ТАТЫВЛУКЪНУ САКЪЛАМАКЪ УЧУН

Генгешде «Россия Федерацияны 2025-нчи йылгъа ерли гёз алгъа тутулгъан пачалыкъ милли политика гьаракатын яшавгъа чыгъарыв» деген Дагъыстан Республиканы пачалыкъ программасына гёре оьтгерилмеге тюшеген чаралар арагъа салынып ойлашылды. Шо программагъа гёре 2013-2015-нчи йылларда оьтгерилмеге  гёз алгъа тутулгъан ишлеге, шону булан бирге бизин республикада миллетлени арасындагъы татывлукъну сакълавну масъаласына да айрыча къаралды. Шо гьакъда ДР-ни милли масъалалагъа къарайгъан министрини биринчи орунбасары Зикрула Ильясов билдирив этди.

Ону сёзлерине гёре, Дагъыс­танны халкъларыны милли тиллерин сакъламакъ ва оьсдюрмек, оланы уьйренивге болушлукъ этмек учун министерлик А. Тахо-Години атындагъы педагогика илму-ахтарыв институту булан бирче «Дагъыстанны тиллерини гьакъында» деген законну проектин гьазирлеген. Буссагьатгъы вакътиде шо закону проектине тийишли къурумларда къаралып тура. Оьрде эсгерилген масъалаланы яшавгъа чыгъарыв бизин республикада яшайгъан халкъланы ватандашлыкъ англавуну артывуна, милли маданиятны оьсювюне болушлукъ этегенден къайры да, Дагъыстанда пачалыкъ аманлыкъны, политика ёрукълукъну ва жамият низамны болдурувгъа шартлар ярата.

Оьтгерилген генгешни барышында миллетлени арасындагъы татывлукъну сакъламакъ, олай да  Дагъыстанны абурун артдырмакъ учун ДР-ни Ставропол крайдагъы даимлик вакиллигини гьаракаты гьакъда да айтылды. Генгешде арагъа салынып ойлашылгъан бары да масъалалагъа гёре тийишли къарарлар къабул этилди ва шоларда белгиленген чараланы яшавгъа чыгъарывгъа жаваплы касбучулар токъташдырылды.

 

 

Насрулла БАЙБОЛАТОВ.

Авторизация
*
*
Регистрация
*
*
*
Согласны с условиями сайта?
Генерация пароля