Ана тиллени лап яхшы муаллими

  

            Газетибизни гетген номеринде биз «2017 -нчи йылны лап яхшы муаллими» деген  республика конкурсу оьтгерилежекни гьакъында айтгъан эдик. Магьачкъаладагъы 11 -нчи гимназияда уьч гюн юрюлген бу конкурсну гьасиллери 16 -нчы мартда чыгъарылды.


Уьстюнлюк алмакъ учун ортакъчылыкъ этген 49 адамдан ярым Финалгъа 10 муаллим сайланды.  Олардан да бешевю финалда ортакъчылыкъ этди. Шоланы арасында бу йылны февраль айында Магьачкъала шагьарны школаларыны ана тиллерден дарс береген муаллимлерини арасында оьтгерилген конкурсда биринчиликни алып республика конкурсунда ортакъчылыкъ этмеге ихтияр къазангъан   Ленингент посёлокну 35 номерли гимназиясыны къумукъ тилден дарс береген муаллими Жанхуватова Зарема Абакаровна  да бар эди. Натижада ол республика конкурсунда да биринчи ерни алып, бизин сююндюрдю. Жюрини членлери Зарема Абакаровнагъа бир гёнгюлден рази болуп, уьстюнлюкню берди.  


               Бу – къумукъ тилни муаллимлери учун да, къумукъ охувчулар учун да, къумукъ тилни сюегенлер учун да макътавлу иш деп айтмагъа ярай, неге тюгюл гьали болгъанча республика оьлчевдеги булай конкурсда къумукъ тилни муаллимлери биринчиликни алмагъан.


          Зарема Абакаровнаны шу уьстюнлюгю булан къутлайбыз! Огъар шулай уьстюнлюкню Москва шагьарда бу йыл оьтгерилежек Бютюнроссия конкурсунда да ёрайбыз.


          З.А. Жанхуватованы гьакъында газетибизни гелеген номеринде язмагъа гёз алгъа тутулгъан. 


Автор: Бизин мухбирибиз.





Авторизация
*
*
Регистрация
*
*
*
Согласны с условиями сайта?
Генерация пароля