Адабиятны тарихинде асил варислик къойгъан

Шо чараны Дагъыс­танны Гьукуматыны Председатели А. Гьамитов ачгъан. Ол оьзюню сёйлевюнде Агьматхан Абу-Бакарны яратывчулугъу Дагъыстан адабиятны оьсювюнде аслу ерни тута деп белгилеген.

–Язывчу бугюнлеге ерли агьамиятлыгъын, яшавну гертилигин тас этмеген варислик къойгъан. Ону китапларын гьар тюрлю девюрню вакиллери кёп сююп охуйлар, олар дюньяны кёп халкъларыны тиллерине гёчюрюлюп чыкъгъан. Агьматхан прозасында, поэзиясында, драматургиясында ватанына бакъгъан таза сюювню ва бир-биревге инанагъанлыкъны суратлай. Ондан къайры да, гьалиги девюр учун ону яратывчулугъуну кёп уллу маънасы бар, тарыкъ да дюр. Бизге бир заманда да болмагъан кюйде рагьмулукъ да, бир-биревню англав да, дослукъ да, инаныв да, гертилик де, тюзлюк де тарыкъ. Агьматхан Абу-Бакар адабиятны тарихине инг гёрмекли яратывчу, оьзюню милли маданиятыны вакили гьисапда гирген. Дагъыстанда чебер киноланы девюрю ону яратывчулугъу себепли болуп башлангъан. Ону асарларына, сценарийлерине гёре милли адатланы, къылыкъланы гёрсетеген нечесе фильмлер чыгъарылгъан. Агьматхан Абу-Бакар Дагъыстанда сийрек ёлугъагъан кинематография майданны къургъан язывчу десек, къопдурув болмажакъ. Ону кинолар чыгъармакъ муратда асарлар яратгъанлыгъы оьзюню ватаны, эли, халкъы учун багьасы ёкъ савгъат болуп токътады. Агьматхан Абу-Бакар адабиятны тарихинде оьзтёречелиги ва пагьмусу булан адамурлукъну ругь байлыкъларыны оьр канзисине етишген язывчу гьисапда къалгъан,–деп эсгерген Абдусамат Гьамитов.

Олай да, Агьматхан Абу-Бакар 8 пьеса язып, Дагъыстанны театр инчесаниятыны тарихине шайлы къошум этген. Олар буссагьатда да театрны репертуарындан таймай. «Драматург Абу-Бакарны пагьмулугъуна СССР-ни халкъларыны драматургиясыны ва театр инчесаниятыны экинчи бютюнсоюз фестивалында да оьр багьа берилген. Шонда ону «Иди и найдёшь» деген пьесасына СССР-ни язывчуларыны союзуну ва Маданият министерлигини биринчи савгъаты берилген, –деп къошгъан А. Гьамитов.

Ол оьзюню сёйлевюн узата туруп, Агьматхан Абу-Бакарны яратывчулукъ ва жамият чалышывчулугъу Загьмат Къызыл Байракъ, «Халкъланы дослугъу», «Гьюрметлев белгиси» деген орденлер, олай да ДАССР-ни пачалыкъ савгъатыны лауреаты, Оьр Советини Президиумуну гьюрметлев грамоталары булан белгиленгенни де айтгъан.

Шо ахшам ДГУ-ну ректору Муртазали Рабаданов, Дахадаев районну башчысы Жарулла Омаров, ДР-ни Халкъ Жыйыныны депутаты Людмила Авшалумова, халкъ язывчу Магьаммат-Расул Расулов да Агьматхан Абу-Бакарны асарлары бугюн де ­оьзюню маънасын тас этмегенни айтгъан ва ону яратывчулугъуна оьр багьа берген.

Юбилей ахшамны ахырында Дарги театрны артистлери оьзге миллетлени белгили йыравлары булан бирге гьазирлеген концерт программасы гёрсетилген.

Авторизация
*
*
Регистрация
*
*
*
Согласны с условиями сайта?
Генерация пароля