьаракатгъа къуршалгъанланы халкъара форуму оьтгерилди. Дагъыстандан шонда сен де ортакъчылыкъ этдинг… Шо форумда не масъалалар гётерилди?
–Форумгъа бизин уьлкебизден къайры дагъы да 120 пачалыкъдан 15 минг гёнгюллю кюйде гьаракатгъа къуршалгъанлар гелген эди. «Бизин пачалыкъда шу гьаракатда ортакъчылыкъ этеген миллионлар булангъы адамлар бар, сав дюньяда буса миллиарддан да артыкъ», – деди алдыбызда сёйлей туруп, Россияны Президентини Администрациясыны ёлбашчысыны заместители Сергей Кириенко. Шонда айтгъанда йимик, кёмек этегенлени санаву янгыз Россияда 2017-нчи йылдан эсе, бу йылгъа ерли кёпге артгъан ва 14 миллионгъа етише. Рагьмулукъну миллети ва дазусу болмай.
– Эсгерилген форумну барышы, ону пайдасы гьакъда не айтмагъа боласан?
– Шолай форумларда ой алышдырыв, ишни юрютеген кюйню англатыв, сынав алышдырыв ва выставкалар бола. Шолай да, форумну барышында яшавлукъ масъалалагъа къарайгъан идараланы ва инсаплы фондланы иши булан таныш болдукъ. Форумда ортакъчылыкъ этген гьар адам бир сессияда ортакъчылыкъ этме герек эди. Мен де кёп тюрлю ва пайдалы чараларда ортакъчылыкъ этдим. «Россияны имканлыкълары» деген сессияны бизин уьлкени тыш ишлер министри Сергей Лавров юрютдю. Эсгерилген сессияланы белгили адамлар – Россияны охувчуларыны гьаракатыны председатели, Россияны Игити, космонавт Сергей Рязанский, Шаварш Карапетян, телеберилишлени юрютеген Оксана Фёдорова ва башгъалары юрютдюлер. Шолай форумларда башгъа ерлерден гелгенлер булан таныш боласан, аралыкълар болдурасан ва байлавлукъ юрютесен. Ахырынчы гюн концерт программалар болду. Конкурсну утгъанлагъа савгъатлар берилди. Сонг башгъа лауреатлар да белгиленди ва савгъатланды.
– Шондан къайтгъанда гьаракатыгъыз дагъы да артгъандыр?
–Озокъда. Оьтген йылны ахырында Эндирейдеги 1 номерли школада «Янгы йылны гьайранлыгъы» деген республика оьлчевдеги инсаплы гьаракатны оьтгердик. Шону да биз къыйын гьалларда яшайгъан агьлюлени яшларына этдик. Харж якъдан районну башчысы Жанболат Салавов, юрт башчы Ирази Абсаламов, алдагъы йылларда школаны битгенлер ва далапчылыкъ булан машгъул юртлуларыбыз, бизин школаны муаллимлери кёмек этди. Шо ишибизде буса гёнгюллю кюйде гьаракатгъа къуршалгъанлар ортакъчылыкъ этдилер. 8–11-нчи класларда охуйгъан, атасы яда анасы ёкъ агьлюлени яшларын жыйып, оланы къутладыкъ, татлилик булан столлар къурулуп, чайлар ичилди. Оланы гьарисине эсделик савгъатлар булан бирге 1000 манат акъчалар да берилди. Айтагъаным, шолай кёмеклер уллу даража тюгюл буса да, яшлар оьзлени етим гьисап этмей, тенглилери йимик гьис этгенни сюебиз.
Бизин тергевюбюз аналаны сюювюн, аталаны якълайгъанын къайтарма болмас, тек биз гьар ишибизни гьакъ юрекден этебиз. Озокъда, олагъа пачалыкъны янындан этилеген кёмеклер де бар, тек шулай жыйылып этилгени айрокъда кёпге эсинде къала. Оланы къайгъысы булан янгыз къоймайбыз.
–Сиз гьар айда дегенлей бир чарада ортакъчылыкъ этесиз, шоланы барысына да нечик етишесиз?
–Бизин «Янгы наслу» деген гьаракат къурумда 30 охувчу бар, оланы гьариси бир янгъа жавап бере. Шогъар буса барыбыз да кёмек этебиз. Чаралар кёп, барында да ортакъчылыкъ этме къаст этебиз. Биз къурумгъа яшланы гючден алмагъанбыз, оьзлер сююп гелген. Оланы къасты булан
8-нчи февраль – яш игитлени гюнюне багъышлангъан линейка,
22-нчи февраль – Ватанны якълавчуларына багъышлангъан концерт,
7-нчи март –Къатынгишилени халкъара гюнюне багъышлангъан концерт,
«Хасавюрт районну табиатын тазалыкъда сакълайыкъ» деген экология марафон йимик чаралар да оьтгерилди. Гетген йыл 22–28-нчи апрелде оьтгерилген «Рагьмулукъну жумасы» деген республика гьаракатда Топуракъны гюнюне багъышлангъан экология чарасында да ортакъчылыкъ этдик, «Рагьмулукъну дарсларында» болдукъ, къоллангъан лампочкаланы ва батарейлени жыйывну гьакъында юртда англатыв юрютдюк. Спортну пайдасы гьакъда ёлугъувлар оьтгердик. Уллу Ватан давда болгъанланы эсделигини айланасын тазаладыкъ.
30-нчу майда Акъташны бою булан орманлыкъ хозяйствону ва ДР-ни табии байлыкълагъа ва экологиягъа къарайгъан министерлигини вакиллери булан тазалыкъ болдурув булкъа оьтгердик. Яшланы якълав халкъара гюнюнде концерт болду. Шонда да бизин гьаракатны ортакъчылары гьюрметлев грамоталар булан савгъатланды.
Шолай да, биз Россияны ва Конституцияны гюнюне, экстремизмни ва террорчулукъну алдын алыву, СПИД-ни яйылывуну гьакъында оьтгерилген уллу жыйынларда да ортакъчылыкъ этгенбиз. Айтагъаным, адамгъа пайда болар бары да чараларда ортакъчылыкъ этебиз, демек, олагъа яхшылыкъ гелтиребиз, неге тюгюл де бизин ишибизде шо – аслу масъала.
–Ишигизде дагъы да оьрлюклеге етишмекни ёрайбыз!
–Савбол!
Гебек КЪОНАКЪБИЕВ,
оьз мухбирибиз.
