Герменчикни Юлдузу

Бизин пачалыкъда къатынгишилер жамиятны бары да тармагъында этек чалып чалышалар. Олар эренлерден артда къалмай, оьзлеге тапшурулгъан ишлени намуслу кюйде, гьюнерин де къоллап яшавгъа чыгъара. Къатынгишилер аслу ерни тутагъан тармакълар аз тюгюл. Айрокъда олар савлукъ сакълав, билим берив тармакъларда ишлейгени адатлангъан мердешге айланып къалгъан.



Ата-аналар къызъяшланы тарбиялайгъанда да оланы башына гиччиден тутуп, доктор яда муаллим болса чы яхшы эди деген ойну сингдире. Муна шолай гиччиден доктор болма сюеген Юлдуз Умалатова да, мурадына етип, бугюнлерде савлукъ сакълав тармакъда адамланы разилигин ва баракалласын алып ишлей.


Юлдуз 1966-нчы йылда Бабаюрт ра­йонну Герменчик юртунда Ярашны ва Илмуханны агьлюсюнде тувгъан. 1981-нчи йылда школаны битдирип, Къызлар шагьардагъы медицина училищеге уьстюнлю кюйде экзаменлер берип, шондагъы фельд­шерлер гьазирлейген бёлюгюне тюше.


Ол Къызлар шагьарда охуву нечик тез гетгенни де гьис этмей. Охувгъа муштарлы къыз шонда алгъан билимлерин ишинде къолламагъа алгъасай.


Огъар шолай имканлыкъ 1985-нчи йылда тува. Дейгеним, хас охув ожакъны тамамлап, Къызлар шагьардагъы больницада загьмат ёлун башлай.


Амма онда ол кёп заман чалышмай. Яшав шартлар алышынып, 1988-нчи йыл агьлюсю булан Къазахстангъа гёче. Новый Узень деген шагьардагъы больницаны травмотология бёлюгюнде медсестра болуп кёп сюеген касбусун узата.


Ят элде солтан болгъунча, ватанында ултан болса да яхшы деген ата-бабаланы сыналгъан айтыву бар. Шо айтывгъа гёре, ят ерлерден эсе, тувуп-оьсген элинг яхшы дегенлей, 1990-нчы йылда Юлдуз Умалатова ата юрту Герменчикге къайта.


О замангъы Бабаюрт район больницаны баш врачы Рашитхан Ирбайханович Магьмутов ону поликлиникагъа ишге сала. Сонггъа таба загьматгъа янашывун ва огъар берилгенин гьис этип, ону Герменчик юртдагъы фельдшер-акушер пунктгъа ишге бакъдыра.


Муна 26 йылланы боюнда Юлдуз Умалатова юртундагъы адамланы савлугъун беклешдирмек учун къасткъыла. Юртлуланы абурун ва гьюрметин къазанмакъ тынч иш тюгюл. Юлдуз буса оьзюню сав-саламат иши булан, халкъ арада абур-сыйны тезден къазангъан.


Юлдуз Умалатова – гиччи яшланы савлугъун багъагъан медсестра.


–Мен тергевге алгъан юртда 457 яш бар. Заманында ти­йишли чараланы гёребиз. Неге тюгюл де, вакътисинде тийишли чараланы оьтгерсе, къайсы аврувну да алдын алма, енгиллешдирме бола. Яшлагъа гезиги гелгенде тарыкълы дарманланы этебиз. Ата-аналаны арасында да англатыв ишлер оьтгеребиз. Къолубуздан гелеген кёмекни этебиз,–дей Юлдуз Умалатова.


Ол яллыкъ билмей, арымайлы-талмайлы, къышы-язы булан иш уьстюнде табыла. Оьзюню борчларына жаваплы кюйде янаша. Яшланы савлугъуна уьстденсув янашма тюшмейгенни яхшы англай.


Юртда турагъанлар бир-биревню гьалын-гюнюн биле, яхшы таный. Гьар адамгъа ишине, турушуна гёре де багьа бериле. Юлдузну гьакъында юртну абурлу тамазасы Гьюсейн Ойболатов айтгъан сёзлени эсгерме сюемен:


–Юлдуз бизин агьлюню «акъ халатлы» малайиги десем, бир де къопдурув болмас. Уланым Муслим гиччи чагъында кёп авруй эди. Гюн де, гече де Юлдузну рагьатсызландырып, чакъырма тюше эди. Заманында тийишли чаралар гёрюп, ол яшны савлугъун беклешдирди. Гьали де уланымны авлети Амир де Юлдузну тергевюню тюбюнде тура. Мен Юлдуз Умалатовагъа бары да ата-аналаны атындан баракалла ва разилик билдирме сюемен,–дей ол.


Юлдуз Умалатова учун юртлуланы алгъышлары, разиликлери–уллу савгъат ва насип. Неге тюгюл де, юртлуланы алдында ону бети ярыкъ ва юзю ачыкъ.


Ол эртенлер сююне туруп ишге де бара, ахшамлар буса шо къуванчлыкъ сёнмей, гёнгюллю кюйде ожагъына да къайта. Къатынгишиге шондан уллу насип болармы?


Яннавурунда табылагъан оьмюр ёлдашы Юсуп булан уьч авлетни оьсдюрген. Олар да билимлеге ес болуп, ожакъ къуруп, оьзлер де ата-аналар болгъан.


–Гиччи къызыбыз Зара Моск­ва шагьардагъы 30 номерли медучилищени битдирип, ондагъы Бурденкону атындагъы госпитальда нейрохирургия бёлюгюнде операционный медсестра болуп чалыша,–дей Юлдуз, гиччи къызыны гьакъында хабарлай туруп.


Савлукъ байлыкъ деп негьакъ айтмайбыз. Савлукъ сакълав тармакъда ишлейген адамлар къачан да абур-сый къазана гелгенлер.


Юлдузну гьакъында айта туруп, ону булан янаша гьаракат этегенлени атларын да эсгерсек арив болур деп ойлашаман.


Бугюнлерде Герменчик юртдагъы фельдшер-акушер пунктну заведующийи болуп ишлейген Зугьра Ибрагьимованы, мед­сестралар Райса Бутаеваны, Сапият Ибрагьимованы атларын юртлулар уллу гьюрмет булан эсгерелер.


Загьматгъа берилеген адамлар кёп болса, бизин бары да тармакъларда юрюлеген ишлер кёп алгъа баражакъ ва тюзележек эди.


Савлукъ сакълавну къуллукъчуларындан адамны савлугъу гьасил бола­гъанны унутма тюшмей. Юлдуз Умалатова йимик намуслу касбучулар кёп болсун.


Бэлла Гьажигелдиева,


РФ-ни журналистлерини союзуну члени.


Суратда: Юлдуз Умалатова


ишни уьстюнде.

Авторизация
*
*
Регистрация
*
*
*
Согласны с условиями сайта?
Генерация пароля