Билим алмакъ учун да имканлыкълар болдурулгъан

Школа – гьар адам яшавунда оьтме герек аслу канзи. Шонда гиччи яшгъа башгъалар булан къурдаш болма, айланагъа къаравун къурма, ингдеси, билим алма имканлыкъ бола. Школагъа юрюйген йыллар инг де насипли йыллар деп де гьисаплана. Эгер де шонда сагъа билим береген муаллимлер яшлагъа арив янаша буса чы дагъы да яхшы.

Шо янындан алгъанда, Гьажимажагьатюртдагъы муаллимлени гьаракаты макътавгъа тийишли. Гьар охувчу да школаны экинчи уью йимик гьис эте, шонда сагъа таяв да, сююв де ва хасиятынгны чарлама имканлыкъ да бола.

Мен шо гьакъда лакъыр эте туруп, Гьажимажагьатюртдагъы школаны директору Аббас Адилгереев оьзю муаллим касбугъа нечик гелгенин сорадым.

 


– Сени тамаша этип болмайман, атам Ильяс оьр билимли адам эди ва юрт школада химия дарсланы берип ишледи. Тюрлю-тюрлю йылларда ол завуч, гьатта директор да болду. Шону ишин бек ушата эдим. Къысмат тамаша зат, мен де атам йимик химик болдум, 9 йыл алда директор этилип де белгилендим.

– Школада нече яш ишлей ва шу гиччирек школада оьзюгюз ойлашгъан кюйде дарслар юрютме бажарыламы?

– Школабыз ер тербенгенден сонг 1970-нчи йылларда къурулгъан. Мунда 169 яш, 2 сменде охуй. Беклиги бек, тек гьалиги школаларда йимик онгайлыкълар ёкъ. Буса да 28 де муаллим яшланы тарбиялавгъа ва билим беривге тергевлю янаша. Бары да школаларда йимик, мунда да ачыкъ дарслар, генгешлер ва сынав алышдырывлар, конференциялар оьтгериле. Мадина Гьажимуратова школаны биринчилей алтын медалгъа битдирген, гьали медицина академияны битдирип, врач болуп чыкъды. Гетген йыл школаны алтын медалгъа Юлдуз Къайырбекова да битдирди.

Озокъда, янгы къурулуп турагъан школаланы гёргенде, гёзюбюз къыза, ондагъы онгайлыкълар булан яшлар алимлер яда яхшы касбучулар болуп чыкъма герек. Юрт гиччи экенге, бизин школа толмагъан школа деп, сегиз класгъа ерли охутуп турду. 1996-нчы йылда орта школагъа айланды. Мен школада янгы адам тюгюлмен, буса да яннавурумдагъы завучларым Бике Гьажимуратова, Найида Юсупова ва оьзге муаллимлер булан бирликде ишлейбиз. Олардан сонг да, яшлагъа билим берип ишлеп турагъан муаллимлер Пейзанат Абдулбекованы, Написат Алхаматованы, къумукъ дарсланы береген Магьаммат Алхаматовну, Гюлханым Хийзуллаеваны, Садияханым Алхаматованы ва Шапагьат Магьамматованы айрыча эсгерме сюемен. Олар оьзлени оьмюрюн билим беривге багъышлагъан. Гьали оланы охувчуларыны бирлери школаны битип, юртдагъы гиччипавлагъа дарс берелер. Кёбюсю билим беривню отличниклери ва гьюрметли къуллукъчулары да дюр. Шолай да, биз школада кёп йыллар ишлеп гетген Айшат Алхаматованы, Паччахан Алипханованы, Али Гьажимуратовну, Патимат Абдулбекованы атларын уллу оьктемлик булан эсгеребиз. Кёп йыллар школаны директору болуп Шарабдин Гьасанович Абдулбеков да ишледи. Ол юртда абуру-сыйы булангъы адам эди. Район жыйынны депутаты, Дагъыс­танны билим берив ва илму къуллукъчуларыны профсоюзуну рес­публика комитетини президиумуну чл­ени, Дагъыс­танны билим беривюню отличниги ва Россияны умуми билим беривюню гьюрметли къуллукъчусу ва «Загьматны ветераны» эди. Шулай адамлар ишлеген школаны тамуру терен, сынаву мугькам бола ва адамлары мекенли де бола. Биз де шоланы къыйынларындан уьлгю алып ишлейбиз.

– Гьалиги заманда яшлагъа бираз тынглавсуз болмакъ, охума сюймей, оьзге терсликлеге алданмакъ учун ёллар кёп…

– Мен англадым. Шо яндан алгъанда, школада тарбия иш бек яхшы. Бизин коллектив яшланы ата-аналары булан ёлугъувлар кёп юрюте. Ачыкъ дарслар оьтгеребиз, райондагъы ич ишлени гьакъыбалыкъ болмагъан яшланы ишлерине къарайгъан бёлюгюнден Жаминат Азаматова геле, дин идараланы вакиллери яшлар булан ёлугъувлар оьтгере. Ондан къайры да, юртлуларыбыз Совет Союзну Игити Иса Солтановну, игит ат берилип, савгъатланмай къалгъан Мама Гьажимуратовну адамлары булан кёп ёлугъувлар оьтгерилди. Сёз ёругъуна гёре айтсам, Маматны авлетини авлети Арсен бизин школада дарс бере. Школаны абзарында давда болгъанланы эсделиги салынгъан. Гьали админист­рацияны кёмеги булан школада спорт имаратлар бар, яшлар перемена болса, шонда чабалар.

Башлапгъы класдагъылагъа аш бе­регенибиз яхшылашгъан. Школада компьютер клас, ашюй, китапхана, медицина кабинет. Демек, къасты бар яшгъа билим алмакъ учун бары да имканлыкълар болдурулгъан.

 

 

Бизин маълумат:

 Аббас Адилгереев 1959-нчу йылда Гьажимажагьатюртда тувгъан. Юртдагъы школада 8, Яхсайда 10 класны битдирген. 1977-нчи йылда Дагъыстан пачалыкъ университетни химия-биология факультетин битдирген. Шондан сонг 3 йыл Чагъаротар школада ишлей, сонг юртгъа къайта ва ерли школада химия дарсланы юрюте. 2012-нчи йылдан тутуп школаны директору болуп ишлей.

Дагъыстанны билим беривюню отличниги, Россияны умуми билим беривюню гьюрметли къуллукъчусу.

 

Авторизация
*
*
Регистрация
*
*
*
Согласны с условиями сайта?
Генерация пароля