Охувчулагъа малим этилди


Бир нече йыл алъякъда уллубийавуллу шаир Багьавутдин Саматовну «Умут» деген китабы чыкъды. Шо да – ол поэзияны ёлунда алынгъан биринчи абаты, чебер адабиятда ол артлангъан биринчи канзи болуп токътады. Бугюнлерде буса Б. Саматовну къаламындан тюшген «Алгъа абат» деген китабы «Абусупиян» деген басмаханада бир минг тираж булан чыгъып охувчулагъа етишди.
____________________________________________________________________




Уллубийавулну администрациясыны ва юрт мактапны муаллимлерини ва охувчуларыны сиптечилиги булан талатгюн, апрель айны 18-нде, шо китапны охувчулагъа малим этивге багъышлангъан жыйын оьтгерилди. Шону барышында Къарабудагъгент районну гьакимбашыны биринчи орунбасары А. Гьажиев, эсгерилген гьакимлик къурумуну социал масъалалагъа къарайгъан управлениесини ёлбашчысы Г. Темирова, Уллубийавулдагъы орта мактапны ёлбашчысы М. Умаева, «Районну яшаву» деген газетни редактору М. Канзитдинов, тарихчи, алим Ю. Идрисов, олай да кёп санавдагъы гелген къонакълар ва ата юртлулары Багьавутдинни басмадан чыкъгъан китабы булан къутлап сёйледи.


Китапны аты да гертилейгенде йимик, ону пагьмусу баргъан сайын оьсегенин охугъанлар да айтды. Шону булан бирге, Багьавутдин шиъруларында ата юртуну, халкъыны гележеги, ону эревюллюлерини къысматына жаны авруйгъаны билинегенин гертиледи.


Охувчу яшлар къурчун къандырып ону шиъруларын охуду, оланы макъам­гъа салып, йырлап айтды. «Фиалка» деген яшлар бавунда тарбияланагъан гиччипавлар да оьз­лени чыгъышлары булан жыйылгъанланы харс урувларын къазанды.


Оьз гезигинде Б. Саматов гелгенлеге рази­лигин билдире туруп, чебер сёзню уьс­тюнде мекенли кюйде ишлеп, чебер асарлар яратмагъа къастлы экенин айтып, артдагъы вакътилерде язылгъан бир нече шиърусун да охуду.


 


Н. БАЙБОЛАТОВ.

 

Авторизация
*
*
Регистрация
*
*
*
Согласны с условиями сайта?
Генерация пароля