Шагьар гьакимден тюзелмей турду


Бизин республиканы алдынгъы тахшагьары Буйнакск артдагъы вакъти гьакимден тюзелмей деген пикру шагьарлыланы арасында кёп айтыла турду. Не буса да шагьарда ёлбашчы сайлав яда белгилев кёп сюрюне.



Эки-уьч йыл алда Буйнакск шагьарны башчысы этилип Закарья Амиров белгиленген эди. Тек Закарья Амиров о замангъы республиканы Башчысы Рамазан Абдуллатипов булан къы­йышып ишлеме болмады. Олар о вакъти бир-бири булан эришип сёйлегенни, бир-бирине айтгъан яман сёзлени шагьарлыланы арасында эшитмегени ёкъдур. Шолай, бир-биревге къаршылыкъ да узатылып турду. Артда да шагьарбашчысы Закарья Амиров отпускагъа чыгъып, орнуна Осман Османовну къоюп гетди.



Осман алда да Буйнакск шагьарны башчысы болуп ишледи. О вакъти шагьарда яхшы янындан этилген алышынывлар да бар эди. Сонг ол Магьачкъала шагьарны Совет районуну башчысы болду. Ондагъы ишинден тайгъан сонг дагъы да Буйнакск шагьаргъа къайтды.



Шагьарлылагъа, озокъда, гьаким ким болса да, иш гёрсетсе, шо тарыкъ. Тек мекенли гьаким болмай туруп, шагьар да тюзелмес.



Закарья Амиров ишлеме башлагъанда, ону гьаракаты гёрюнме де башлагъан эди. Шагьар майданына асфальт тутулду. Майдандан район администрациясыны бинасына барагъан орамгъа да тратуар плиткалар салынды. «Дагъыс­тан» деген кинотеатр ярашдырылды. Шагьар бавну онгарма сюе эди. Тюзю, нечесе йылланы узагъында шагьар баву къаравсуз къалгъанны шагьарлылар яхшы биле.



Буйнакск шагьарда этилме герек ишлер кёп. Оланы яшавгъа чыгъармакъ учун мекенли гьаким болмаса бажарылмай. Шагьарлыланы бирлери, оьзю­бюз сайлайыкъ шагьарны башчысын деп де юрюдю. Оьр гьакимлер башгъача ойлаша буса ярай, шо гьаракат яшавгъа чыкъмады. О вакъти Рамазан Абдуллатипов республиканы ёлбашчысы эди. Буйнакск шагьарны башчысы этилип Магьачкъаладан Закарья Амиров белгиленип гелди. Тек ол не буса да гёнгю булан гьаракат юрютмейгени гёрюне эди.



Сонг ол оьзюню указы булан алда да Буйнакск шагьарны башчысы болуп ишлеген Осман Османовну шагьар башчысыны биринчи заместители этип белгилей, оьзю бир нече айлагъа отпускагъа гете, шо заманны ичинде баш гьакимни иш ихтиярларын огъар тапшура.



Алдагъы шагьарбашчы Гьюсен Гьамзатов отставкагъа йиберилгенде, ону орнуна Осман Османовну салма гьаракат юрютгенлер де кёп болду. Болса да, Буйнакск шагьаргъа башчы этилип аз замангъа башгъа адам гелди.



Сайлавлар болгъунча 5 гюн къалып, сентябр айны 8-нде, шагьар депутатланы гезиксиз оьтгерилген сессиясында Гьюсейн Гьамзатовну депутатлар шагьарбашчы этип айыра. Сонг Гьамзатов авруйгъан саялы отпускагъа чыкъгъан. Ону орнуна Ильяс Мамаев тюшген. Гьамзатовну отставкагъа чыгъаргъанда, ол рази болмайлы, судгъа арза язгъан. Суд да ону тилевюн къабул этмеген.



Бир йыл оьтгерилген сайлавларда «Ветеранланы партиясы» уьст гелип, оланы лидери Осман Османов шагьарны башчысы болма онгарылып турду. Магьачкъала ону белгилемеди.



Буйнакск шагьарлыланы эсли наслусу, Османовну яхшы таныйгъаны саялы болгъанмы яда оьзге себеплерден болгъанмы, билмеймен, ону гьаким этебиз деп айланагъан вакътиде кюйсюзлюклери чыкъма башлагъан. Эришивлюклер къаркъарагъа хайыр гелтирмей, ол гечинди.



Халкъ учун кёп зат тарыкъ тюгюл. Шагьарны орамлары таза турса, ичмеге сув болса, шо – биринчи талап. Бугюн республиканы алдынгъы тахшагьары таза шагьар деп айтма болмайбыз. Сув етишмейгени де халкъны бек къазапландыра. Гьакимден тюзелмей тургъанлыкъ хыйлы четимликлер гелтиргенине инанма тюше.



Буйнакск шагьарда баш гьаким оьзюню ихтиярларын толу кюйде къолламайгъангъамы яда негердир, шо вакътилерде бирдагъы халкъны авзуна тюшеген гьал тувулду. Шагьардагъы медучилищени директору этилип Магьачкъаланы биринчи номерли «женская консультация» идарасыны ёлбашчысы болуп ишлейген Патиматзагьра Гьажиева гелди.



Алдагъы директор Абдулла Гьюсейнов авруйгъанлы уьч ай бола болгъан. Ону къуллукъларын кютмек учун Магьачкъаладан адам йибергенлер. Тек училищени коллективи Патиматзагьраны «хошгелди» деп къабул этмеген. Олар гьатта ону директорну кабинетине гирме къоймайбыз деп тутгъан. Полиция къуллукъчулары къошулмагъан эди буса, къалмагъал тез арада битмей, созула болгъан. Артда да П. Гьажиеваны директорну къуллугъуна тюз белгилегенликни гьакъында прокуратура ахтарыв иш юрютген.



Буйнакск шагьар артдагъы йылларда оьзюню алдагъы аривлюгюн, яшама онгайлы­гъын тас эте барагъанны шагьарлылар нече де арив анг­лай. О гьакъда айтагъанланы кёбюсю шогъар себепли мекенли гьаким болмагъан экенин эсгере. Еси ёкъну бёрю ашар деп негьакъ айтылмай. Шагьар башчыдан тюзелмей турду.



Буссагьатгъы вакъти Буйнакск шагьарны башчысы болуп Нургьудаев ёлдаш ишлей. Минадан тляраталы болса да, ол Буйнакскиде тувгъан. Озокъда, ону Абдуллатипов салгъаны англашыла. Не башгъа, ишин гёрсетсе, ким таклиф этгени, салгъаны биревге де зарал этмей. Тек къачан буса да, заман гелип, шагьарда гьал алышынмаса болмай.



Гьакимден тюзелгенми, тюзелмегенми, ону гьали де анг­лама къыйын. Олай токъташдырывланы заман гетсе тюгюл, айтма бажарылмай.



Авторизация
*
*
Регистрация
*
*
*
Согласны с условиями сайта?
Генерация пароля