Магьаммат Атаев: «Эшиклерибиз районлулагъа гьаман да ачыкъ»


       Магьаммат Атаевни Бабаюрт районлуланы кёплери яхшы таный. Узакъ йыллар аманлыкъ сакълав къурумларда ишлеген. Пенсия чагъына етишгенде, районда биринчилей болуп нотариус касбуну танглагъан. Артдагъы 10 йылланы боюнда жамият советини, бугюнге ерли буса жамият палатасыны ёлбашчысы болуп чалыша. Оьзюню 80 йыллыкъ чагъына да къарамай, ол районлуланы законлукъ ихтиярларын болдурмакъ учун гьаракат эте, гьар тюрлю чараланы оьтгере, гьарисине кёмек къолун узатмагъа къасткъыла. Артдагъы гюнлерде мен ону булан ёлугъуп, жамият палатаны гьар гюнлюк ишлери гьакъда лакъыр этдим.


– Магьаммат Хасболатович, гележекде яшавгъа чыгъармагъа гёз алгъа тутгъан планланы гьакъында хабарлагъанча, башлап районну жамият палатасындагъы ишигизни гьакъында айтгъаныгъызны сюер эдим…



– Мен районну жамият палатасына 2007-нчи йылдан берли ёлбашчылыкъ этемен. Алда шо къурум жамият совет деп юрюле эди. Янгыртылып, бирлешип, 2012-нчи йылдан тутуп, совет палатагъа айланды. Шо йыл районну башыны сиптечилиги булан жамият палата да янгыртылды. Юртлардан ва районну башыны таклифи булан жамият палатаны янгы членлери айырылды, оланы санаву 22-ге минди. Мени де шо йыл янгы къурулгъан жамият палатаны ёлбашчысы этип айырдылар.



Мени жамият палатагъа гелгеним де негьакъ тюгюл. Узакъ йыллар аманлыкъ сакълав къурумларда, артдагъы йыллар нотариус болуп загьмат тёкгеним шогъар себепли болгъандыр. Айтагъаным, жамият учун этилеген ишлерибизде ихтияр якълав якъдагъы билимим хыйлы кёмек эте.



Жамият палатаны членлерини гьа­къында айта туруп, башында, бизде мердешленген гьалда олар актив кюйде ишге урунгъан эди. Сонгунда, къатты янгур тез токътай дегенлей, бирлерини иши эсленмейген болду. Озокъда, шо савлай жамият палатаны ишине четим этмеди. Янгыдан жамият палата къурулагъан вакътиде къурумгъа жагьиллени де, янгы пенсия чагъына етишгенлени де къуршамагъа таклиф этдим. Шо таклифим ерлерде де якълав тапды. Гьасили, бугюн жамият палатаны ишине яшёрюмлер де, чагъы 60-дан оьтгенлер де къуршалгъан. Олайланы къастлыгъы да, гьаракаты да рази къалдыра. Чинкдеси, бугюн жамият палатаны членлери – бары да дегенлей юртуну, ра­йонубузну ва республикабызны оьсювюне ва жамиятны аманлыгъын болдурувгъа немкъорай янашмайгъанлар.


– Бугюн Бабаюрт районну жамият палатасында 4 комиссия ишлей. Оланы ишине нечик къыймат бермеге болар эдигиз?



– Озокъда, арадан гетген йылланы боюнда жамият ишде бир тюрлю сынав да топламагъа болдум. Оьрде де эсгерип гетгеним йимик, башында жамият палатаны членлерини аслам яны уллу чагъына етген адамлар эди. Палатаны янгырта­гъанда шо хатаны тюзледик, ишге янгы кюйде янашагъан болдукъ. Жамият палатаны янында къурулгъан комиссиялагъа сынавлу ва абурлу адамлар ёлбашчылыкъ да эте. Мен бу ерде жамият-экономиканы оьсю­вюне, савлукъ сакълавгъа, билим беривге, маданиятгъа, яшёрюмлеге, спортгъа къарайгъан комиссияны башы Элмурза Тонаевге, юрт хозяйство тармакъгъа, юртланы оьсювюне, экологиягъа ва табиятны къоруп сакълавгъа къарайгъан комиссияны башы Абдулвагьит Муслимовгъа, ватандаш жамиятны ишине, милли ва дин аралыкълагъа, ватандашланы законлукъ ихтиярларын болдурувгъа къарайгъан комиссияны башы Адилхан Шамшитовгъа, законлукъну ва аманлыкъны болдурувгъа, ерли гьакимият къурумлар ва жамият бирлешивлер, маълумат къураллар булан аралыкъланы болдурувгъа къарайгъан комиссияны башы Исламутдин Гьажиевге гьакъ юрекден разилигимни билдирмеге сюемен.



