Ачыкълашдырып айтгъанда, 17 уьлкеден гелген 200-ден де артыкъ кочап оьзлени арасында 8 тюрлю авурлукъда тогъатартывну барышында дагъыстанлы спортчулар лап яхшы натижалагъа етишген. Дейгеним, 5 тюрлю авурлукъда алтын медаллагъа ес болуп, Дагъыстанны жыйым командасы биринчи ерни алгъан.
Шу ерде шо турнирде алтын медальгъа ес болгъан Завур Угаевни (57 кило), Агьмат Чакаевни (61 кило), Ильяс Бекболатовну (65 кило), Агьмат Гьажимагьамматовну (74 кило), Даурен Куруглиевни (86 кило) атларын эсгермеге тюше. Къаягентли кочап Ильяс Бекболатовну уьстюнлюгю гьакъында айтсам, турнирни финал тиретинде ол россиялы спортчу Чермен Валиев булан тогъатартгъан ва шо ёлугъувну 7:3 санав булан утгъан.
Сонг да, уьч дагъыстанлы кочап: Артём Гебеков (57 кило), Гьажимурат Рашитов (61 кило), Расул Магьамматов (97 кило) шо турнирде гюмюш медаллагъа лайыкълы болгъан. Шондан къайры да, Зелимхан Абакаров 57 кило, Нариман Исрапилов 57 кило, Магьамматгьабиб Къадимагьамматов 70 кило авурлукъда бронза медаллар къазангъан.
Къызланы арасында шо турнирни оьлчевюнде оьтгерилген ярышларда Милана Дадашева да 48 кило авурлукъда бронза медаль алгъан. Гьасили, Иван Ярыгинни атындагъы халкъара турнирни тарихинде дагъыстанлы кочаплар бу гезик лап яхшы оьрлюклени къолда этмеге бажаргъан.
Иван Ярыгинни атындагъы халкъара турнирни барышында алдынлы ерлени къазангъан дагъыстанлы кочаплар итнигюн, январ айны 30-нда, оьзлени ватанына къайтгъан. Шо гюн оланы Магьачкъаладагъы аэропортда ДР-ни физкультурагъа ва спортгъа къарайгъан министерлигини ёлбашчылары, кёп санавдагъы къардашлары, олай да къурдашлары къаршылагъан.
– Шо турнирге бизин кочаплар ёл чыгъагъанда биз олар, лап кёп айтгъанда, 3 алтын медальгъа ес болажакъ деп къаравуллай эдик. Гьакъыкъатда буса бир де гёзленмеген кюйде олар 5 алтын медаль къазанып къайтдылар. Шексиз кюйде, шо бизин учун уллу уьстюнлюк гьисаплана. Жыйым команданы тренерлерини, бизин министерликни, спорт ябушувну федерациясыны, умуми кюйде алгъанда, бизин республиканы ёлбашчыларыны ортакъ гьаракатыны натижасы болуп токътай. Сиз етишген гёрмекли оьрлюкню гьакъында Дагъыстанны Башчысы Рамазан Абдулатипов да биле. Ол да сизин къутлай. Шо турнирде етме бажаргъан уьстюнлюклер сизин учун дагъы да артыкъ даражадагъы ярышларда ортакъчылыкъ этежек бизин уьлкени жыйым командасына къуршалмагъа ёл ача, – деген шо гюн жыйылгъанланы алдына чыгъып сёйлей туруп, ДР-ни физкультурагъа ва спортгъа къарайгъан министри М. Магьамматов.
Бизин мухбирибиз.
СУРАТЛАРДА: (оьрде) И. БЕКБОЛАТОВ;
(тюпде арт сыдырада) З. УГАЕВ.
