Яшавгъа чыкъмагъан умутлар

   

Пятница, 13.04.2018г. — «ЁЛДАШ».


8-нчи апрелде  Каспийск шагьарны Анжи-Аренасында ойналгъан Россияны чемпионатыны 25-нчи турунда магьачкъалалы «Анжи» турнир таблицада экинчи ерде барагъан москвалы «Спартакны» къабул этди.


 


Оюн битгенде, «Анжини» президенти Осман Къадиев: «Оюнну баш судьясы Сергей Лапочкин – бу ёлугъувну баш игити!» – деп, масхара-герти баянлыкъ берди. Айтгъанлай да, Лапочкин шо оюнну «Спартак» утсун деп не бола буса да этди. Ёкъ ерде, оьзю ойлашып, бизин къапугъа берген пенальти, тап-таза офсайтдан бизинкилеге гийирилди. Ондан къайры, дагъы да кёп мюгьлетлер болду судья къонакъланы янын тутгъан.



Ёлугъувну башындан тутуп, Лапочкин бизин команданы къыйыкъсытажагъына шеклик этмесе де, шу оюндан бир очко сама къазанарбыз дейген къаравчуланы умутлары уьзюлдю.



«Эки мингинчи йылларда шу судьяны атасыны таъсиринден бизин команда уьчюнчю ерден къуру къалды, къайдан ва ким салгъан» буланы судья этип Россияны чемпионатына!?»  «Шулай судьялар бар туруп, Россияда бир заманда да футбол болмажакъ!  Бу не сатыв-алывдур!?» –  деп къарсалайгъанлар кёп эди. Мен ойлашагъан кюйде, шулай болду:  Бизин оюн башлангъынча бир нече сагьат алдын биринчи ерде барагъан Сёминни «Локомотиви» Ростовда оюнун башлап, о оюнну утуп, экинчи ерде барагъан «Спартакдан» беш очкогъа алгъа чыкъды. Гьали бу оюнну «Спартак» «Анжиге» утдурса чемпионлукъдан «Спартакгъа» умут уьзме тюше эди. Охувчулар мени англады деп эсиме геле! Англамай да не бар мунда; шо заман Москвадан бир зенг урула Лапочкинге: «Не сюйсенг эт, тек «Спартак» шу оюндан уьч очко къазанма тарыкъ!» – деп!  Къазанма да къазанды чы!



Не этейик, бизин футболда шолай гьал гьали де бар. Биревге де, бир къаравчугъа да янгылыкъ тюгюл судьялар даим «Зенитни», ЦСКА-ны, бары москвалы командаланы, айрокъда «Спартакны» янын тутагъаны, олагъа ян тартагъаны. О гьакъда футбол касбучулар, тренерлер, журналистлер ачыкъдан-ачыкъ нече керен де айтды, тек гьалиге футбол федерацияда шу масъаланы салып ахырына чыкъма къарайгъан адам ёкъ.



Шолайлыкъда, биринчи таймда Промесни уьч голуна (бириси –офсайтдан, бириси – судья ойлашып чыгъаргъан пенальтиден, бириси де бизин якълавчуланы хатасындан гийирилген топгъа) Лескано бир гол булан жавап берди. Сонг къапучубуз Будаковну янгылышындан «Анжи» бирдагъы топ йиберди. Не болса да, оюн битип къалгъынча бизин команда умут уьзмей, судьяны ахырынчы сызгъырывуна ерли ойнады.



Гелеген оюн тыш футбол майданда питерли «Зенит» булан болажакъ. Чемпионат тамамланма беш тур къалды, «Анжи» – он дёртюнчю ерде, командагъа къалгъан беш турдан, премьер-лигадан чыкъмай къалмакъ учун, 7-8 очко сама къазанма тарыкъ. Чемпионатны арты бек къужурлу болар деп ойлашаман, айрокъда Лапочкин йимик судьялар булан…



Авторизация
*
*
Регистрация
*
*
*
Согласны с условиями сайта?
Генерация пароля