Олардан къайры да, жамият палатаны оьзге членлери де адамлар булан чакъда-чакъда ёлугъувлар оьтгере, халкъны къыйнайгъан масъаланы уьстюнде ишлей. Жамият палатаны эшиклери ра­йонлулагъа гьаман да ачыкъ.


– Сиз ойлашагъан кюйде, жамият палатагъа гелеген ватандашланы арзаларыны уьстюнде ишлемек учун, чинкдеси, оланы чечмек учун сизин ишигиз нечик къурулмагъа герек?



– Мени эсиме гелеген кюйде, бары да затны кюрчюсюнде ерли гьакимият къурумлар булангъы байлавлукъ болуп токътамагъа герек. Жамият палата оьзю де жамиятны ва ерли гьакимият къурумланы арачысы гьисаплана. Айтагъаным, ерли гьакимият къурумларсыз жамиятны бир тюрлю масъаласын да чечип болмай. Шо саялы да биз халкъны сесин гьакимиятгъа етишдиребиз, оланы талапларын ва масъалаларын гьакимлер булан бирге чечмеге къаст этебиз. Янгыз танкъыт этип турса да болмай, ери гелгенде четим гьалдан чыкъмагъа ёллар излемеге, къол ялгъамагъа ва кёмек этмеге герек бола.



Бизге гелеген арзаланы кёплери ичеген сув къыт болгъанлыкъ, бузукъ гьалгъа чыкъгъан орамлар булан байлавлу. Артдагъы йыллар кёп яшлы уьягьлюлеге, сакъатлагъа ва оьзге жамият арада якъланмагъан адамлагъа яшавлукъ уьйлер къурмакъ учун топуракъ етишмейгенликни масъаласы кёп гётерилеген болгъан. Озокъда, шолай масъалаланы биз чечип болмайбыз, амма адамланы арзаларын ерли гьакимият къурумлагъа етишдиребиз ва оланы кёмеклиги булан чечмеге къаст этебиз.


– Сиз жамият къурумланы гьакъында айтып гетдигиз. Бабаюрт районда иш гёреген оьзге жамият къурумлар булангъы аралыгъыгъыз нечикдир?



– Жамият палатаны аслу борчу – оьзге тюрлю жамият къурумлар булан да тыгъыс байлавлукъ тутмакъ. Шо якъдан алгъанда, районну жамият палатасыны ишлери тюзевлю юрюле. Мисал учун айтгъанда, районда ишлейген Давну ва загьматны ветеранларыны советини ёлбашчысы Адилхан Шамшитов жамият палатаны комиссиясыны ёлбашчысы да дюр. Ондан къайры да, «Фронтовиклени яшлары» деген жамият къурумну ёлбашчысы Вайдулла Шайыбов, къатынланы советини башы Бийзанат Вагьабова, МВД-ни ветеранларыны советини башы Алимсолтан Солтанмуратов – бизин жыйынланы гьаманлыкъ ортакъчылары. Олардан къайры да, районну халкъына белгили жамият чалышывчуланы да биз оьзюбюзню къанатыбызны тюбюне алмагъа къасткъылабыз. Мен ойлашагъан кюйде, жамият палата халкъны къыйынына табылагъан, оланы сёзюне тынглайгъан ва четим масъаланы чечмек учун белсенген къурум болмагъа герек. Биз шо ёрукъда ишлемеге де гьаракат этебиз.


– Халкъ арада гьакимият къурумланы бирлери жамиятдан айырылгъан, олар оьзтёрече оьзбашына ишлей деп айтыла бола. Сиз оьрде де эсгерип гетгенигиз йимик, ерли гьакимият къурумлар булан аралыкъ тутмакъ – жамият палатаны аслу борчу. Гьакъыкъатда шолай этмеге бажарыламы?



