Дагъыстанлылар террорчулукъгъа къаршы – Ватаныбыз аявлу

Чараны ача туруп, Дагъыстанны печат ва маълумат министерликни вакили Мурат Муратханов билдирген кюйде, гьалиги заманда террорчулукъ биринчи ерге чыгъа. «Яшёрюмлени арасында радикал гьал гючлене. Террорчулукъгъа яшёрюмлени къаршы къуршамакъ учун ислам дин къоллана. Шо саялы бары да дин ва жамият, маълумат къурумлагъа, министерликлеге ва тармакълагъа террорчулукъгъа къаршы дин управлениени айланасында биригип чалышма тарыкъ», – деди ол.


Шолайлыкъда, М.Муратханов айтгъан кюйде, шо яман аврувгъа къаршы кёп халкъны къуршап ябушма герек.


Ондан сонг сёйлеген Дагъыстанны экстремизмге ва террорчулукъгъа къарайгъан координация советини председатели Зикрула Ильясов бугюн Дагъыстан терс ёлгъа тюшген кёп адамын тас этгени гьакъында айтды. Шо балагьгъа къаршы ябушгъан кёп къуллукъчулар да о дюньягъа гетгенин эсгерди.


З.Ильясов айтгъан кюйде, бизин жамиятгъа террорчулукъгъа къаршы нечик ябушма, олай да маълумат къуралларда оланы нечик берме тарыкъны гьакъында ойлашма герек.


«Ахтарывчуланы кёплери экстремизмни ва террорчулукъну идеологиясын англамайлар. Террорчуну башгъа социал ва экономика янлары да бар. Тек олар онча агьамиятлы тюгюл», – деди оьзюню сёйлевюнде яшёрюмлени ишине къарайгъан министерликни вакили Микайыл Микайылов. Ол айтгъан кюйде, радикал ойну дагъыстанлыланы юреклерине сингдирме къыйын тюгюл. Неге десе олар ислам динни герти ёлларын англамайлар. Адамлагъа герти исламны маънасын сингдирме герек. Амма онда да адамлагъа экстремизмни заралын яш заманында англатма тюше. Олар яшайгъан уьйлерде, школаларда, олар юрюйген секцияларда англатыв иш юрютме тарыкъ. Яшёрюмлени болгъан чакъы тарбия ва билим беривге къуршамакъ – бизин борчубуз. Бу масъалада да кёп артыкъ къаст этме ярамай. Неге тюгюл, олай къастлыкъ, гьаракат къайта гёзленмеген гьалны тувдурма бола.


«Дёгерек столну» ортакъчылары Россияны Игити Магьаммат Нюрбагьандовну гьакъында да эсгерди. Ону гьакъында хабар Дагъыстандан, Россиядан чыгъып, савлай дюньягъа яйылгъанын айтдылар.


«Дёгерек столну» ортакъчылары телевизордан экстремизмни ва террорчулукъну алдын алывгъа байлавлу роликлер гёрсетме герек деген ойгъа да гелди.

А.ГЬАМЗАЕВ.




Авторизация
*
*
Регистрация
*
*
*
Согласны с условиями сайта?
Генерация пароля