Таргъутавда – ат чапдырывлар


  Пятница, 23.03.2018г. - "Ёлдаш" газет 


Алдагъы гюнлерде Таргъутавда ат чапдырывлар оьтгерилген. Шо ёрукъдагъы ат чапдырывлар бизин республикада биринчилей болгъан деп айтмагъа ярай. Нечик де, токъташдырылгъан гесимлеге гёре, шонда ортакъчылыкъ этеген спортчулагъа атланы арытмай, алданокъ белгиленген мезгилни лап яхшы заманны гёрсетип оьтмеге тюшген.


 


Дагъыстанны ат чапдырыв федерациясыны сиптечилиги булан юрюлген шо ярышларда «Джигит» («Игит») деген ат чапдырыв-спорт школасына юрюйгенлерден къайры да, «Горец» («Тавлу») ва «Ахмад» («Агьмат») деген, олай да «Узден» («Оьзден») деген спортну милли жураларыны центрына гиреген клублагъа къуршалгъанлар жагьлы кюйде ортакъчылыкъ этген.



Милли кавказ уьст опуракълар, демек, чепкен ва бёрк гийген ярышланы бары да ортакъчылары Таргъутавну этегинден таба оьтеген белгиленген хас ёлдан ерленген атлар булан 30 чакъырым ёл алгъан. Шу ёрукъдагъы ат чапдырывлар биринчилей оьтгерилегени гьисапгъа алынып, алдынлыкъ алгъанлар белгиленмей, оланы барышында ортакъчылыкъ этген бары да спортчулар гьюрметлев грамоталар булан савгъатлангъан.



«Узден» деген спортну милли жураларыны центрыны вакили Жанболат Магьтибеков бизге билдиргени йимик, шо ярышлар оьтгерилген сонг спортну ат чапдырыв журасына байлавлу гьакълашыв-генгеш оьтгерилген. Шону Россияны ат чапдырыв федерациясыны бюросуна къуршалгъан оьр даражалы судья Руслан Гекиев юрютген. Ол жыйылгъанлагъа инг алда спортну эсгерилген журасыны тарихи гьакъда айтгъан. Шону булан бирге, ерленген атланы ортакъчылыкъ этивю булан оьтгерилеген мердешли оюнланы гьакъында англатыв берген. Шондан къайры да, хыйлы йылланы узагъында топлангъан сынавуна асасланып, ол ат чапдырыв булан машгъул болагъан спортчуланы кёп санавдагъы соравларына жаваплар къайтаргъан. Атгъа къуллукъ этивню, ону гьар тюрлю аврувлардан къоруп сакълавну шартларын малим этген.



Авторизация
*
*
Регистрация
*
*
*
Согласны с условиями сайта?
Генерация пароля