Магьаммат МАГЬАММАТОВ: «Ишлерибиз натижалы болажакъгъа инанаман»

   


Ювукъда Красноярскиде тутушуп ябушувдан Иван Ярыгинни эсделигине багъышлангъан гезикли халкъара ярышлары оьтгерилди. Шоларда къумукъ уланлар Завур Угуев (57 кило авурлукъда) ва Ильяс Бекболатов (65 кило авурлукъда) уьстюнлюк къазандылар. Артдагъы гюнлерде Ильясны тренери Магьаммат Магьамматов Къаягент райондагъы мухбирибиз Магьамматрасул Ибрагьимов булан ёлугъуп, оьтгерилген ярышланы, олай да гележекге гёз алгъа тутулгъан хыялларыны гьакъында баянлыкъ берген. Гьали тюпде шону охувчуланы тергевюне беребиз.


 

–Магьаммат Хасболатович, Иван Ярыгинни эсделигине байлавлу бирдагъы бир ярышлар оьтгерилди. Ильяс шо ярышларда дёртюнчюлей ортакъчылыкъ этди. Биз билеген кюйде, Ильяс шо ярышланы барышында оьтгерилген тогъатартывланы барысын да утгъан. Шо уьстюнлюк булан Ильясны да, сизин де бирдагъы да къутлайбыз! Ярышланы барышы гьакъда бизин охувчуларыбызгъа не айтмагъа болар эдигиз?



– Белгили кочап Иван Ярыгинни эсделигине багъышлангъан халкъара ярышларына спортчуланы арасында «Гиччи дюнья чемпионаты» деп негьакъ айтылмай. Красноярскиде гьар йылны башында дюньяны бары да гючлю кочап­лары жыйыла. Бу йылда да тап шолай болду. Ярышларда ортакъчылыкъ этмек учун лап гючлю кочаплагъа имканлыкъ берилди. Ачыкълашдырып айтгъанда, 65 кило авурлукъда Ильясдан къайры дагъы да эки россиялы кочап Европаны ва дюньяны оьлчевюндеги ярышларында экинчи ва уьчюнчю ерлер къазангъан дагъыстанлы Агьмат Чакаев ва 23 йыл битмеген кочапланы арасында дюньяны чемпиону тувалы кочап Начын Куулар ортакъчылыкъ этдилер.


– Ильясны халчагъа чыгъышлары нечик болду?



– Салынгъан чёпге гёре Ильяс гючлю группагъа гирди. Дюньяны чемпиону америкалы Логан Стиберни, бизин якълы Агьмат Чакаевни атлары кёп затны айта. Тек олар бизин Ильясгъа айтардай пуршавлукъ этмеге бажармадылар. Стибер булангъы ёлугъув 16:6 санав булан Ильясны пайдасына битди. Сонг Ильяс тувалы Начын Кууларны 12:5 санав булан утду. Уьчюнчю ёлугъув монголиялы кочап Батмагнай Батчулун булан болду. Шо тогъатартывну да Ильяс енгил оьтдю. Финалда Ильясгъа къаршы хасавюртлу Ильяс Чакаев чыкъды. Тутушувну биринчи яртысында Ильяс 3 бал алмагъа бажарды, экинчи яртысында шоланы сакълап, тогъатартывну оьзюню пайдасына тамамлады.


–Магьаммат Хасболатович, тутушуп ябушувну якъчылары эсгерилген ярышланы лап гючлю кочабы гьисапда Ильяс Бекболатовну белгиледи.



– Бизин учун шо – сююнчлю хабар. Ярышларда юрюлген тогъатартывланы гёргенлер Ильясны ябушувуна тюз ва лайыкълы къыймат берген. Сиз де билесиз, Ильяс Красноярскиге ярышланы алдындагъы гече гелип етишди. Ол Индияда тутушуп ябушувда клубланы арасында болгъан чемпионатында ортакъчылыкъ да этди. Тек финалда клубуна кёмек этмеге болмады. Себеби – Красноярскиге геч бола эди. Ярыгинни ярышларын утмаса, Каспийскиде оьтгерилежек Европа чемпионатына ёл берилмежек эди. Не буса да, Аллагьыбыз ишлерибизни тюзелтди. Ильяс шонда да, мунда да биринчи болду. Балики, тутушуп ябушувну сюегенлер тавушларын Ильясгъа шо саялы бергендир.


