Мы в Instagram:

Instagram

XML имеет неверный формат

Халкъны юреклеринде яшажакъ |

       


Террорчулукъ – жамиятыбызны алдында токътагъан лап да уллу балагь. Къарт­ны да, яшны да аямайгъан, беллерине бомбалар да тагъып оьзлер де оьлеген, оьзгелени де оьлтюреген террорчулар бизин бугюнгю яшавубузну татывун алагъан белгиси болуп битген.

__________________________________________________________________


Билдирилмеген дав бизин арабыздан лап да сайламлы ватандашларыбызны ала. Оьзгесин айтмагъанда, артдагъы 20 йылны ичинде шо дав Бабаюрт районда аманлыкъ сакълав къурумланы 19 къуллукъчусуну жанын къыйды.

Террорчулар булангъы дав бизде бугюн башланмагъан. Гьалиден 21 йыл алда Къызлар шагьарда ва Хасавюрт районну Первомайск юртунда болгъан урушлар шо уллу ва намарт «давну» башлапгъы балагьларындан болуп токътады. Шо къувунлу гюнлерде бабаюртлу эки жагьил улан халкъыбызны эркинлиги учун оьзлени жанларын къурбан этдилер. Шоланы бириси старший лейтенант Арзулум Арзулумов эди… Ол даимге оьзюню 29 яшында эсибизде къалды…

Арзулум Арзулумов 1966-нчы йылда Бабаюртда Абдулвагьит ва Зоя Арзулумовланы агьлюсюнде тувгъан. Ол яшдан тутуп гьар негер де пагьмулу оьсе. Айрокъда ону тергевюн къурулушлар тарта. Бабаюртдагъы 1 номерли школада охуйгъан йылларында да ол янгыз яхшы къыйматлагъа охуй, оьзюню гележегин къурулушлар булан байламагъа умутлу бола. Яшав себеп­леге гёре уьягьлюсю Хасавюрт шагьаргъа гёчгенде, Арзулум охувун шагьардагъы уьч номерли орта школада давам эте.

Охувун оьр даражада тамамлап, ол Магьачкъаладагъы политехника институтуну къурулуш факультетине охума тюше. Институтну 2-нчи курсунда охуйгъан вакътисинде ол гёнгюллю кюйде Ватаныны алдындагъы асгерлик борчун кютмеге гете. Аз заманны ичинде Арзулумов командирлерине оьзюн инамлы ёлдаш ва къоччакъ солдат гьисапда таныта. Асгер ёлдашларына уьлгю болуп ватандаш борчун намуслу кюйде кюте.

Болжалы битип, 1987-нчи йылны май айында Арзулум уьюне къайта ва охувун давам эте. 1990-нчы йылда къолуна инженер-къурувчуну дипломун алгъан Арзулум Хасавюртдагъы «Промжилстрой» деген бирлешивде уста болуп загьмат ёлун башлай. Буса да, уясында не гёрсе, учувунда шону этер дегенлей, Арзулум атасыны ёлуна тюшмеге ва халкъны аманлыгъын якъламагъа токъташа. Шо хыяллар булан ол 1991-нчи йыл Бабаюрт ич ишлер бёлюгюнде ОБХСС-ни къуллукъчусу болуп ишлемеге башлай.

Заман гете. Арзулум иш ёлдашларыны арасында абур-сый къазана. Ону ишине гьакъ юрекден янашагъанын гёрюп, бёлюкню башын тутгъанлар Арзулумну Саратовдагъы ич ишлер министерлигини оьр школасына бакъдыра. Лейтенант чинге ес болгъан Арзулумгъа, арадан заман оьтюп, ста­рший лейтенант деген чин де бериле.

Арзулум ич ишлер бёлюкню ёлбашчыларыны таклифине гёре 1995-нчи йылда Нальчик шагьардагъы Россияны ич ишлер министерлигини оьр школасы­на заочно охума тюше. Шо йылны гьасиллерине гёре Арзулум лап да яхшы ахтарывчу деп белгилене ва экономика жинаятчылыкълагъа къаршы иш гёреген бёлюкню жаваплы къуллукъчусу болуп чалыша.

