«Къумукъ театр – юртлу яшлагъа»

А-П. Салаватовну атындагъы Къумукъ музыкалы-драма театрда янгы проект иш гёре. Кёп йыллар театрда ишлейген Дагъыстанны ат къазангъан артисткасы Сабият САЛИМОВА театр­да къурулгъан реклама бёлюкню ёлбашчысы ва бу проектни сиптечиси болгъан. Сабият оьтген йыл Москвада сагьна инчесаниятгъа менеджерлер гьазирлейген курсланы да битдирип къайтгъан. Ол биринчилей бу проект къачан къурулгъанны ва иш гёрме башлагъанны гьакъында булай дей:

 

– Оьтген йылны ахырында Къумукъ театрны коллективи гьакълашып ва ёлбашчылары да якълап, «Къумукъ театр–юртлу яшлагъа» деген проектни къабул этдик,–дей ол.– Аслу мурадыбыз да – тахшагьаргъа гелип, спектакллеге къарама имканлыгъы ёкъ юртлу яшлагъа таза ана тилинде оьзлер учун язылгъан спектакллени гёрсетмек. Театрны коллективи инг башлап Къаягент ра­йонгъа барма токъташды. Районну юртларындагъы охувчу яшлагъа спектакль гёрсетме сюебиз. Биринчилей, мен районну билим берив бёлюгюню ёлбашчысы Мурат Рашитович Рашитов булан ёлукъдум. Бизин мурадыбызны ол кёп арив гёрдю. Оьзюню янына юрт школаланы бары да директорларын чакъырды. Охувчуланы спектаклге къарама жыймакъ учун тапшурувлар берди. Шаир ва драматург Атав Атаев язгъан «Акъ къозу» деген пьесагъа гёре Башлыгентде спектаклни гёрсетдик. Сонг ону Къаягент юртну бир номерли школасында да гёрсетдик. Яшланы спектаклде юрюлеген гьаракатдан сююнегенин, къуванагъанын бир гёрме герек эди. Олагъа къарап биз де сююнебиз чи. Театрны коллективини атындан Мурат Рашитовичге, Башлыгент школаны завучу Ума Алиевнагъа, маданият къаласыны директору Самат Исмаевичге, Къаягент школаны директору Зайнутдин Бейбулаевичге гьакъ юрекден разилигибизни билдиребиз.

–Дагъы да къайсы юртларда болдугъуз?


–Бу йылны февраль ­айында Къарабудагъгент районда болдукъ. Мен районну гьакимлери булан ёлукъдум. Районну ёлбашчысыны биринчи заместители Агьмат Гьажиев, социал масъалалагъа къарайгъан управлениени ёлбашчысы Гюлжанат Темирова, билим берив бёлюкню ёлбашчысы Тажли Хизриева, маданият бёлюкню ёлбашчысы Найида Мурзаева булан ёлукъгъан сонг спектаклни къайсы юртларда ва къачан гёрсетежегибизни белгиледик. Биз ана тилни халкъара гюнюне къаршы болуп къалдыкъ. Къарабудагъгентде, Къакъашурада, Гьелиде, Дёргелиде школаны охувчу яшларына спектаклни гёрсетдик. Яшлар «Акъ къозуну» кёп сююп къабул этди. Бу пьесаны автору да – ерли автор, къакъашуралы.

Театрны атындан мен районну ёлбашчысы Магьмут Амиралиевге ва ону заместителлерине де баракалла билдирме сюемен. Олар бу ёлугъувланы тергевню тюбюнде сакълап турду.

– Башгъа районлагъа барма да гёз алгъа тутгъансыздыр?


– Озокъда. Гьали югъагъан аврувну къоркъунчлугъу саялы узакъ болжаллы каникуллары да башланып къалды. Яйда биз де гастролларда болабыз. Гюзде, янгы охув йыл башлангъанда бизин къумукъ районлардагъы школалагъа барып, спектакллер гёрсетме умутубуз бар.

– Сизге янгы проект булан юрюлеген бу ишигизде уьстюнлюклер ёрайбыз.

– Савболугъуз.

 

 

СУРАТЛАРДА: башлыгентли охувчуланы тергевю сагьнада; спектаклден сонг.



Авторизация
*
*
Регистрация
*
*
*
Согласны с условиями сайта?
Генерация пароля