– Индия-Москва-Красноярск … Ёллар, сагьатлар, исси Индия, сувукъ Красноярск… Ильяс шоланы нечик гётерди?



–Тюз айтасыз, Магьамматрасул. Индияда Ильяс, буту авуртуп янгыз ­дюнья ва Олимпия оюнларыны чемпиону Сослан Рамоновгъа бир бал утдурду. Шонда да судьялагъа соравлар арагъа чыгъа. Къой, шо оланы намусунда къалсын. Ильяс болмаса да, ону командасы финалда уьст болуп, Индия лигасында биринчи ер къазанды. Сонг ол исси Индиядан 40 градус сувукъ Красноярскиге гелди. 10 сагьатлыкъ учув, аэропортларда рейсни къаравуллав гьар-бир спортчуну савлукъ гьалына пуршавлукъ этмей болмай. Шондан къайры, Ильяс авурлугъун да гелишдирмеге герек эди. Аллагьгъа шюкюр, бары ишлерибиз тюзелди.


– Ярышлар оьтгерилип битген гюн Россияны тутушуп ябушувдан баш тренери Жанболат Тедеев Европа чемпионатында янгыз Къурбаналиевге, Цаболовгъа ва Садулаевге ортакъчылыкъ этмеге ихтияр этемен, къалгъан кочапланы дагъы да тергемеге тарыкъ деп билдирген. Шо сёзлени нечик анг­ламагъа тарыкъ?



– Шогъар онча тергев этмеге тюшмей. Баш тренер шолай талаплы болмагъа герек. Ильяс бугюнлерде Сочи шагьарда Россияны жыйым командасы булан Европа чемпионатына гьазир бола. Ону ишлери яхшы.


– Магьаммат Хасболатович, 2018-нчи йылда дагъы да къайсы ярышларда ортакъчылыкъ этмеге гёз алгъа тутулгъан?



– Европа чемпионатындан сонг Россияны чемпионаты гёз алгъа тутулгъан. Россияны чемпионатында уьст болгъанлар дюнья чемпионатына баражакъ. Алда жаваплы халкъара спорт ярышлар да токътагъан. Шоланы барысында да ортакъчылыкъ этип, лайыкълы натижалар гёрсетип, якъчыларыбызны, юртлуларыбызны, Къаягент районну, Дагъыстанны халкъларын сююндюрмеге тарыкъбыз.


– Яш кочапланы, оьрюм яшланы ишлери нечикдир?



– Яман тюгюл. Тутушуп ябушув булан машгъул болагъанланы санаву йыл сайын арта. Гьали Къаягентде яшлар эки спортзалда тутушуп ябушувну сырларына уьйрене. Бу йыл гюзде заманны талапларына жавап береген янгы спортзал ишге гийирилежек. Шо да бизин сююндюре.


– Спортну тутушуп ябушув журасын Къаягент районда дагъы да генглешдирмек учун нечик чаралар гёрмеге тюше?



–Тутушуп ябушувну районну халкъы бек сюе, кочапларыбызны уьстюнлюк­леринден къувана. Районну башчысы Магьамматэмин Гьажиев де бизге кёп тергев бере. Гьар не якъдан да бизин даим якълай, къолдан гелеген кёмегин эте. Спортну гьар къайсы журасы да, шоланы арасында тутушуп ябушув да, яш наслуну чыныкъдыра, тарбиялай. Шону учун ону дагъы да генглешдиривню чараларын гёрмеге герек деп гьисап этемен. Тутушуп ябушувну район федерациясын ачсакъ, ишлерибиз дагъы да алгъа гетер эди деп эсиме геле. Федерация тренерлени, муниципал къуллукъчуланы, тутушуп ябушувну сюегенлени бирикдирер эди. Нечик алай да, ишлерибиз натижалы болажакъгъа инанаман.


– Тюз айтасыз. Заман табып, бизин булан ёлугъуп, Ильясны уьстюнлюклери гьакъда баянлыкъ бергенигиз саялы сизге баракалла. 2018-нчи йылда сизге де, Ильясгъа да янгы уьстюнлюклер ёрайбыз.



– Сиз де савболугъуз.


 


Магьамматрасул ИБРАГЬИМОВ.



Авторизация
*
*
Регистрация
*
*
*
Согласны с условиями сайта?
Генерация пароля