Республиканская еженедельная общественно-
политическая газета «Ёлдаш» (Спутник)
Меню YOLDASH.news МаълуматларКъайгъырыш КъутлавларDAG.news"Времена"В ДагестанеВ РоссииИнтервьюВ миреНа КавказеГлава РДНародное СобраниеПравительствоМинистерства и ведомства Муниципалитеты In memoriamНовости спортаГод культуры безопасности Выборы - 2018ЧЕ-2018 Kaspeuro2018БлогосфераАналитикаЖамиятПолитика.ЭкономикаБаянлыкъДин ва яшавЖамият низамИлмуTürk dünyasi Савлукъ ЭкологияЮртлар ва юртлуларЯшёрюмлер МаълуматАнтитеррорБирев де унутулмагъан...МаданиятАдабиятКультура ожакъларБилимИнчесаният Къумукъ тилКроссвордМасхараларТеатрЯнгы китапларЯшланы дюньясы Спорт ярышларЕдиноборства Развитие спортаСоревнованияФК «Анжи» МедиасфераО газетеО сайтеСМИНаши авторыФото дняНаши партнерыНаши спонсорыСотрудникиАфишаГалереяРекламаЮбилейный номер
Республиканская еженедельная общественно-
политическая газета «Ёлдаш» (Спутник)
Пачалыкъ Думадагъылар булан тенглешдирмеге  кюй де ёкъ

Пачалыкъ Думадагъылар булан тенглешдирмеге кюй де ёкъ


Пятница, 25.05.2018г. - "ЁЛДАШ".


Пачалыкъ Думаны сайтында депутатланы оьтген 2017-нчи йылдагъы гелимлерини ва оланы ихтиярындагъы мюлкню гьакъындагъы маълуматлар ерлешдирилген. Мен шо маълуматланы эринмей барысын да бир ягъадан тергевлю кюйде охуп чыкъдым. Тюзюн айтгъанда, бир тюрлю гьасиллер чыгъарма себеплер де табылмай къалмады. Гьали, гьюрметли охувчулар, сизин де шолар булан таныш этме сюемен.


Алда сайлангъан Думада йимик, гьалигисинде де тербенмес байлары булан янаша янгыз депутатлыкъ алапасына яшав къурагъанлар да бар (депутатланы айлыкъ алапасы – 360 минг манат). Мисал учун, Григорий Аникеев 2017-нчи йылда 4,3 миллиард манат къазангъан буса, Думагъа КПРФ-ни партия сиягьындан сайлангъан дагъыстанлы Ризван Къурбановну гелимлери 2,6 миллион манатдан арт­магъан. Уьстевюне, депутат берген маълуматлагъа инанса, ону ихтиярында не уьй-эшиги, не башгъа мюлкю ёкъ. Пачалыкъ Думаны жыйынларына да ол, къарагъанда, метро яда башгъа жамият транспорт булан етишегенге ошай.


Бирдагъы бир тергевню тартагъан ва тамашагъа къалдырагъан зат – эргиши депутатланы хыйлысыны къатынлары олардан эсе шайлы артыкъ къазана экен. Масала, Вадим Белоусов сав йылны узагъында законланы ярата туруп, ожакъ хазнасын 6,3 миллион манатгъа толумлашдыргъан. Ону агьлю черини йыллыкъ гелимлери буса 300 миллион манатгъа етишген. Дагъыстанлы депутатланы айтсакъ, шолай Мурат Гьажиевни де экинчи яртысы гелимлери булан эрини «бурнуна сув тийдирген». Умахан Умахановну декларациясында ону еслигинде биргине-бир квартир бар деп эсгериле. Амма агьлюсю 3 уьйню ва 1 квартирни есиси деп юрюле. Уьйлерини лап уллусу Испанияда ерлешген.


Къатынгиши депутатлар эргишилер йимик мал-матагьын агьлю черлерини атына яздырма алгъасамай. 76 къатынгиши депутатдан биргине- бир Анна Кувычкону йыллыкъ гелими эриникинден аз. Къалгъанлары яда эрлеринден айырылып айрыча яшайлар яда олар къазанагъан акъча къатынларыны гелимлерине ювукъ да бармай.


Дагъыстандан сайлангъан депутатланы арасындан лап мадарлысы деп Абдулмажит Магьарамовну гьисаплама ярай. Ол 10 миллион манат къазангъандан къайры, къатыны булан бирче 3 уьйню, 7 квартирни ва 8 гектар топуракъны есилери болуп токътай.


Гьали гелейик бизге ювукъ Дагъыстан парламентге. Пачалыкъ Дума булан тенглешдиргенде бизин депутатланы мал-матагь ва акъча-бокъча якъдан гьалы онча макътардай тюгюл. 90 депутатдан 45-вюню оьзлени машинлери ёкъ. М.Магьмутов ( КПРФ-ни Дагъыстан бёлюгюню башчысы), В.Фаталиев, В.Гьалалмагьамматов, Ф.Ражапов, М.Гьасанов, М.Пейзулаев оьзлеге турма ер ёкъ саялы, агьлюлери булан гьакъ тёлеп гишилени уьйлеринде яшайлар. Инг де тамаша ери, мисал учун, М.Пейзулаев декларациясында не уьюм, не квартирим ёкъ, шо саялы квартирде тураман деп яза, оьзю буса 4 миллион манатгъа токътайгъан «Лексус» маркалы машинге минип айлана.


Машинлери бар депутатлар аслу гьалда багьалы «Тойота» ва «Мерседес» маркалы машинлени къоллайлар. Лап да багьалы машинни –«Роллс Ройсну» есиси – Далгьат Магьачев. Шо ингилис машинни базар багьасы 30 миллион манатдан да артыкъ. Д.Магьачев оьзге депутатлар булан тенглешдиргенде инг де мадарлысы десе де, къопдурув болмас. Огъар атасындан варисликге 9 яшавлукъ уьй, 9 гьар тюрлю предприятие ва 0,6 гектар топуракъ къалгъан. Йыллыкъ гелимлерин айтгъанда, лап да кёп М.Садулаев къазангъан. Ол декларациясында 39,5 миллион манатны гёрсетген. Ону янында йылда 10 минг манатлыкъ гелими булангъы М.Магьамматов девню къырыйындагъы къомурсгъа йимик гёрюне.


Озокъда, депутатланы декларацияларына байлавлу дагъы да хыйлы къужурлу маълуматлар гелтирмеге болар эди. Тек охувчуланы гьатдан озуп кёп санавлар булан башын инжитип турмайлы, къалгъан янын дагъы гезикге къояйыкъ.



Количество показов: 127
Автор: YOLDASH.news
25.05.2018 11:45

Возврат к списку









AlfaSystems massmedia K3FN2SA
Рейтинг@Mail.ru Яндекс.Метрика Бесплатный анализ сайта