Арзулум ата-анасындан, агьлюсюнден, яшларындан ва кёп сююп тангла­гъан касбусундан къуванып яшав къура. Тек... 1996-нчы йылны ялынлы гелген январ айы дагъыстанлыланы эсинден бир де таймажакъ. 9-нчу январда тишине-тырнагъына ерли савутлангъан Салман Радуевни террорчулары Къызлар шагьардагъы больницаны къамавгъа ала. Шагьарлылар уллу къоркъунч­лукъгъа тарый. Террорчулар булан сёйлешивлер башлана. Автобуслагъа юкленген террорчулар Къызлардан Бабаюртгъа багъып тербене. Ёлда олагъа бир четимлик де болмай. Хасавюрт ра­йонну Первомайск юртуна етишгенде, террорчуланы планлары бузула ва олар савлай юртну къамавгъа алып токътайлар. Атышывлар башлана. Шо вакътиде отпус­када ял алагъан Арзулум, оьзю отпускада экенине де къарамайлы, оьз элине къыйын гюн тувгъанда, Бабаюрт районну ич ишлер бёлюгюнден Первомайск юртуна бакъдырылгъан къуллукъчуланы ал сыдыраларына тюше.

18-нчи январгъа чыгъагъан гече Бабаюртдан бакъдырылгъан милиционерлер террорчулар булан тенгсиз урушгъа гирише. Шо урушда бабаюртлу милиционерлер Мавлет Чатаев ва Жанболат Магьмутов яраланалар, Арзулумну ва ону иш ёлдашы Забит Мартункаевни яшаву буса ярты ёлда къыркъыла.

Арзулум Арзулумовну оьмюрю, ёлу къысгъа болса да, ол гёрсетген къоччакълыкъ гьалиден сонг гележек наслулагъа да ачыкъ уьлгю болуп токъта­гъан. Оьлгенден сонг Арзулум Арзулумов Къоччакълыкъны ордени булан савгъатлангъан.

Бабаюртдагъы 1 номерли орта школагъа Арзулум Арзулумовну аты къоюлгъан. Школаны муаллим коллективи ва охувчулары игит уланны атын бир мюгьлетге де унутмайлар. Ону эсделигине багъышланып школада тюрлю-тюрлю чаралар, эсделик ахшамлар оьтгериле. Арзулум Арзулумов тувгъанлы 50 йыл битегенликге байлавлу чараны да олар генг кюйде оьтгердилер. Эсделик ахшамда районну башын тутгъанлар, Арзулумну атасы, милицияны отставкадагъы подполковниги Абдулвагьит Арзулумов, юстицияны генерал-майору, СССР-ни МВД-сини ат къазангъан къуллукъчусу Рустем Кайтаров, Хасавюрт шагьарны ветеранларыны советини ёлбашчысы Зайбодин Омаров, Арзулумовну ювукълары, къардашлары ва танышлары ортакъчылыкъ этдилер.

Къайгъылы чараны ача туруп, «Бабаюрт ра­йон» деген ерли гьакимликни ёлбашчысыны орунбасары А. Абсаламов, террорчулар булан ябуша туруп оьлюп гетген аманлыкъ сакълав къурумланы къуллукъчуларыны атлары гьаман да халкъны юреклеринде яшажакъны айтды.



Герейхан ГЬАЖИЕВ,

бизин мухбирибиз.

СУРАТДА: Арзулум АРЗУЛУМОВ.



Количество показов: 89

Комментарии (0)




Возврат к списку

 



Важные новости

Актуальные новости

              Дорогие друзья!

Присоединяйтесь к нам в соцсетях


insta.jpg

                




1.jpg

2.jpg

3.jpg

4.jpg

5.jpg

9.jpg

10.jpg


ਠ ­®¢®áâ¨.jpg

ªà « â¢.jpg

ANADOLU AJANSI.jpg

haberturk.jpg



AlfaSystems massmedia K3FN2SA