Кимлеге аркъа таяма хыялы бар?

Бир ай алъякъда бизин белгили алимлерибизни ва жамият чалышывчуларыбызны Дагъыс­танны мюлк ва топуракъ аралыкъларыны министри Е.Толстикова булан ёлугъуву оьтгерилди. Ёлугъувгъа министерликни маълумат къураллар булан байлавлукъ тутагъан бёлюгюню къуллукъчулары оьзге, гьатта харлысыз деп юрюлеген газетлени унутмай, чакъырылгъанланы арасына неге буса да «Ёлдашны» журналистлерин къошмакъны «эсинден чыгъарып» къойгъан эди.



Шогъар да къарамай, «Ёлдаш» охувчуларына болгъан агьвалатны гьакъында генг кюйде маълумат бермеге, министр булан бетге-бет лакъыр этген тамазаларыбызны пикрусун етишдирмеге къаст этди.



Ёлугъувгъа байлавлу макъала гьазирленегенде мен тамазаларыбызгъа: «Энниден сонг топуракъ масъала къумукълар салагъан кюйде чечилерге умут бармы? Янгы гелген гьакимбашлар шону ахтигине ерли тюшюнюп сама битгенми экен?» – деп сорав берген эдим. Оланы пикруларыны жамын чыгъарып айтгъанда: «Умут да аз, инамлыкъ да тувмай, теренине тюшюп айланаргъа да ошамай».



Тюзюн айтгъанда, уллуларыбызны жавабы мени бир де тамашагъа къалдырмады. Эсгерилген министерликни жаваплы къуллукъчулары ва башчысы береген баянлыкълардан олар ишин не ёрукъда къурма гёз алгъа тутгъаны ачыкъдан гёрюнюп тура. Оланы аслу мурады ва талабы – не этип буса да, гёчювюл гьайванчылыкъгъа деп берилген топуракъланы асувлугъун артдырмакъ. Асувлугъун дегенде, шо топуракълардан пачалыкъгъа гелеген гьар тюрлю акъча тёлевлени оьлчевлери шайлы артма герек деп гьисап эте.


 Шогъар чы биревню де къаршылыгъы ёкъ эди. Амма шо муратларына етишмек учун дурус ёлланы танглагъанмы? Мисал учун, Е.Толстикова айтагъан кюйде, Дагъыстан гьукуматны тюзлюк бойларда ерлешген къотан топуракъларын ювукъ арада ерли муниципалитетлени ихтиярына къайтарма хыялы ёкъ. Ондан къайры, министр къумукъ юртланы оьзлени миналы топуракъларына янгы есилер болгъан «ижарачылар» булангъы «тогъатартывунда» кимни янын тутажагъын артдагъы вакътилерде Талгиде болгъан агьвалатлар ачыкъдан гёрсетди.


 Белгили кюйде, тёбенкъазанышлы фермерлер Талги бойлардагъы алдагъы колхоз ерлеринде гьайванлар сакълама къарагъанда, шо мен айтагъан «янгы есилер» – Къадар ва Гонода юртланы жамаатлары, пачалыкъ ва аманлыкъны къоруйгъан къурумлардагъы таныш-билишин де къуршап, къумукъ юртну адамларына ишин башлама къоймагъанлар. Бу хабар Е. Толстиковагъа етишгенде, янгы министр 49 йылгъа деп берилген топуракъланы ижарасыны болжалы битгенине де къарамай, къадарлыланы ва гонодалыланы «къаршылыкъ билдиривю» законлу деп гьукму чыгъаргъан. Эгер де министерликде гёчювюл гьайванчылыкъдагъы йыллар булан топлана гелген четим масъалаланы шу ёрукъда чечме умут эте буса, алданокъ айтайыкъ, шо – бош хыял.



Артдагъы вакътилерде бир-бир печат ва айрокъда электрон маълумат къуралларда Дагъыстан гьукуматны ишине этилеген танкъыт гючленип тербейгенин барыбыз да эс этип турабыз. Башлапгъы вакътилерде тютюню гьаран чыгъып турагъан жыжымны йимик, танкъытны «маша булан хозгъап, дюдюк булан 
уьфюрюп» дегенлей, уллу от оьртендей айыплавлагъа айландырма къарайгъанлар бар.


 Баргъан сайын шо гьаракат гючленсе тюгюл, кемимежеги англашыла. Олай болгъан сонг, гьакимият республикада жамиятны къайсы къатлавларына, гючлерине аркъа таяп алышынывлар оьтгерме сюе? Кимлердир оланы якъчылары ва якълавчулары? Шо соравлар оьзлюгюнден тувулуна чы. Пачалыкъны тюгенмес «беженинден» ари теберилгенлер, гьарам къазанчдан къуру къалгъанлар, олар булан тыгъыс байлангъан дос-къардаш, таныш-билиш тогъас салыв, четимликлер тувдурув гьаракатын осаллашдырмажагъын ким билмей?! Шолай шартларда адилликни, тюзлюкню, тенгликни инкар этип, савлай миллетни адилли талапларына къулакъасмай къоймакъ, мен ойлашагъан кюйде, гьакимиятны янындан уллу хата болажакъ.



Авторизация
*
*
Регистрация
*
*
*
Согласны с условиями сайта?
Генерация пароля