Къонакълар «Анжи» къойгъан кюйде ойнадылар

Оюнну  он тогъузунчу минутда «Анжини» янгы чапгъынчысы Янник Боли штрафнойдан берилген топну башы булан биринчи голну гийиргинче, «Сокол» бизин командагъа аз-маз «тирелме» де къарады. Тек оюнну къалгъан янын  оьзлени «Анжи» ойнама къоягъан кюйде ойнады. Тюзю, къонакълар къоркъуп, алда бир чапгъынчысын да къоюп, оьзлени къапуларына тартылып ойнамады, не гьюнери бар буса да гёрсетмеге къарады.

«Анжи» тувулунгъан бары да къоркъунчлу мюгьлетлеринден пайдаланып голлар гийирген болгъан буса, оюнну санаву он топдан оьтмесе, ювукъ нечик де болажакъ эди. Амаду Мутари, Янник Боли, Али Гьажибеков футбол майданда оьзлени айрыча гючлю гёрсетме бажарды.

Оьрде эсгерилген голдан сонг арадан он минут да гетмейли, «Соколну» къапусуна кёп къоркъунчлу мюгьлетлерден сонг, узакъ гьужумну натижасында Боли экинчи гол гийирди. Савлай оюнну барышында «Анжи» команда утдуруп барагъанда йимик, бары гючюн салып ойнады. Гьатта оюнну заманы битип, судья къошгъан уьч минутда да бизинкилер чапгъын эте туруп йиберди.

Оюнну 60 -нчы минутунда Амаду Мутари оюнну санавун 3:0 этди.  Арадан бираз заман да гетмейли, Ташуев Мутарини ва Болини де артгъа салгъан оюнчулагъа алышдырды. Оланы орнуна Шарип Мугьаммад ва Шамил Асилдаров чыкъды. Команданы чинк де гючлю эки де футболистин алышдыргъан сонг да, оюнну барышы, команданы чапгъынлары аз болмады. Оюнну 3:0 санав булан тамамламагъа бажаргъан «Анжи», йигирма бир очко да алып, турнир таблицаны дёртюнчю еринде ерлешип токътады. 

 

 

Ш. КИШИЕВ.

Авторизация
*
*
Регистрация
*
*
*
Согласны с условиями сайта?
Генерация пароля