Яшавну генг ва эркин ёлларына тюшме Аллагьым сагъа кёмек этсин!

Муна бирдагъы охув йылны ахыры етишип геле. Ону ахырында натижалар чыгъарыла: етишген уьстюнлюклерден къуванабыз, этилмеген ишлени   этмеге гёз алгъа тутабыз. Оьтген йылларда йимик, бу йыл да конкурслар, олимпиадалар оьтгерилди. Къакъашурада (Къарабудагъгент район) 2 номерли орта школаны охувчулары да шоларда ортакъчылыкъ этдилер. Яхшы ортакъчылыкъ этди десек де ялгъан болмас, неге тюгюл олимпиадалардан – 37, конкурслардан 40-дан да къолай савгъатлы ерлерибиз бар. Шоланы 10-су – республиканы оьлчевюндеги ерлер.

Шолай ерлер алгъан охувчуларыбызны арасындан Марат Алчагъыровну айрыча эсгерме сюемен. Марат – 11-нчи класны охувчусу. Оьзюню охуву ва тарбиясы булан ону оьзге охувчуланы арасындан айырма бола. Ону охуву ва тарбиясы оьзге уланлагъа да, къызлагъа да уьлгю демеге ярай. Уланына яхшы тарбия берген саялы, атасы Садиритдинге, анасы Лайлагъа школаны муаллимлерини атындан баракалла билдирмеге сюебиз.

Марат бу йыл болгъан район олимпиадаларда кёбюсюнде ортакъчылыкъ этген ва савгъатлы ерлер алгъан: географиядан, экологиядан, биологиядан биринчи ерлери, историядан уьчюнчю ери бар. Атий Сотавовна Далгьатованы гьаракаты да булан Марат географиядан болгъан республика олимпиадада уьчюнчю ерге ес болгъан.

Шолай яхшы уьстюнлюклери баргъа, Алчагъыров Маратны «Пагьмулу яшлар – Дагъыстанны гележеги» деген энциклопедия китабына гийирген. Бизин мактапда шулай пагьмулу, гьаракаты булангъы охувчулар баргъа бек къуванабыз, оьктем болабыз.

Марат гьали ЕГЭ-леге гьазирлене. Ол сав гюнлер мактапда бола, класдан тышда къалып охуй. Мактапны битдирсе, Марат медакадемиягъа тюшме сюе.

Уьстюнлю кюйде экзаменлер де берип, сен сюйген охув ожакъгъа да тюшюп, яшавну генг ва эркин ёлларына тюшме Аллагьым сагъа кёмек этсин!


Къакъашура юртдагъы 2 номерли орта школасыны «Тангчолпан» деген кружогуну ёлбашчысы

Лайлаханум БИЛАЛОВА.


Авторизация
*
*
Регистрация
*
*
*
Согласны с условиями сайта?
Генерация пароля