Дагъыстанны Башчысы В.Васильевни сиптечилигине гёре къабул этилген «100 школа» деген проект гетген йылдан тутуп ишлеме башлады. Башлап шо проектни гьакъында толу кюйде айтайыкъ. Шогъар гёре Дагъыстанны Гьукуматы 2 миллион манат акъча гёрсете. Тек ерли администрациялар да бажарывлу адамлар табып, шолагъа да «кёмекчи» къолун узатма ихтияр бере. Олар гёрсетилген харжны 15 процентден кем болмайгъанын береген далапчылар, фирмаланы башчыларын тапма герек. Хасавюрт район администрациягъа буса шо акъчадан 5 процентин тёлеме ихтияр бериле. Тек районну депутатларыны къарарына гёре, нечакъы спонсорлар берсе, шонча акъчаны район администрацияны башчысы да бережек деп гёз алгъа тутулгъан.
Шо проектге къуршалгъан юз школаны экиси Хасавюрт районгъа тюшдю – Ботаюрт ва Тотурбийкъала орта школалар. Мен Ботаюрт орта школаны директору Марат Гьажиев булан ёлукъдум.
Ботаюрт школагъа гьали-гьалилерде 100 йыл тамамланды. 520 яшгъа деп этилинген школада бугюнлерде 834 яш охуй, олагъа да 99 муаллим дарс бере. Яшлар 1, 2 ва 3 къабатлы биналарда охуй.
–Шо проектге къошулмакъ учун башлап кёмек этежек адамны тапма герек, – дей Марат Гьажиев. – Шолай адам да шоссагьат табылды. Юртлубуз, «Нарт» деген жамият къурумну башчысы Руслан Абдулзагьирович Бийболатов 600 минг манат берди. Шончакъы акъча район администрацияны башчысы да гёрсетди. Натижада, 3,2 миллион манат болду. Шону пайдалы къоллама имканлыкъ да болду.
–Башлап не ишлени этдигиз?
–Уьч де бинадагъы иссилик болдурагъан ясандырывланы алышдырдыкъ. Гьар йыл къыш буса, шо масъала чыгъа эди. 50–60 йыллар алда этилинген школада ярашдырма ерлер кёп бола. Коридорланы ва бир-бир класланы поллары осал эди, гьатта чириген ерлери де бар эди. Шону учун да 2 класны полларын алышдырдыкъ, шо буса 50 квадрат метр бола. Шолай да, 4 коридорну поллары тайдырылып, керамо-гранит деп айтылагъан плитка тутулду. Дагъы да айтсам, 32 терезени де алышдырдыкъ.
–Шо акъчагъа янгы ясандырывлар алма яраймы?
–Ярамай, шо харжны школаны гьалын яхшылашдырмагъа ва ярашдырмагъа къоллама герек. Озокъда, имканлыкъ болгъан буса, гьалиги замангъа къыйышагъан ясандырывлар алар эдик. Булайына айтгъанда, школада компьютер клас, 2 интерактив доскабыз бар. Шоланы бириси – биология дарсланы юрютеген муаллим Элмира Рамазанованы, биревюсю де– математика дарсланы муаллими Женнет Акаеваны класларында. Олар айтагъан кюйде, яшлар гёрсетип берилген дарсланы яхшы англай.
–Школада билим берив нечик салынгъан?
–Шо яндан макътанып да болабыз. Артдагъы 2-3 йыл бизин охувчулар ЕГЭ-ни юз процентге берелер. Сёз ёрукъгъа гёре айтсам, гетген йыл битеген 12 охувчуну уьчевю алтын медальгъа битди ва бары да оьр охув ожакълагъа тюшдюлер. Дагъыстанда яхшы охуйгъанланы конкурслары оьтгериле. Шонда утгъанлар Артекге йибериле. Бу йыл Дагъыстандан шо белгили лагерге 55 яш бара эди, шолардан уьчевю – бизин школаны охувчулары. Айтагъаным, билим берив школада яман салынмагъан.
– «100 школа» деген проект гьали де давам этиле, шонда бирдагъы керен ортакъчылыкъ этме боламы?
–Дагъыстанны Башчысы Владимир Васильев шо проектни бу йыл да оьтгермекни янын тутду. Ол айтагъан кюйде, бу йыл шо проект «150 школа» болажакъ. Шону учун да проектге деп бюджетден 300 миллион манат гёрсетилген.
Шону булан бирге ол бир утгъан школа бирдагъы гезик де ортакъчылыкъ этмекни гери урмады. Биз шо проектде ортакъчылыкъ этмек учун янгыдан гьазир болуп турабыз. Мен бираз алда айтгъан эдим, башлап спонсорну тапма къыйын бола. Эгер шо харжны бирев берип болмай буса, къошулуп жыйма да ярай. Бизин школа шо проектге бирдагъы да къошулма сюе. Юртубуздагъы «Батыр-бройлер» деген къурумну башчысы Аштар Батыров 600 минг манат бере. Сонг да, шо пайдалы ишге юртдагъы бажарывлу уланлар да къошулгъан. Демек, «кёмек» акъча артыкъ болгъан сайын, проектни утма да тынч бола. Кёмек этегенлени айтсам – агъа-инилер Боташевлер, Абакар Абуков, Тельман Татарханов, Сираждин Ражабов, Арслан Гьажиев, Элдар Хамавов ва башгъалары. Нечик де, 1 миллион манат жыйгъанбыз.
–Бу гезик де шо проектни утсагъыз, не ишлени этме сюесиз?
–Башлап школаны къалкъысын алышдыражакъ эдик, шолай да эшиклерибиз арив тюгюл, шоланы да алышдырма сюебиз. Этме ишлер чи бар, бир башлап утайыкъ, сонг къарарбыз. Гьали этилинген ишлерден де сююнюп, билим беривню къастын этебиз.
Гебек КЪОНАКЪБИЕВ, оьз мухбирибиз.
Суратда: Ботаюрт орта школаны директору Марат Гьажиев.
