Талавургъа айландырма тюшмей

 

Белгили болгъан кююнде, республикабызны ватандашларыны авадан пайы, дагъы да ачыкълашдырып айтсакъ, 60 процентге ювугъу юрт ерлерде яшай. Тек не этерсен, артдагъы йыллардагъы сынав гёрсетеген кююнде, аслу гьалда юртлу загьматчыланы ишге гючю чатагъанларыны лап да къуватлы ва жагьил гюплери, къазанч учун шагьарлагъа ва республикадан тышгъа гетип, амал этмеге борчлу бола.

Шону гьисапгъа алып, бизин Дагъыстанда да, озокъда, республикабызны башчыларыны ва юрт хозяйство министерлигини янындан пачалыкъ оьлчевюндеги чараланы оьтгеривге тергев де берилмей тюгюл. Неге десегиз, юрт ерлерде яшайгъан ватандашланы талапларына   сувукъ-салкъын янашыв бизин республикабызны ичинде болдурулагъан продуктну умуми къадарын къолайлашдырывгъа чатакъ сала.

ДР-ни Халкъ Жыйыныны октябр айны 2-нде болгъан 41-нчи сессиясында да шо масъалагъа байлавлу генг кюйде гьакълашыв юрюлдю.

Федерал законланы талапларына кюрчюленип, Дагъыстанда да ЛПХ-ланы (личные подсобные хозяйства) есилерине къоллавгъа ижарагъа яда буса даимлик къоллавгъа  берилеген топуракъ майданланы оьлчевлерин артдырывгъа байлавлу гьазирленген законну проекти арагъа салынып ойлашылды ва сонг тавушгъа салынып къабул да этилинди.

– Белгили болгъан кююнде, ЛПХ-лагъа къоллавгъа берилеген топуракъ пайланы оьлчевю алдагъы 0,5 гектардан 2,5 гектаргъа ерли регионланы муниципал къурулувларыны имканлыкъларына гёре федерал законланы тийишли гесимлерине кюрчюленип артдырылажакъ, – деди оьзюню сёйлевюнде Дагъыстанны пачалыкъ мюлк министерлигини министри Имран Гьюсейнов. – Шону учун, озокъда,  РД-ни «О личном пособном хозяйстве» деген Законуну 4-нчю статьясына да тийишли алмашыныв этмеге герек болажакъ.

Озокъда, янгыз топуракъ пайланы оьлчевлерин артдырыв булан  «Агропромышленный тармакъны асувлулугъу учун» деген милли борчланы талапларын яшавгъа чыгъарма четим болажагъы да гьакъ. Шону гьакъында айта туруп, оьзюню сёйлевюню ахырында министр ЛПХ-лар учун пачалыкъны янындан этилинеген кёмекни, харжланы оьлчевлерин де бир къадар артдырмагъа тюшегени гьакъда эсгермей болмады.

            Шолай харжлар да, аслу гьалда эсгерилген проектде айтылагъан кююнде, регионлардагъы муниципал къурулувларыны имканлыкъларына гёре ва шолай да республика бюджетлерден де айырылмагъа тарыкъ.

Белгили болгъан кююнде, Дагъыстанда топуракъ пайлар артса, юрт хозяйство агьамияты булангъы топуракълар ишлетилмей, асувсуз къалажакъ деген пикругъа бойсыныв зараллы.

Айтмагъа сюегеним, артдагъы бир нече йылны ичинде Къаягент райондагъы юрт жамиятлары ГУП-ланы законсуз къурулгъаны  саялы гери уруп тайдырып, шондан сонг оланы ихтиярындагъы топуракъ пайланы ерли адамлагъа  пайлап бермекни якълай ва талап да эте.

Шо саялы да олар учун гьар тюрлю онгайлыкъланы болдурувгъа деп айырылагъан пачалыкъ харжланы да алда йимик талавургъа айландырмагъа тюшмей.

Ёгъесе, бизин республикабызны ич базарларын, гьаманда йимик гьали де, тышдан гелтирилеген сан яны шекликни тувдурагъан авлакъ ниъматлар ва сурсат маллар бийлеп туражакъ.

К. КАРАЕВ.

Авторизация
*
*
Регистрация
*
*
*
Согласны с условиями сайта?
Генерация пароля