– Жамият палата – башындан тутуп да ватандашланы ва гьакимият къурумланы ялгъайгъан бир кёпюр гьисапда къурулгъан къурум. Шо саялы да, инг башлап биз ватандашлардан гьакимият къурумлагъа гелеген арзалагъа къулакъасма герекбиз.



Къатдырып айтгъанда, бугюн районну жамият палатасы район администрация ва юрт администрациялар булан тыгъыс байлавлукъда ишлей. Жамият палатаны членлери район оьлчевде оьтгерилеген жыйынларда, район депутатларыны жыйынларында ортакъчылыкъ этелер, террорчулукъгъа къаршы комиссияны ишине де къуршалалар. Мен оьзюм де шолай жыйынларда сёз аламан, район оьлчевде чечилмеге герек четим масъалаланы гётеремен, оланы чечмеге къаст этемен.


Шолай аралыкълар районну аманлыкъ болдурув къурумлары булан да байлангъан. Мисал учун айтгъанда, янгыз артдагъы уьч айны ичинде жамият палатаны членлери районну прокурору Зайнудин Къанболатов ва МВД-ни Бабаюрт район бёлюгюню ёлбашчысыны заманлыкъгъа ишлерин юрютеген Амир Къочкъаров булан ёлугъувлар оьтгердик. «Дёгерек столну» айланасында гьар тюрлю масъалалар гётерилди. Шоланы лап да аслулары ватандашланы законлукъ ихтиярларын якълав болуп токътагъан. Ёлугъувда гётерилген масъалалар янгыз кагъызда къалмасын учун, шо къурумланы ёлбашчылары булан байлавлукъда да турабыз. Энниден сонг да эсгерилген къурумланы янындан ватандашланы законлукъ ихтиярлары болдурулсун учун чаралар гёрежекбиз.


– Болгъан лакъырны жамын чыгъа­ра туруп, Магьаммат Хасболатович, районну жамият палатасы ювукъ арада не йимик ишлер булан машгъул болажакъны айтсагъыз яхшы болар эди.



– Гьали-гьалилерде биз жамият палатаны гезикли жыйынын оьтгердик. Шонда оьзге жамият къурумланы вакиллери де ортакъчылыкъ этдилер. Жыйынны оьтгермекликни аслу себеби бу йылны ишлерини планын къабул этмек эди. Шо плангъа гёре йылны боюнда этилмеге герек аслу ишлер белгиленди.



Озокъда, бу йыллыкъ ишибизни аслу яны июн айны 21-нде оьтгерилмеге гёз алгъа тутулгъан районну 90 йыллыгъы булан байлавлу болажакъ. Шо район учун уллу агьвалат да дюр. Байрамгъа онгарылывда ва байрамны оьтгеривде жамият палатаны членлери де актив кюйде ортакъчылыкъ эте. Сонг да, янгыз байрамларда ортакъчылыкъ этип къойса да болмай. Районну халкъын къыйнай­гъан оьзге масъалалар да кёп бар. Лап да аслуларын биз комиссияланы ичинде белгиледик ва шо масъалаланы чечивню уьстюнде тындырыкълы кюйде ишлемеге комиссияланы башын тутгъанлагъа тапшурувлар берилди.



Бизин район юрт хозяйство районгъа санала. Айрокъда артдагъы йылларда районну шо алдынлы тармагъы гене аякъ уьстге минмеге къарап турагъан йимик гёрюне. Асувлу тармакъны янгыртывну къайдаларын къоллап, сабанчылагъа пачалыкъны янындан этилеген кёмек ерлеге, чинкдеси, шо кёмек тарыкълагъа етишсин учун чаралар гёрмеге гёз алгъа тутулгъан. Бажарылса, бу йыл ашлыкъ оьсдюрювчюню ва гьайванчыны гюнюн белгилемеге де гёз алгъа тутулгъан. Гёз алгъа тутулгъан планлар яшавгъа чыгъармы-чыкъмасмы, озокъда, яшав оьзю гёрсетер. Оьрдеги гьакимлерибизни кёмеги де булан шо хыялланы яшавгъа чыгъармагъа умут этебиз.


– Кёп савболугъуз!



– Сен де савбол!



Лакъырлашывну язгъан Герейхан Гьажиев, бизин мухбирибиз.


Суратда: Магьаммат Атаев.

Автор чыгъаргъан сурат.



Авторизация
*
*
Регистрация
*
*
*
Согласны с условиями сайта?
Генерация пароля