Ишлемеге муштарлыгъа не етишмей?

Ишлемеген тишнемес. Озокъда, ишге къуршалма сюеген тайпалар учун бу гьалиги базар аралыкълар оьмюр сюреген девюрде янгыз муштарлыкъ булан шо муратгъа етишмеге бажарылмайгъаны гьакъ. Айтмагъа сюегеним, гьалиги дыгъарлашыв девюрдеги тогъатартывну (конкуренция) шартларында шону учун билим, сынав ва гьар тюрлю онгайлыкълар тарыкъ болагъаны шекликни тувдурмай.


Белгили болгъан кююнде, гьалиги заманда бизин республикабызда яшайгъан адамланы санаву 3 миллионгъа ювукъ болгъан. Олар кимлердир?


Шоланы арасында 45 проценти – 1 миллион 300 мингге ювугъу – 15–72 йыллыкъ чагъындагъы ватандашлар. Демек, олар – савлугъуна гёре ишге къуршалма гючю чатагъанлар.


Тек не этерсен, гьалиги заманда бизин республикабызда ишлемеге муштарлы тайпаланы толу кюйде ишге къуршамагъа бажарылмай. Ишсизликни масъаласы теренден ойлашдырмай болмай. Шону учун оланы бир гюбю ерлерде шагьарлардагъы ва районлардагъы ишлемейгенлени токъташдырагъан хас центрларда гьисапгъа алынгъан. Къалгъанлары, ишге гючю чатагъан тайпаланы 13 процентге ювугъу, ишсизлени сыдыраларын толумлашдыра. Неге десегиз, бизин республикабызда артдагъы вакътилерде экономиканы промышленный ва аграр тармагъында белгиленген инвестпроектлер осал яшавгъа чыгъарыла. Муна шо саялы да, къазанч ахтара туруп, бир тайпалар агьлюлерин де алып оьзбашына рес­публикадан тышгъа гетип иш ахтарагъаны англашыла.


ДР-ни загьмат ва ватандашланы социальный гьажатларын къорув булан машгъул болагъан министерлиги ишге гючю чатагъан дагъыстанлыланы талапларын гьисапгъа алмай, оланы иш булан таъмин этивюню масъаласына къол ялгъамай десек де, дурус болмас. Биринчилей, эсгерилген министерликни кюрчюсюнде яш касбучуланы иш булан таъмин этивню масъалалары булан машгъул болагъан «Уьстюнлюк» деген хас центр къурулгъан ва иш гёре. Нечик?


Айлана якъда республикабызны ичиндеги ва ондан тышдагъы уьлкебизни оьзге регионларыны ишге бакъгъан якъдагъы талапларыны уьстюнде ахтарывлар юрютюв арасы бёлюнмейген кюйде давам этиле. Шолайлыкъда, оьтгерилеген ахтарывланы натижасында къайда не йимик касбучулар тарыкъ экени аян этиле ва шолай саниятлагъа ес болмагъа сюегенлени билимлерин камиллешдирмек муратда охутув курслар юрюле.


Гьали-гьалилерде булай агьамиятлы масъаланы гьисапгъа алып, ДР-ни загьмат ва ватандашланы социальный къуллукъларын кютеген министерликде республикабызны районларыны ва шагьарларыны ишсизлени гьисабын токъташдырыв булан машгъул болагъан центрларыны директорларыны ва шолай да адамланы ишге алма гьажатлыланы ортакъчылыкъ этивю булан оьтгерилген уллу генгеши де тергевню тартмай болмады.


– Бизин республикабыздагъы ишге гючю чатагъанланы къуллукъларына къол ялгъамакъ учун шо ёрукъда хас республика программаны талаплары яшавгъа чыгъарыла, – деди эсгерилген министерликни адамланы касбу билимлерин янгыртыв ва алышдырыв булан машгъул болагъан бёлюгюню начальниги Сайит Муталимов. – Шолайлыкъда, республикабызда ишсизлени базарларында тувулунагъан къыставуллу гьалланы бир къадар ёрукълашдырмагъа ёллар ачыла.


Белгили болгъан кююнде, гьалиги заманда бизин республикабызда къурулуш ва шолай да курорт-туризм комплекслеринде ишлемеге сюеген тайпаланы гьазирлемек учун оланы билимлерин камиллешдиривге тергев айрокъда артып тербей демеге ярай. Шону учун ерлерде адамланы ишге къуршав булан машгъул болагъан центрлар да айлана якъдагъы талапланы гьисапгъа алып, адамланы иш булан таъмин этме муштарлы айрыча предприятиелер ва къурумлар булан дыгъарлашывланы шартларында иш гёрмеге башлагъан. Шо да ишсизликни алдын алывда алда токътагъан агьамиятлы борчланы яшавгъа чыгъарма бир къадар имканлыкълар ярата.

Авторизация
*
*
Регистрация
*
*
*
Согласны с условиями сайта?
Генерация пароля